Nabutwidilwe ne kutamina mu kibundi kya kufula kwa Loma kyadi kishiketwe na balanda. Būmi bwādi bukomo. Nkyadipo ndyukile mama wami, kadi nkyadipo mu kipwano kiyampe na tata. Natamine nefunda mwa kwipandijija ku bakwetu bantomboki.

Ino ponabwenye myaka dikumi mwenda mafuku, nashilula kwiba. Ami pa kubwanya myaka 12, nanyema ku njibo musunsa mubajinji. Tata wadi ukansela misunsa mivule ku kité kya bampulushi ne kwenda nami ku njibo. Nadi nepotomeja nyeke na bantu—nadi kipolapola kadi mukalabele ntanda yonso. Ami pa kubwanya myaka 14, nanyema ku njibo lonso. Nashilula kutoma bintu bikolwañana ne kushikata mu dishinda. Byonkyadipo na pa kulāla, nadi nenwe kukōkolokwa mu motoka kufika’nka ne ku mansá a ku lubanga. Kupwa nakateka mema a koya ku mushimwa.

Naikala ngivi wa binebine wibila—mu mufuko kintu kyo-kyonso ku mobo makatampe ne ku mavila bufuku. Nashilula kwikala na ntumbo mibi ne kutwela kiponka na ponka mu kisumpi kya bankasampe banenenwa bibibibi, kwine kwaumpele “mukenga” wa kwiba ku mabanki. Pa mwanda wa kimpuma kyami, naikele ne kwija mpika muntu mulēmekibwe mu kino kisumpi. Nkyadipo ñenda pantu kwakubulwa buta bwami; kadi nadi ndāla nabo mu musāmo wa kwifīka ku mutwe. Bupolapola, kutoma bintu bikolwañana, kwiba, kutukana ne busekese byadi ke mwiendelejo wami wa mu būmi. Bampulushi badi bankimba nyeke. Nakutyilwe misunsa mivule, kadi napityija myaka mivule munda ne panja pa kifungo.

Kyaba kimo ponatambile mu kifungo, nakwete butyibi bwa kwenda kukapempula nkasandya mama mwana-mukaji. Ami papo kuyuka mpika, nanshi uno mama ne bandi bana babidi badi kala ke Batumoni ba Yehova. Baungita kukatanwa ku kupwila kwa Batumoni. Ami pa kukimba kuyuka mobapwidilanga,  naitabija kwenda nabo. Batwe pa kufika ku Njibo ya Bulopwe, nasaka kushikatyila kubwipi na mulango mwanda wa kutala bonso batwela ne batamba. Kunena na bubine, nadi na buta.

Kuno kupwila kwashintyile būmi bwami. Mvuluka ponadi nanga’mba, mfwaninwe kwikala mu umbuo mu kwabo. Bantu bauñimwine na kyanga, bya bulunda, ne na mimungomungo. Nekivulukanga mu ñeni kanye ne mutadilo muyampe wa Batumoni. Kino kyadi kishile kulampe na ntanda yonadi mwena’mo!

Nashilwile kwifunda Bible na Batumoni. Ami pa kwifunda bivule, byamweka’mba būmi bwami bubashinta shintē. Nalondele madingi adi mu Nkindi 13:20 anena amba: “Nanga ne bantu bañeni, nobe ukekala wañeni: Ino umpwani wa bivila ukamona malwa.” Najingulwile’mba mfwaninwe kusonsolokela kisumpi kya babipolapola kulampe. Kulonga namino kekwadipo kupēla, ino nabwanye na bukwashi bwa Yehova.

Kadi netōkeje ami mwine ku ngitu. Pa kulonga bukomo bukatampe, naleka’byo kutoma mfwanka ne bitomibwa bikolwañana. Natenda nywene yami milampe, natalula byuma byami bya ku matwi ne kuleka kutukana. Nashilula kunekenya bilongwa byami musunsa wami mubajinji mu būmi bwami.

Nkyadipo nsangela nansha dimo kutanga ne kwifunda, o mwanda byadi bikomo kuta mutyima ku byobya byonefunda mu Bible ne kwibingidija. Inoko, ami pa kulonga bukomo, nashilula bityebitye kusanswa Yehova, kupwa kintu kimo kyashilula kushinta munda mwami—mutyima wami wa mundamunda washilula kunkambakanya. Nadi divule nelangila bibi, ntatana’mba Yehova kabwanyapo kundekela bibi byonso byonalongele. Mu bino bitatyi nasengelwe bininge na kutanga myanda isambila pa kulekela kwālekēlwe Mulopwe Davida na Yehova kitatyi kyaālongele bubi bukatampe.—2 Samwele 11:1–12:13.

Makambakano makwabo adi a kusapwila bakwetu lwitabijo lwami mu busapudi bwa ku njibo ne njibo. (Mateo 28:19, 20) Nadi na moyo wa kutana muntu onasanshije nansha kulonga kibi mu muswelo kampanda pa kala! Ino nabwanya kunekenya uno moyo mwenda mafuku. Nashilula kutana nsangaji ya binebine idi mu kukwasha bakwetu befunde myanda ya Tata wetu wa kutendelwa udi momwa mūlu, mwine ulekelanga bya binebine.

Kwifunda myanda ya Yehova kwapandije būmi bwami! Balunda nami bavule ba pa kala bafwile nansha kukutwa mu kifungo, ino ami ngidi na būmi bwa nsangaji ya binebine kadi ntengele būmi bwa kumeso. Nefundile kwikala muntu mwityepeje, wa kikōkeji ne kunekenya mwiendelejo wami wa bupolapola. Mfulo mfulō, ngidi mu kipwano kilumbuluke na bantu botushikete nabo. Ngidi mu busongi bwa nsangaji na Carmen wami mukaji mupopoke. Batwe bonso pamo, tudi na nsangaji mikatampe ya kukwasha bakwetu befunde myanda ya mu Bible.

Ami ne Oh twingilanga pano mwingilo muyampe—mwingilo utala kyaba kimo ne mabanki, ino pa kyaba kya kukeba’ko, kundulanga’ko!