Nābutwilwe mu kisaka kya musokwe mubwanine mu Bilbao, kungala kwa Eshipanye. Nadi mwana wa bubidi mu bana baná. Kisaka kyetu kyādi kya bene Katolika bepāne, kadi nadi ñenda ku misa difuku ne difuku. Nāikele mwadimu na myaka 23​—mwingilo onādi nsenswe ne onāingile myaka 40. Kutentekela pa myanda mikwabo, nādi nefyela pa kufundija bufundiji bwa Katolika, kadi ku kyolwa nādi fundija katekeshimu​—mfundija bana bana-bakaji mwanda wa kukomonika komonyo yabo mibajinji.

Pa kupwa kupityija myaka 12 mu busongi bwa nsangaji, wami mulume wafwa kadi wanshiya na bana bana-bakaji baná ba kulela. Nādi’tu na myaka 33 kete! Nālonga bukomo bwa kusengibwa na lwitabijo lwami lwa Katolika, ino nādi na bipangujo bya kwipangula. Nādi neipangula amba: ‘Shi Kidishitu wētukudile, mwanda waka bantu bendelela kufwa? Shi bantu bayampe bendanga mūlu, mwanda waka tulombanga Bulopwe bwa Leza bwiye?’ Kadi, nādi nanga amba: ‘Shi Leza witutyibilanga mambo kitatyi kyotufwanga, mwanda waka mwenda mafuku tukasakilwa kushiya mūlu, kikendelo, nansha kalunganyembo mwanda wa kutyibilwa butyibi bwa mfulo?’

Nāipangula babitobo bamo bino bipangujo. Umo wanondolola amba: “Nkiyukilepo. Ipangula Eveke. Lelo kidi na mvubu? Mwene ukulupile mudi Leza? Abe wibileke’tu!” Ino naendelela kukimba malondololo. Mwenda mafuku, nakatanwa ku misambo ya ba Jésuite, bene Pende, ne ba Gnostique (Bapela myanda ya Leza). Ino kēkwadipo nansha umo wāletele malondololo mayampe ku bipangujo byami.

Ponābwenye myaka 60 ne musubu, mwana masomo umo wa myaka isamba-ibidi waungita kukatanwa ku kupwila kwa Batumoni ba Yehova. Nāsangela byonāmwene ne byonāivwene, ino pa mwanda wa kuvudilwa bya kulonga mu būmi, nkyāendelelepo kwitana na Batumoni mu kine kitatyi’kya. Myaka ibidi pa kupita’po, ba Juan ne Maite ba mulume ne mukaji Batumoni baiya ku yami njibo. Mu myeji isatu, twesamba bininge mīsambo ya bipangujo ne malondololo, mine yānfudije ku kwifunda Bible.

 Bine, nādi ngija pa kifundwa ne kifundwa! Nādi kimba kuyuka kintu kyonso ne pa mfulo, na kwingidija malamuni asatu a Bible mwanda wa kuyuka shi Batumoni ba Yehova bafundijanga bya bine. Kepejije najingulula’mba, nādi mujimine mu myanda ya Leza mu bula bwa myaka mivule. Nāvutakanibwe na kwishila kukatampe kwādi pa nkulupilo yami ya kala ne byobya byonādi nefunda mu Bible. Nālēmenenwa, kitatyi kyājīkukile nkulupilo yami yādi pamo bwa mutyi mwale miji panshi.

Kupwa, wami mulume wa bubidi wabela bininge ne kufwa wafwa. Mu kitatyi kimo kyonka, naleka kami kaji ne kuviluka mu Bilbao mu kitatyi kityetye. Ba Juan ne Maite nabo baviluka. Ino kya bulanda i kino, nalekele’byo kwifunda Bible. Shako, mu mutyima nādi ndyukile’mba nasokola kya bupeta nkyokibwanyapo kwilwa.

Kintu kya myaka 20 pa kupita’po, ami papo na myaka 82, ba Juan ne Maite bajokela ku Bilbao ne kwiya nkupempula. Bine, nasangele bininge pa kwibamona monka! Nājingulula’mba Yehova kāngidilwepo, ebiya nashilula kwifunda monka. Juan ne Maite bādi bantūkidije mutyima, kitatyi kyonso kyonādi mpituluka mu bipangujo bimo byonka. Nādi nsaka kwivwana myanda ya mu Bible kitatyi ne kitatyi mwanda wa kukutulula bijimba bya mu nkulupilo mibajinji yonādi nayo. Kadi nādi nsaka kukumbanya senene mwanda wa kushintulwila balunda nami ne kisaka kyami bubinebine bwa mu Bible.

Difuku dyonābatyijibwe​—na myaka 87—​dyādi difuku dya nsangaji mikatampe mu būmi bwami. Nābatyijibwe ku kitango kya Batumoni ba Yehova. Mukulumpe umo mwine Kidishitu wānene mwisambo wimanine pa Bible wādi utala nakampata boba bakubatyijibwa. Nāsūmija impolo pa kwivwana uno mwisambo. Nēwivwene’nka pamo bwa Yehova wisamba nami. Ami pa kupwa kubatyijibwa, Batumoni bavule baiya nkufwija’ko—nansha bavule mobadi byokebādipo bandyukile!

Nādi nyeke ndyukile amba Yesu Kidishitu i “dishinda.” (Yoano 14:6) Ino byonādi nefunda mu Bible byāunkweshe ndyuke Yehova, kwine kwituludikila Yesu. Pano mbwanya kulombela kudi Leza pamo bwa Tata ne Mulunda muswe. Kutanga dibuku Fwena Kudi Yehova * kwāshintyile bintu mu būmi bwami. Nāpwile kutanga’dyo dibajinji mu bufuku’tu bumo! Nātengelwe pa kuyuka’mba Yehova i wa lusa.

Pa kutala bukimbi bonālongele mu kitatyi kilampe pa bubinebine bwa myanda ya Leza, nangulukilanga pa binenwa bya Yesu bya amba: “Lombai’nka kulomba, nabya mukapebwa; kimbai’nka kukimba, nabya mukamona; kokolai’nka kukokola nabya mukashitwilwa.” (Mateo 7:7) Pano natana malondololo onādi nkimba kitatyi kilampe, abandetela nsangaji ya kusapwila’o bakwetu.

Ami pa kubwanya myaka 90, nadi nekimwene’nka bu mwanuke ku mushipiditu. Ku kupwila konso nkotanwanga ku Njibo ya Bulopwe i mukenga wa pa bula​—wa kutambula buyuki bulēme ne kwikala mu kipwano na batutu ne bakaka baswe. Ngidi na mēlu a kukekala monka bu mwadimu mu Paladisa yalailwe pano pa ntanda. (Kusokwelwa 21:3, 4) Ntengele nakampata kumona monka baswe bami bafwile bajokela ku būmi ne kumona mukenga wa kwibafundija bubinebine bwa mu Bible. (Bilongwa 24:15) Bine, ntengele kukebashintulwila kyabuntu kilēme kimpele Yehova mu bununu bwami!