MUTWE WA MWANDA WA PA KIBALU | LELO LEZA UKUTELE MUTYIMA?
Leza Usakanga Kupwana Nobe
“I kutupu muntu ukokeja kwiya kondi, poso Tata untumine amukoke.” —Yoano 6:44.
KINE KITATENANGA BANTU BAMO: Bantu bavule bakulupile mudi Leza bamwene bu badi kulampe nandi. Christina, mwana-mukaji wa ku Irlande wadi wenda ku kipwilo yenga ne yenga unena’mba, “nadi mumwene’tu bu Leza wāpangile bintu byonso. Inoko nkyadipo muyukile. Nkyadipo nemona nansha dimo bu ngidi pabwipi nandi.”
BYOBYA BIFUNDIJA KINENWA KYA LEZA: Kitatyi kyotwimona bu bajimine, Yehova kalekangapo kulonga bukomo bwa kwitukwasha. Yesu wāelekeje kwituta kwitutele Leza mutyima uno muswelo amba: “Shi muntu kampanda waikala na mikōko katwa ino kubajimina umo, abulwe’po kushiya yoya makumi kitema ne kitema mu ngulu kaenda kukakimba owa umo wajimina?” Lelo i ñeni’ka yotuboila’ko? I ya amba, “mo monka, Tata udi mūlu nandi kasangelangapo nansha umo wa mu bano batyetyetyetye oneke.”—Mateo 18:12-14.
Yense “wa mu bano batyetyetyetye ” i mulēme kumeso a Leza. Lelo Leza ‘ukimbanga owa umo wajimina’ namani? Kukwatañana na kisonekwa kipitulukilwe’mo ku ngalwilo, Yehova ukokelanga bantu kwadi.
Lelo i bāni bapempulanga bantu ku mobo abo ne mu bifuko bya bantu bonso mwanda wa kwibasapwila musapu wa mu Bible utala padi Leza?
Langulukila pa muswelo wākwete Leza mulangwe wa kukoka bantu bampikwa budimbidimbi. Mu myaka katwa kabajinji K.K., Leza watumine Fidipa mwanā bwanga mwine Kidishitu kuketana na mwine Efiopya wa lupusa ne kwisambila pa nshintulwilo ya bupolofeto bwa mu Bible bwādi butanga uno wa lupusa. (Bilongwa 8:26-39) Mwenda mafuku, Leza watuma mutumibwa Petelo kukapempula njibo ya wa lupusa mwine Loma witwa bu Konilusa, mwine wādi ulombela ne kulonga bukomo bwa kutōta Leza. (Bilongwa 10:1-48) Kadi Leza wāludikīle mutumibwa Polo ne bapwani-nandi ku munonga wa panja pa kibundi kya Fidipai. Kwine’kwa, betana na “mutōtyi wa Leza” witwa bu Didya, ebiya “Yehova nandi wamushitula mutyima wandi bikatampe.”—Bilongwa 16:9-15.
Mu ino myanda yonso, Yehova wākweshe boba bonso bādi bamukimba bamone mukenga wa kumuyuka. Lelo i bāni bapempulanga bantu ku mobo abo ne mu bifuko bya bantu bonso mwanda wa kwibasapwila musapu wa mu Bible utala padi Leza? Bavule bakalondolola’mba, i “Batumoni ba Yehova.” Wiipangule’mba, ‘lelo Leza ubwanya kwibengidija baye bamfikile?’ Tubakwisāshila ulombe Leza akukwashe ulonge’po kintu kitatyi kyalonga bukomo bwa kukufwenya kwadi. * ▪
^ mus. 8 Shi usaka kuyukila’ko bivule, tala video ya Falanse inena’mba Mwanda Waka Twifunde Bible? pa www.pr418.com.
Tala'po Bidi ne Bino:
MYANDA ITUTALA
Mwanda Waka Twifunde Bible?
Bible ulondololanga bipangujo bya mvubu mu būmi biipangulanga midiyo ne midiyo ya bantu ntanda yonso. Le nobe usaka alondolole byobe?
