1, 2. (a) Le i bika byāsokwele Yesu pa mafuku a mfulo? (b) Le i bipangujo’ka byotusa kubandaula?

KYĀDI kintu kya kutendelwa kushikata ku Lūlu lwa Impafu—kubandila tempelo mu Yelusalema—kitatyi kyādi kinena Yesu bupolofeto bwandi bwa kutendelwa. Ba Petelo, Andele, Yakoba ne Yoano bātele mutyima bininge pādi panena Yesu bupolofeto bwandi bwa kulampe, bwa mu mafuku a kumeso. Wēbasapwila makambakano makatampe a mu mafuku a mfulo a ino ngikadilo imbi ya bintu, kitatyi kyakekala bu muludiki mu Bulopwe bwa Leza. Wēbasapwila’mba mu kino kitatyi kya makambakano, wandi “umpika mukōkele ne mudyumuke” ukekala ntunguluji wandi pano pa ntanda, na kupa bengidi bandi bidibwa bya ku mushipiditu byobasakilwa pa kitatyi kifwaninwe.—Mat. 24:45-47.

² Kupwa, mu buno bupolofeto bwandi, Yesu wēbasekunwina’mo lukindi lwa bajike dikumi. (Tanga Mateo 25:1-13.) Shi ke pano, tubandaulei bino bipangujo: (1) Le luno lukindi ludi na musapu’ka? (2) Le bashingwe māni ba kikōkeji baingidije  madingi a mu luno lukindi muswelo’ka, ne i bika bilupukile’ko? (3) Le umo ne umo mu bukata mwetu ubwanya kumwena namani mu lukindi lwa Yesu dyalelo?

3. Le mafuku kunyuma, mabuku etu adi esambila muswelo’ka pa lukindi lwa bajike dikumi, ne i bipa’ka byalupukile’ko?

³ Twamwene mu kishinte kibadikile’mba mu bula bwa makumi a myaka ya panopano, umpika mukōkele kakilapo kushintulula bininge Bisonekwa na kwimanina pa byelekejo bya bupolofeto, ino kaesambilanga divule pa bufundiji bwa kamweno bwifundwa’ko. Mu mafuku kunyuma, kyaba kimo mabuku etu adi esambila bininge pa shintulwilo ya byelekejo enka ne mu tumyanda tutyetutye twa mu lukindi lwa Yesu lwa bajike dikumi, kubadila’mo ne binanu, māni, bintu byobaselele’mo māni ne bikwabokwabo. Le mu uno muswelo, musapu wa mvubu wa mu lukindi i mujimine? Monka motusa kwikimwena, malondololo ku kino kipangujo i a kamweno.

4. Le mu luno lukindi, tubwanya kuyuka namani (a) musoñañani? (b) bajike?

⁴ Nanshi tutalei musapu wa Yesu udi mu lukindi. Dibajinji, tubandaulei bene besambilwa’mo. Le musoñañani wa mu lukindi i ani? Na bubine, Yesu wādi wisambila padi aye mwine. Mwanda musunsa mukwabo, wēsambile padi aye mwine amba i musoñañani! (Luka 5:34, 35) Le bajike i bāni? Mu lukindi, Yesu unena’mo amba bajike bafwaninwe kwikala belongolole na binanu byabo mu kitatyi kīya musoñañani. Tala bulombodi bukwabo bwiifwene na buno bwāpele Yesu kandi “kaluombe katyetye” ka balondi bashingwe māni amba: “Ikalai bavwale kadi belongolole ne binanu byenu nabyo bikale byake, kadi ikalai bwa bantu batengele mfumwabo ujoka ku butundaile.” (Luka 12:32, 35, 36) Kadi, ba mutumibwa Polo ne Yoano bāpelwe bukomo bwa mushipiditu pa kudingakanya balondi bashingwe māni ba Kidishitu na bajike belame. (2 Ko. 11:2; Kus. 14:4) Na bubine, Yesu wāletele lukindi ludi mu Mateo 25:1-13 bu madingi ne bu kidyumu ku balondi bandi bashingwe māni.

5. Le Yesu wālombwele kitatyi kyādi kifunkila’po lukindi lwandi muswelo’ka?

⁵ Kupwa tubandaulei mobilondela. Le madingi a Yesu ādi afunkila pa kitatyi’ka? Yesu witulombola kitatyi kinekine dya ku mfulo kwa lukindi amba: “Musoñañani wafika.” (Mat. 25:10) Monka motwefundile’kyo mu Kiteba kya mafuku 15 Kweji 7, 2013, mu bupolofeto bwa Yesu busonekelwe mu Mateo shapita 24 ne 25 i mwisambilwe misunsa mwānda itala pa ‘kufika’ kwandi; mu mwanda ne mwanda i mwingidijibwe muswelo umo onka wa kishima kya Kingidiki. Dibajinji bidi, Yesu wādi wisambila pa kitatyi kya kyamalwa kikatampe pakāya kuleta butyibi ne konakanya ino ngikadilo imbi ya bintu. Kadi i kimweke patōka’mba, luno lukindi lwisambila ne pa mafuku a mfulo, inoko lukamwekelela patōka mu kitatyi kya kyamalwa kikatampe.

6. Kukwatañana na myanda ya kungala ne kunshi kwa lukindi, le lukindi ludi na musapu’ka?

⁶ Le lukindi ludi na musapu’ka? Vuluka myanda ya kungala ne kunshi kwa lukindi. Yesu wādi’tu wisambila padi wandi “umpika mukōkele ne mudyumuke.” Uno umpika wadi wa kwikala kabumbo katyetye ka bana-balume bashingwe māni, bene badi bakutangidila balondi ba Kidishitu mu mafuku a mfulo. Yesu wādyumwine bano bana-balume amba badi bafwaninwe kwikala nyeke ba kikōkeji. Kadi, wāendelele kwisambila’po ne kuleta lukindi mwanda wa kudyumuna balondi bandi bonso bashingwe māni ba mu mafuku a mfulo ‘bakeshe’nka kukesha’ kutyina bakajimija mpalo yabo milēme. (Mat. 25:13) Pano nanshi tubandaulei lukindi ne kumona muswelo wingidije bashingwe māni madingi adi’mo.

7, 8. (a) Le bajike badyumuke belombwele’mba i belongolole pa mwanda wa ngikadilo’ka ibidi? (b) Le bashingwe māni belombolanga namani amba i beteakanye?

⁷ Lukindi lwa Yesu lulombola’mba bajike badyumuke bādi beshile na bendalale mwanda abo bādi belongolole ku kwiya kwa musoñañani. Mwanda waka? Mwanda wa ngikadilo ibidi: kwiteakanya ne kutadija. Bajike bānenenwe kukesha mwanda wa kutengela kwiya kwa musoñañani, bādi banenwe kulama binanu byabo byake pampikwa kulāla mu bula bwa mansá mavule kufika ne bilongeka kinkumenkume kya nsangaji. Kwishila na bajike bendalale, bajike batano bēteakenye bya binebine, bāselele māni a mbwejo mu bintu byabo pamo ne binanu byabo. Le bashingwe māni ba kikōkeji nabo balombolanga amba i beteakanye?

⁸ I amo! Mu ano mafuku a mfulo, bene Kidishitu bashingwe māni baloñanga bintu pamo bwa bajike badyumuke, bēteakēnye mwanda wa kuvuija mwingilo wabo na kikōkeji kufika ne ku mfulo. Bamwene mvubu idi mu kwingila mwingilo na kikōkeji, na kuyuka’mba mwingilo wabo ukebabudija tumweno twa ku ngitu tudi mu ntanda ya Satana. I bepāne abo bene ne pa mfulo kudi Yehova ne kumwingidila, pampikwa mikalo, ino na buswe ne kikōkeji kyabo kwadi ne kudi wandi Mwana. Balamanga bululame bwabo, na kupela kwitabija mushipiditu wa ino ntanda imbi ne bintu byayo, busekese ne ngikadilo ya kwisakila. Mu uno muswelo bekalanga nyeke belongolole, bamunika bininge pamo bwa bimuni, pampikwa kumona nansha dimo amba musoñañani waije.—Fid. 2:15.

9. (a) Lelo i kidyumu’ka kyāletele Yesu pa mwanda utala kukunuka? (b) Le bashingwe māni balondolwele namani ku lubila lwa amba: “Au keye musoñañani”? (Tala ne kunshi kwa dyani.)

⁹ Ngikadilo ya bubidi yakweshe bajike bekale belongolole i kutadija. Le bikokejika bene Kidishitu bashingwe māni kulāla kitatyi kilampe kya bufuku? Bikokejika. Yuka’mba Yesu wēsambile pa bajike dikumi amba, “bonso badi ke bakunuka, ebiya baenda kukalāla” pa kumona’mba musoñañani waije. Yesu wāyukile biyampe amba nansha shi mutyima usaka, bukomo bwa mushipiditu bubwanya kukalakanibwa na bukōkekōke bwa ngitu. Bashingwe māni ba kikōkeji baimvwanije kino kidyumu kikatampe ne kulonga bukomo bwa kwendelela kutadija ne kukesha’nka kukesha. Mu luno lukindi, bajike bonso bālondolwele ku lubila lwa bufuku amba: “Au keye musoñañani!” Ino enka boba batadije bobāuminine kufika ne ku mfulo. (Mat. 25:5, 6; 26:41) Le bashingwe māni ba kikōkeji ba dyalelo nabo le? Mu ano mafuku a mfulo, nabo i betabije buno bukamoni bukatampe na kwela lubila amba, “Au keye musoñañani!”—usaka kufika. Nabo bōmininanga, na kutengela nyeke kwiya kwa Musoñañani. * Inoko, kumwekelela patōka kwa lukindi kwimanine bininge pa kitatyi kipotoloke. Muswelo’ka?

10. Le kwishinta kwa binenwa pa bukata bwa bajike badyumuke ne bendalale i kulupule kipangujo’ka kikomo?

¹⁰ Padi kipindi kikomo bininge kwivwana i kya kubwipi na ku mfulo kwa lukindi, mu kwishinta kwa binenwa kwa bajike bendalale ne bajike badyumuke. (Tanga Mateo 25:8, 9.) Kuno kwishinta kwa binenwa i kulupule kino kipangujo: “Le mu mānga ya bantu ba Leza i kitatyi’ka kyapelele bantu  ba kikōkeji kukwasha boba badi balomba bukwashi?” Malondololo ku kino kipindi kikomo kwivwana, atanwa shi tubandaule monka kitatyi kine kyadi kisambilwa’po. Vuluka bujadiki bwa mwivwanino wetu wa amba Yesu, Musoñañani ukaya kuleta butyibi ku mfulo kwa kyamalwa kikatampe. Mwene i kyendele’mo tulange’mba kino kipindi kya lukindi kyadi kisambila pa byobya byadi byakulongeka kumeso’tu kwa buno butyibi? I amo, mwanda mu kino kitatyi bashingwe māni bakatambula kiyukeno kya mfulo?

11. (a) Le i bika bikalonge’ka kumeso’tu kwa kyamalwa kikatampe kushilula? (b) Le i bika byādi bisaka kunena bajike badyumuke pobānene bajike bendalale bende ku boba bapotejanga māni?

¹¹ Kadi, kumeso kwa kyamalwa kikatampe kushilula, bashingwe māni bonso ba kikōkeji badi pano pa ntanda bakatambula kiyukeno kya mfulo. (Kus. 7:1-4) Mu kino kitatyi, lwito lwabo lukafikidila. Ino langulukila bidi pa myaka ya kumeso kwa kyamalwa kushilula. Le bikekala namani ku bashingwe māni bakomenwa kukesha, ko kunena’mba bajimije bululame bwabo? Bakajimija mpalo yabo ya mūlu. I kimweke patōka’mba kebakatambulapo kiyukeno kya mfulo kumeso kwa kyamalwa kushilula. Mu kino kitatyi bantu bakwabo ba kikōkeji bakashingwa māni mwanda wa kwibapingakana. Pakashilula kyamalwa, bendalale bakafitwa pa kumona bonakani bwa Babiloni Mukatampe. Padi i enka mu kino kitatyi yepobakajingulula’mba kebadipo belongolole ku kwiya kwa Musoñañani. Mu kino kitatyi kya mfulo mokebadipo na kikulupiji, shi bakalombe bukwashi bikekala namani? Lukindi lwa Yesu lwitupa malondololo. Bajike badyumuke bāpelele kutyepeja abo māni pa mwanda wa bajike bendalale, bēbalombola bende ku boba bapotejanga māni. Kadi vuluka’mba, mwādi mu “bukata’tu bwa bufuku.” Le bādi babwanya kutana boba bapotejanga māni mu mine nsá’ya? Aa. Nsá yādi ke mipite.

12. (a) Mu kitatyi kya kyamalwa kikatampe, le i mwanda’ka wa bulanda ukatana boba badi bashingwe māni inoko bajimije bululame bwabo kumeso kwa kutūlwa kiyukeno kya mfulo? (b) Le i bika bikafikila boba belombwele bu bajike bendalale?

¹² Mo monka, bashingwe māni nabo kebakakwashapo muntu ye-yense wakubulwa kikōkeji mu kino kitatyi kya kyamalwa kikatampe. Kekukekalapo bukwashi nansha bumo. Nsá ikekala ke mipite. Penepo, i bika bikafikila bano bantu? Yesu ushintulula byobya byalongekele kitatyi kyāendele bajike bendalale amba: “Musoñañani wafika, ebiya boba bajike badi belongolole batwela nandi mu masobo a butundaile, ne kushita bashita ku kibelo.” Pakafika Kidishitu mu ntumbo yandi kubwipi na ku mfulo ya kyamalwa, ukakongakenya bashingwe māni bandi ba kikōkeji momwa mūlu. (Mat. 24:31; 25:10; Yoa. 14:1-3; 1 Tes. 4:17) Bine, kibelo kikashitwa ku boba bakubulwa kikōkeji, belombwele bu bajike bendalale. Na bubine, babwanya kwela lubila amba: “A Mfumwetu, Mfumwetu, witushitwile’po!” Inoko bakalondololwa kilondololwa na kyokya kikalondololwa boba badi pamo bwa bambuji mu kitatyi kya butyibi amba: “Nemusapwila binebine amba, Ami nkimuyukilepo.” Bine, i kyabulanda’po kashā!—Mat. 7:21-23; 25:11, 12.

13. (a) Mwanda waka ketufwaninwepo kufula ku kunena’mba balondi ba Kidishitu bashingwe māni bavule bakekala bampikwa kikōkeji? (b) Mwanda waka binenwa bya kidyumu bya Yesu bibwanya ne kulombola kikulupiji kyandi? (Tala Kifwatulo kidi ku ngalwilo.)

¹³ Kukwatañana na bino byotwapwa kubandaula, le tukokeja kufula ku kunena namani? Lelo Yesu wādi unena’mba bengidi bandi bashingwe māni bavule bakekala bampikwa kikōkeji ne kupingakanibwa? Mhm. Vuluka’mba wādi’tu udyumuna wandi “umpika mukōkele ne mudyumuke” aleke kwikala umpika umbi. Kino kekyādipo kishintulula’mba wādi usaka bikale namino. Mo monka, luno lukindi lwitupa  kidyumu kikatampe. Monka mwāikadile bajike batano bendalale ne batano badyumuke, mushingwe māni yense udi na bukomo bwa kutonga kwikala mwiteakanye ne mutadije nansha kwikala mwendalale ne kubulwa kikōkeji. Mutumibwa Polo wāpelwe bukomo bwa mushipiditu pa kunena myanda imo yonka kitatyi kyaālembele banababo bene Kidishitu bashingwe māni. (Tanga Bahebelu 6:4-9; enzankanya na Kupituluka 30:19.) Yuka’mba kidyumu kya Polo kyādi kisumininwe, inoko wālondeje’po binenwe bya buswe bya kikulupiji amba, “bintu bilumbuluke” bitengele batutu ne bakaka wandi bene Kidishitu kumeso. Muswelo umo onka, kidyumu kya mu lukindi lwa Yesu kyaletelwe na kikulupiji kya buswe. Kidishitu uyukile’mba mwingidi wandi yense mushingwe māni ubwanya kwikala nyeke na kikōkeji ne kutambula mpalo ya nsangaji!

¹⁴ Yesu byāesambīle pa lukindi lwa bajike dikumi pa balondi bandi bashingwe māni, le tufwaninwe kufula ku kunena’mba musapu walo keudipo na kamweno ku “mikōko mikwabo” ya Kidishitu? (Yoa. 10:16) Aa! Vuluka’mba, musapu wa mu lukindi i upēla wa amba: “Keshai’nka kukesha.” Le kino kitala’nka bashingwe māni? Yesu wānene dibajinji amba: “Kyokya kyonemunena, nanena’kyo ne ku bonsololo amba: Keshai’nka kukesha.” (Mako 13:37) Yesu unena balondi bandi bonso bateakanye mityima yabo mu mwingilo wa kikōkeji ne kufikila pa musoñanya umo onka wa kukesha. Nanshi bene Kidishitu bonso balondanga kimfwa kya bashingwe māni mu uno mwanda, beula kimfwa kyabo kiyampe ne kutūla mwingilo wa busapudi pa kifuko kibajinji mu bwabo būmi. Muntu ense mu bukata mwetu ufwaninwe kuvuluka’mba bajike bendalale bālombele bajike badyumuke bebape’ko māni abo. Kulomba kwabo kwa mu bitupu kwituvuluja’mba kekudipo muntu ubwanya kwikala wa kikōkeji pa kyetu kyaba, ubwanya kwikala mu bubinebine pa kyetu kyaba nansha ubwanya kwendelela kukesha pa kyetu kyaba. Muntu ne muntu ukeshintulwila kudi Mutyibi moloke utongelwe na Yehova. Tufwaninwe kwikala belongolole. Bine, nandi wiyanga panopano ponka!

15. Mwanda waka butundaile bwa Kidishitu na mutundaile wandi bukaleta byabuyabuya ku bene Kidishitu bonso ba bine?

¹⁵ Kadi bene Kidishitu bonso bakokeja kumwena mu kinkumenkume kikatampe kya mu lukindi lwa Yesu. Shi ke pano, i ani motudi kasangedilepo pa buno butundaile bulumbuluke? Bashingwe māni bakenda mūlu; pa kupwa kwa divita dya Amakedona, bakekala bu mutundaile wa Kidishitu. (Kus. 19:7-9) Ebiya, bonso bakekala pano pa ntanda bakamwena mu buno butundaile bwa momwa mūlu, mwanda bukaleta umbikalo mubwaninine ku bonso. Ekale tudi na lukulupilo’ka lwa mu mafuku a kumeso, lwa kwenda mūlu nansha lwa kwikala pano pa ntanda, tusumininwei kwifunda bufundiji bukatampe budi mu lukindi lwa bajike dikumi. Shi ke pano, twilombolei amba twi belongolole na kuteakanya mityima yetu ne kwimanija nshinkidingi, kwikala batadije bininge, namino tukekala na būmi bwa kumeso bwa kutendelwa bwitutūdile Yehova!