Shi uteja misapu ya ntanda, ukamona padi amba bintu bibi bilongibwanga kyaba kimo mu dijina dya mutōtelo. Mitōtelo yonso keitambilepo kudi Leza wa bine. (Mateo 7:15) Na bubine, bantu bavule i bongolwe.—Tanga 1 Yoano 5:19.

Inoko, Leza uyukile bantu bampikwa budimbidimbi basenswe byoloke ne bubinebine. (Yoano 4:23) Leza witanga bantu ba uno muswelo befunde bubinebine kupityila ku Bible Kinenwa kyandi.—Tanga 1 Temote 2:3-5.

Yehova Leza i mulunge mu bumo bantu batambile mu bipwilo bivule na kwibafundija bubinebine ne na kwibafundija besanswe umo ne mukwabo. (Mika 4:2, 3) Mu uno muswelo, ubwanya kuyuka boba badi mu mutōtelo wa bine kupityila ku muswelo obetele mutyima umo ku mukwabo.—Tanga Yoano 13:35.

Lwitabijo ne būmi bwa batōtyi ba bine bimanine pa Bible. (2 Temote 3:16) Kadi balēmekele dijina dya Leza. (Ñimbo 83:18) Babingijanga ne Bulopwe bwa Leza amba, lo lukulupilo lumo kete ku muzo wa muntu. (Danyele 2:44) Beulanga Yesu na kuleka ‘kitōkeji kyabo kimunike’ ne kulongela bakwabo biyampe. (Mateo 5:16) Nanshi, bene Kidishitu ba bine babwanya kuyukilwa ku bupempudi bwa bulunda bobapempula bantu ku mobo na kitungo kya kwibasapwila myanda miyampe ya Bulopwe bwa Leza.—Tanga Mateo 24:14; Bilongwa 5:42; 20:20.