Bantu bavule bayukile amba Leza wa bine ye muludiki wa ino ntanda. Shi i byabine, le ntanda yadi ya kwikala miyule masusu uno muswelo? (1 Yoano 5:19) Bible aye unena amba, ntanda idi mu makasa a umbi.—Tanga 1 Yoano 5:19.

Le muntu mubi wabwenye namani kuludika muzo wa muntu? Tamba ku ngalwilo kwa mānga ya muzo wa muntu, mwikeulu umo wātombokele Leza wātonwene ba mulume ne mukaji bajinji nabo bamutombokele. (Ngalwilo 3:1-6) Ba mulume ne mukaji pa kutonga kukōkela uno mwikeulu ntomboki, Satana, waikala ke muludiki wabo. Leza Mwinē Bukomo Bonso ye aye ufwaninwe kwikala Muludiki, inoko usakanga bantu abobene batonge ebaludike mwanda ba musenswe. (Kupituluka 6:6; 30:16, 19) I kya bulanda, mwanda bantu bavule i bongolwe na kutonga butyibi bubi bwa muswelo umo na bobwa bwātongele ba mulume ne mukaji bajinji.—Tanga Kusokwelwa 12:9.

Le Leza ukaleka Satana endelele na buludiki bwandi bubi? Mhm! Leza ukengidija Yesu mwanda wa kutalula bibi byonso bilongele Satana.—Tanga 1 Yoano 3:8.

Yesu pa kupebwa bukomo na Leza, usa konakanya Satana. (Loma 16:20) Kupwa penepa, Leza usakuludika bantu ne kujokejeja muzo wa muntu ku būmi bwa nsangaji ne ndoe mungya mpango yandi imbajinji.—Tanga Kusokwelwa 21:3-5.