Midiyo ne midiyo ya bantu kujokoloka ntanda yonso, bakulupile mu Bulopwe bwa Leza. Balondanga kimfwa kyāshile Yesu, mwine wāfundije balondi bandi kulombela amba: “Bulopwe bobe bufike. Kiswa-mutyima kyobe kilongeke pano panshi.”—Mateo 6:10, Myanda Miyampe ku Bonso.

Na bubine, nansha bantu bavule byobasangedile Bulopwe bwa Leza bininge, bipwilo bivule bimweka bu kebitele’kopo mutyima bininge. Mu uno mwanda, mulembi wa mānga Herbert George Wells ulombola patōka bulēme bwādi bupele Yesu “bufundiji bwa kintu kyaādi utela bu Bulopwe bwa Mūlu,” kadi buno bufundiji “budi na mvubu . . . bufundiji bwa bipwilo bivule bya bwine Kidishitu.”

Kwishila na bino bipwilo, Batumoni ba Yehova besambilanga bininge pa Bulopwe bwa Leza. Langulukila pa uno mwanda: Dipepala dyetu dya kyalwilo, dine dyotanga pano, i dyalamunwe mu ndimi 220. Kutampwanga kintu kya mapepala midiyo 46 ku nimelo ne nimelo, kadi kino i kilengeje dino dipepala dyabanibwe bininge kujokoloka ntanda yonso. Le dino dipepala didi na musapu’ka mukatampe? Mutwe wa mwanda wadyo onso mutuntulu i uno: Kiteba kya Mulami Kisapula Bulopwe bwa Yehova.  *

Mwanda waka Batumoni ba Yehova baloñanga bukomo bwa kusapula Bulopwe bwa Leza? Bubinga bumo bidi, i mwanda tukulupile’mba Bulopwe bwa Leza po pemanine musapu udi mu dibuku dya mvubu mpata mu ino ntanda—ke Bible kadi. Kadi, tukulupile’mba Bulopwe bwa Leza bo abo kete busa kupwija makambakano ekonda na bantu dyalelo.

Batumoni ba Yehova byobatele mutyima ku Bulopwe bwa Leza, baloñanga bukomo bwa kulonda kimfwa kya Yesu. Kitatyi kyaādi pano pa ntanda, wātangidije Bulopwe bwa Leza kumeso mu būmi bwandi ne mu mwingilo wandi. (Luka 4:43) Mwanda waka Bulopwe bwādi bushintulula bivule kudi Yesu? Ne bubwanya kushintulula bika kodi? Tukulomba ulangulukile pa malondololo aleta Bible, alombwelwe mu bishinte bilonda’ko.