Ubwanya kwiipangula amba: ‘Shi Leza uyukile bintu byonso, kubadila’mo milangwe ne byonso byonsakilwa, le kine kyonombelela kika?’ Kino i kipangujo kya mvubu. Le Yesu kānenepo amba Leza “uyukile bine byomusakilwa ne banwe bene kemwamulombele’byo?” (Mateo 6:8) Davida Mulopwe wa Isalela wa kala nandi wājingulwile kino, wāsoneka amba: “Ke-kuntu kekudipo mwanda pa ludimi lwami, poso, ē! Talapo, abe Yehova, uyūkidije’o.” (Mitōto 139:4) Le penepa, mwanda waka tufwaninwe kulombela Leza? Pa kusaka kulondolola, tubandaulei byobya binena Bible pa mwanda utala milombelo ya batōtyi ba Leza. *

Nansha binena Bible amba Yehova * Leza uyukile bintu byonso, ulombolanga kadi amba katengapo’tu mutyima’nka kuyuka myanda itala batōtyi bandi kete. (Mitōto 139:6; Loma 11:33) Luté lwandi lwampikwa mfulo keludipo pamo bwa mpangiko ya mu olodinatele ilama’nka myanda itala bantu kete. Na bubine, Leza utele mutyima bininge ku milangwe yetu ya munda mwanda usakanga tumufwene. (Mitōto 139:23, 24; Yakoba 4:8) O mwanda mwine Yesu wākankamikile balondi bandi balombele, nansha shi Shandi uyukile biyampe bisakibwa byetu. (Mateo 6:6-8) Shi tulombole Umpangi milangwe yetu, tukamufwena.

Kyaba kimo, tubwanya kukomenwa kuyuka myanda mine mipotoloke ya kutela mu milombelo yetu. Shi bidi nankyo, Leza ubwanya kumona senene milangwe yetu ya mu mutyima ne kwingidija buyuki bwandi bu bwaninine mungya ngikadilo yetu na kwitupa byotusakilwa. (Loma 8:26, 27; Efisesa 3:20) Shi tubajingulula amba Leza wetukwasha mu būmi, enka ne mu muswelo keumweka na meso, biketutonona tumufwene.

Bible witukulupija amba, Leza Mwinē Bukomo Bonso ulondololanga milombelo ya bengidi bandi ba kikōkeji, ino kadi uletanga ne bubinga bwine bwakemvwaninangapo milombelo imo. Kimfwa, kitatyi kyāyudile bukalabale mu Isalela wa kala, Leza wāsoñenye mupolofeto Isaya ebalombole amba: “Po mukavudija lulombelo lungilungi, nkikevwanapo; mwanda makasa enu i mayule mashi.” (Isaya 1:15) Na bubine, boba kebakōkelapo bijila bya Leza nansha boba balombela na kukanina kubi kwa mutyima kebabwanyapo kwivwanikwa na Leza.​—Nkindi 28:9; Yakoba 4:3.

Kadi Bible unena amba: “Wivwane tumulombe kintu kyonso, shi kika shi kika, mwendele kiswa-mutyima kyandi, witwivwananga.” (1 Yoano 5:14) Le kino kilombola amba, Leza ukapa bengidi bandi kyonso kyo bamulomba? Nansha dimo. Langulukila pa mwanda wa mutumibwa Polo, wāzenzele Leza misunsa isatu amutalule “mwiba mu ngitu.” (2 Kodinda 12:7, 8) Padi Polo wādi ususuka na misongo keibeluka ya meso. Bine, kino ye kino kyāmulobeje! Polo wāpelwe kyabuntu kya kundapañana kadi wāsangwile ne muntu, ino wādi ufwaninwe kūminina misongo yandi. (Bilongwa 19:11, 12; 20:9, 10) Nansha malondololo a ku kuzenza kwandi byokeālondolwelwepo mungya mwaādi usakila, Polo wāsangedile bukwashi bwa Leza.​—2 Kodinda 12:9, 10.

Na bubine, Leza wālondolwele milombelo ya bantu bamo bātelelwe mu Bible mu kingelengele. (2 Balopwe 20:1-7) Inoko kulondololwa mu kingelengele kepādipo pa kulondela, nansha ke mu kitatyi kyāsonekelwe Bible. Bantu bamo betabije bāvutakanibwe ñeni pa kumona amba Leza kālondolwelepo ku milombelo yabo. Mulopwe Davida wāipangwile amba: “Abe Yehova, i ku mwaka kale, kokamvulaminwa?” (Mitōto 13:1) Davida pa kuyuka amba Yehova wāmupandije, kikulupiji kyandi mudi Leza kyakomena’ko. Mu milombelo imo yonka, Davida wābwejeje’ko amba: “Ino nakukulupila kanye kobe.” (Mitōto 13:5) Pamo bwa Davida, bengidi ba Leza dyalelo babwanya kutakamena mu milombelo kufika’nka ne palondolola Leza ku milombelo yabo.—Loma 12:12.

Leza uvuijanga bisakibwa byetu.

Pa mwanda wa bubinga bwendele’mo, bambutwile ba buswe kebapangapo nyeke babo bana byobalomba enka mu kitatyi kyobalomba’byo. Mu muswelo umo onka, kyaba kimo Leza nandi kalondololangapo ku milombelo yetu mu muswelo otusaka nansha mu kitatyi kyotusaka. Inoko, tubwanya kukulupila amba Umpangi wetu, pamo bwa tata wa buswe, ukalondolola na kwitupa bine byotusakilwa pa kitatyi kitungwe ne mu muswelo mufwaninwe.—Luka 11:11-13.

Leza ubwanya kulondolola mu muswelo mufyame.

Le bikekala namani shi tulomba mwanda wa kutana kusengibwa ku makambakano endelelela? Shi kekudipo kilondololwa kya mu kingelengele, le tukanena amba Yehova kalondolwelepo ku milombelo yetu? Ino, i biyampe tubandaule shi Leza i mwitukwashe mu miswelo mifyame. Kimfwa, padi mulunda wa buswe wetukweshe mungya pafudile bukomo bwandi pa kitatyi kyotwadi tusakilwa bukwashi. (Nkindi 17:17) Le padi ke Yehovapo wātumine uno mulunda wa buswe aye kotudi? Ne kadi, tubwanya kutana malondololo a Leza ku milombelo yetu mu mapaje a Bible. Kupityila ku Bible tubwanya kutana bujinguludi botusakilwa pa kunekenya bikoleja.​—2 Temote 3:16, 17.

Pa kyaba kya kutalula makambakano, divule dine Leza upanga bantu bandi bukomo bobasakilwa pa kwianekenya. (2 Kodinda 4:7) Kimfwa, kitatyi kyāzenzele Yesu Shandi a mutalule makambakano kutyina amba dijina dya Leza dyakatukibwa, Yehova wātumine mwikeulu akomeje wandi Mwana. (Luka 22:42, 43) Mu muswelo umo onka, Leza ubwanya kwingidija mulunda netu etukankamike pa kitatyi kine kyotusakilwa’ko. (Nkindi 12:25) Uno muswelo wa kulondolola byokemwekangapo, tufwaninwe kuta’ko mutyima mpata ku muswelo ulondolola Leza milombelo yetu.

Leza ubwanya kulondolola kyaba kimo mungya kitatyi kyandi.

Bible unena amba Leza Mwinē Bukomo Bonso ulombolanga buntu ku bantu betyepeje pa “kitatyi kifwaninwe.” (1 Petelo 5:6) Shi bimweka amba waije kutupu kulondolola ku kulomba kwetu kutamba ku mutyima, ketufwaninwepo kumona amba Leza ketutelepo mutyima. Ino Umpangi wetu byayukile bintu bivule kupita, bimweka amba, ubandaulanga bidi kulomba kwetu mungya bintu byayukile amba byo byotusakilwa kutabuka.

Tulete kimfwa: Langa’po bidi udi na mwana nkasampe wakulombe nkinga. Le ukamupa’yo’tu kapene’pa? Shi ubamone amba kafikīle pa myaka ya kukanda pa nkinga, ubwanya kwilaija pa kitatyi kifwaninwe kya kupota’yo. Ino mwenda mafuku ubwanya kumupotela’yo shi ubamone amba kabwanya kukanda’yo. Mu muswelo umo onka, Leza ubwanya kuvuija “bisakasaka [wetu] mutyima” pa kitatyi kifwaninwe shi twendelele na kulomba.​—Mitōto 37:4.

Bible ukankamika bene Kidishitu baleke kujimija kikulupiji mu mvubu idi na milombelo. Bantu bamo babwanya kunena amba, ‘i kipēla kunena ino kikomo kulonga.’ Bine, shi ulwanga na makambakano a kitatyi kilampe nansha bukondame, ubwanya kumona amba i bikomo kukungila’nka pakalondolwela Leza. Ino i biyampe tuvuluke bintu byāfundije Yesu pa mwanda utala kutakamena mu milombelo.

 Yesu wāletele kyelekejo kya mukaji wa kishala wāendelele kulomba mutyibi mukondame amuketele mambo. (Luka 18:1-3) Nansha byāpelele dibajinji mutyibi kumukwasha, ku mfulo mutyibi kanena aye mwine amba: “Nsa kulonga bukomo abinge, amba aleke kwiya’nka kwiya kumpuñanya na kunombanomba.” (Luka 18:4, 5) Mungya bilembwa bya mu ludimi lubajinjibajinji, mutyibi wātele mutyima kudi uno wa kishala mwanda “kamujiminepo mu meso,” nansha mu muneneno wa kyelekejo “wātyinine kona ntumbo yandi.” * Shi mutyibi mukondame wātyinine kona ntumbo yandi, wākweshe mulanda wa kishala, le penepa Leza witutele mutyima abulwe’po kubingija boba “bamwabija dyuba ne bufuku”! Monka mwānene’kyo Yesu, Leza “ukebabingija bukidibukidi.”​—Luka 18: 6-8.

Kyaba kimo tubwanya padi kukōka kulomba bukwashi nansha buntu, ino ketufwaninwepo kuleka’byo. Shi twendelele kulomba, tulombolanga bine amba tudi na mutyima wa kusaka Leza etulunge’ko kuboko mu būmi bwetu. Kadi kwifunda kuyuka mulondolwelanga Leza ku milombelo yetu, kuketufwenya kwadi. Bine tubwanya kukulupila amba Yehova ukalondolola milombelo yetu shi twendelele kulomba na lwitabijo.​—Luka 11:9.