KINE KITATENANGA BANTU BAMO: Nansha kitatyi kisakanga bantu batyumukwe mutyima kusengibwa, bamo balañanga’mba kulomba Leza alonge’po kintu ne ebakwashe balwe na makambakano abo i kwisakila. Mwana-mukaji umo witwa bu Raquel unena’mba, “kitatyi nkyomonanga kibalwa kivule kya bantu pano pa ntanda—ne makambakano makomo obalwa nao, monanga bu nkibatelepo mutyima bininge, nkeneshisa kulomba bukwashi kudi Leza.”

BYOBYA BIFUNDIJA KINENWA KYA LEZA: Leza uloñanga’po nyeke kintu mu muswelo wa kutendelwa mwanda wa kukwasha ne kusenga bantu. Muntu yense pano pa ntanda dyalelo i mupyane bubi—kubulwa bukomo bwa kufikila pa misoñanya ya Leza ne pa mfulo. Inoko, Leza “wetusenswe watuma ne wandi Mwana [Yesu Kidishitu] bu kitapwa kya kupwanija pa mwanda wa bubi bwetu.” (1 Yoano 4:10) Kupityila ku lufu lwa Yesu lwa bu kitapwa, Leza i mwitupe muswelo wa kulekelwa bubi, kwikala na mutyima wa mundamunda utōka ne lukulupilo lwa būmi bwa nyeke mu ntanda mipya ya ndoe. * Ino, le kino kitapwa kyāelelwe pa mwanda wa muzo wa muntu mu kikonge’ni, nansha i kilomboji kilombola’mba Leza ukutele mutyima ne bunka bobe?

Tulangulukilei bidi padi mutumibwa Polo. Wātonwenwe na kitapwa kya Yesu wāsoneka amba: “Ngidi nabo pa lwitabijo mudi Mwanā Leza, waunsenswe ne kwipāna pa mwanda wami.” (Ngalatea 2:20) Bine, Yesu wāfwile kumeso kwa Polo kwikala mwine Kidishitu. Inoko, Polo wāmwene kino kitapwa bu kyabuntu kya bunka bwandi kimupele Leza.

Lufu lwa Yesu lwa bu kitapwa i kyabuntu kya bunka kikupele nobe Leza. Kino kyabuntu kilombola’mba wi mulēme kumeso a Leza. Kibwanya kukupa “busengi bwa nyeke ne lukulupilo luyampe,” ne “[kukukomeja] pototo mu bilongwa ne binenwa byonso biyampe.”—2 Tesalonika 2:16, 17.

Ino, Yesu wāpēne būmi bwandi bu kitapwa pano kepadi kintu kya myaka 2000. Le i bukamoni’ka bulombola’mba Leza usakanga kupwana nobe dyalelo?