Yehova Leza wāpangile midiyo ne midiyo ya bamwikeulu kitatyi kilampe kumeso kwa kupanga bantu. (Yoba 38:4,7) Bano bamwikeulu i bipangwa bya ku mushipiditu bidi na bukomo mu mwingilo wa Leza, kyaba kimo wādi wibituma mwanda wa kuludika ne kukinga bengidi bandi pano panshi. (Ñimbo 91:10, 11) Dyalelo bamwikeulu bakwashanga bantu mwanda wa bamwene mu myanda miyampe isapulwa na balondi ba Yesu.—Tanga Kusokwelwa 14:6,7.

Lelo tufwaninwe kulomba bukwashi kudi bamwikeulu? Mhm. Milombelo i kilongwa kya butōtyi, kifwaninwe kulongelwa’nka Leza kete. (Kusokwelwa 19:10) Bamwikeulu byobadi bengidi ba Leza, bakōkelanga ku bulombodi bwandi pa kyaba kya kukōkela ku bwa bantu. O mwanda tufwaninwe kulombela nyeke milombelo yetu enka kudi Leza kupityila kudi Yesu.—Tanga Ñimbo 103:20, 21; Mateo 26:53.

Pamo bwa bantu, bamwikeulu bāpangilwe na bwanapabo bwa kwitongela, kadi babwanya kutonga kulonga biyampe nansha bibi. Ino i kya bulanda, mwanda bamwikeulu bavule bātombokele Leza. (2 Petelo 2: 4) Mubajinji mu bano bamwikeulu i Satana, kadi bakwabo bāmulondele ne kwikala bu bandemona. Bitatyi pa kupita’po, Satana ne bandemona bandi bāpangwa momwa mūlu ne kwelwa pano pa ntanda.—Tanga Kusokwelwa 12: 7- 9.

Bibi ne bupolapola byavudile bininge tamba mu 1914, bilombola’mba Leza usa panopano ponka kwimika mingilo ya Satana ne bandemona. Kupwa Leza ukajokeja ntanda mu ngikadilo ya boloke.—Tanga Kusokwelwa 12:12; 21: 3, 4.