Kibīko kya tempelo kyādi mu Kipango kya Bana-bakaji. Dibuku Tempelo​—Busapudi ne mingilo yayo (Angele) dinena amba: “Yādi ijokolokelwe na bukonge, munda mwadi bilambwilo dikumi ne bisatu ku lubumbu, nansha ‘bimpungidi,’ [mwine] mwādi mutūlwa byabuntu.”

Bilambwilo byādi bitwa bu bimpungidi mwanda byādi bityetye ku milomo kadi bikatampe kunshi. Pa kilambwilo ne kilambwilo pādi palamike miswelo palapala ya byabuntu bya kutūla, kadi mwādi mutūlwa lupeto lwa kwingidija mu muswelo mupotoloke. Yesu wādi mu Kipango kya Bana-bakaji paāmwene bantu bavule, kubadila’mo ne wa kishala mulanda, batūla byabuntu.​—Luka 21:1, 2.

Kwādi bilambwilo bibidi bya kutūla’mo bya musonko wa tempelo​—kimo kya mwaka obadi’mo ne kimo kikwabo nakyo kya mwaka mupite. Kilambwilo kya 3 kutūla ku kya 7 mwādi mutūlwa kitatyi ne kitatyi lupeto lwa tukutyikutyi, bankunda, nkuni, ensense, ne bipungwa bya nsahabu. Kitatyi kyādi kitūdila’ko muntu upāna kyabuntu, kintu kya mvubu kutabukile kyabuntu kyadi kilombelwe, wādi utūla bivule mu kilambwilo kimo mu bikwabo bishele’ko. Mu kilambwilo kya 8 mwādi mutūlwa lupeto lwādi lushala ku byakwela bya bubi. Kilambwilo kya 9 kutūla ku kya 12 mwādi mutūlwa lupeto lwādi lushala ku byakwela bya kujilula, ku bitapwa bya tōnyi, ku byakwela bya bene Nanjila, ne ku byakwela bya ba makopo. Kilambwilo kya 13 mwādi mutūlwa byabuntu bya kwilanga.

Luka wāsonekele Evanjile imutelelwa pa dijina dyandi ne Bilongwa bya Batumibwa. Luka unena’mba, “nasekununa na bubinebine bintu byonso tamba ku ñanjilo,” ino bafundi bamo kebāitabijepo nsekununi yandi itala binkumenkume. (Luka 1:3) Penepa wāsekunwine bya binebine namani?

Luka i mutenge bubinebine bwa mānga ibwanya kubingijibwa. Kimfwa, i mwingidije bitenta bivule byampikwa kuyukwa senene pa balupusa bene Loma, kimfwa bambikavu, nansha bandela-bantu ba mu Fidipai; baledi, nansha baludiki ba kibundi kya Tesalonika; ne Bambikavu, nansha baludiki bana-balume ba mu Efisesa. (Bilongwa 16:20; 17:6; 19:31) Luka utēla Heloda Antipese bu muledi, nansha muludiki wa ntanda, ne Sengusa Polosa nandi utēla mbikavu wa Saipusa.​—Bilongwa 13:1, 7.

Kwingidija kwingidije Luka bitenta biyampe i kukulupilwa mwanda byepelo bya kibundi kya Loma byādi bishinta, na mwāshintyile kitenta kya mwendeji wakyo. Ino Bruce Metzger mufundi wa Bible unena’mba, “kitatyi ne kitatyi bino bisonekwa bya mukanda wa bilongwa bimwekanga bu bya bine mu bifuko ne bitatyi byonso.” Mufundi mukwabo William Ramsay utēla Luka bu “mulembi wa mānga wa ludingo lwa peulu.”