1, 2. Le bengidi ba Yehova badi na mumweno’ka?

BENGIDI ba Yehova batengelanga na kitūkijetyima kufikidila kwa bupolofeto. Kimfwa, Yelemia wākungile amba bene Babiloni bākonakanya Yuda, ne kino kyāfikidile mu 607 K.K.K. (Yelemia 25:8-11) Isaya wātobele butobo amba Yehova ukajokeja mu Yuda Bayudea bāselwelwe bu misungi ne kunena amba: “Beselwe dyese bonso bamukungilanga.” (Isaya 30:18) Mika nandi wākungile amba milao ya Yehova ikafikidila binebine ne kunena amba: “Ami nami nkatala kudi Yehova.” (Mika 7:7) Kadi mu bula bwa myaka tutwa na tutwa, bengidi ba Leza badi bakulupile amba Meshiasa nansha Kidishitu wālailwe ukāya.—Luka 3:15; 1 Petelo 1:10-12. * (Tala kunshi kwa dyani.)

² Dyalelo, netu tutengele muswelo umo onka kufikidila kwa bupolofeto butala pa Bulopwe bwa Yehova. Yesu Mulopwe wa buno Bulopwe, usa panopano ponka kunyongolola bengidi ba Leza mu ino ntanda imbi. Ukonakanya bantu babi ne kutalula’ko masusu onso. (1 Yoano 5:19) Nanshi tufwaninwe kwendelela kukungila difuku dya Yehova dibwanya kufika kitatyi kyo-kyonso ne kulonga byonso byotubwanya mwanda wa kwikala beteakanye.

3. Shi twadi tutengele kufika kwa mfulo pano kepadi myaka mivule, lelo i bika byotubwanya kwiipangula?

 ³ Tutengele bininge difuku dikalongeka kiswa-mutyima kya Leza pano pa ntanda. (Mateo 6:10) Ino shi twadi tutengele kufika kwa mfulo pano kepadi myaka mivule, tubwanya kushilula kwiipangula amba, ‘Mwanda waka tufwaninwe kwendelela kukungila kwiya kwa mfulo yafwena’i?’

4. Mwanda waka i kya mvubu kotudi twendelele na “kukesha”?

⁴ Yesu wāsoñenye balondi bandi amba “keshai’nka kukesha” ne amba “kemwakilālai.” O mwanda i kya mvubu kotudi kwendelela kukungila kwiya kwa mfulo yafwena’i. (Mateo 24:42; Luka 21:34-36) Kadi, bulongolodi bwa Yehova bwituvulujanga nyeke ‘kutengela ne kulama nyeke mu ñeni kitatyi kya kwikala’po kwa difuku dya Yehova’ ne kuta mutyima ku mulao wa Yehova utala ntanda impya.—Tanga 2 Petelo 3:11-13.

5. Le i bubinga’ka bukwabo botubwaninya kwendelela kukungila difuku dya Yehova?

⁵ Shi balondi ba Yesu ba mu myaka katwa kabajinji bādi banenwe kukungila difuku dya Yehova, nankyo batwe bobene. Mwanda waka? Mwanda kiyukeno kyāletele Yesu kilombola amba i Mulopwe wa Bulopwe bwa Leza tamba mu 1914 ne amba tudi mu mafuku a mfulo nansha “mvuyo ya ngikadilo ya bintu.” Kimfwa, monka mwālaile’kyo Yesu, ngikadila ya ntanda i mibipile’ko ne myanda miyampe ya Bulopwe nayo isapulwanga pano pa ntanda ponsololo. (Mateo 24:3, 7-14) Yesu kātelelepo bula bwa mafuku a mfulo, o mwanda tufwaninwe kwiteakanya ku mfulo ibwanya kwiya mu kitatatyi kyo-kyonso.

6. Le tubayuka namani amba ngikadila ya ntanda ikabipila’ko potwenda tufwena ku mfulo?

⁶ Bible unena amba bantu bakabipila’ko kutabuka “mu mafuku a mfulo.” (2 Temote 3:1, 13; Mateo 24:21; Kusokwelwa 12:12) Nanshi nansha shi bintu i bibipe pano, tuyukile amba bikendelela kubipila’ko. Le “mvuyo ya ngikadilo ya bintu” ifunkila pa kitatyi kya kumeso kikabipila’ko ntanda bininge?

7. Lelo Mateo 24:37-39 witufundija bika pa bitala ngikadilo ya ntanda mu mafuku a mfulo?

⁷ Bamo bakokeja kulanga amba kumeso kwa “kyamalwa kikatampe,” kukekala divita mu ntanda ne ntanda ne amba bantu bavule bakabela ne kufwa nzala. (Kusokwelwa 7:14) Shi bikale namino, nabya muntu yense ukajingulula kufikidila kwa bupolofeto bwa mu Bible. Enka ne bantu kebasenswepo Bible badi bakwibumona. Ino Yesu wānene amba mu mafuku a mfulo, bantu bavule ‘kebakate’kopo mutyima.’ Bakendelela kwikala enka mobekadilanga nyeke ne kufitwa pakafika difuku dya Yehova. (Tanga Mateo 24:37-39.) Na bubine, ketufwaninwepo kutengela enka ngikadilo ya ntanda ibipile’ko bininge kumeso kwa “kyamalwa kikatampe” kushilula.—Luka 17:20; 2 Petelo 3:3, 4.

8. Byotudyumwinwe kala na kiyukeno kya Yesu, le i bika byotukulupile?

⁸ Kiyukeno kyāletele Yesu kyādi kidyumu kya patōkelela ku balondi bandi mu abo mafuku. Balondi ba Yesu bādi badyumunwe. (Mateo 24:27, 42) Tamba mu 1914, bipindi palapala bya mu kiyukeno kya Yesu byashilwile kufikidila. Tukulupile’mba tudi ku “mvuyo ya ngikadilo ya bintu.” Yehova i mutunge kala kitatyi kyakonakanya ntanda imbi ya Satana.

9. Mwanda waka tufwaninwe kukungila kwiya kwa mfulo yafwena’i?

⁹ Ino mwanda waka tufwaninwe kukungila kwiya kwa mfulo yafwena’i? Mwanda tukōkele Yesu Kidishitu. Kadi tumwene patōkelela amba kiyukeno kya Yesu kitala pa mafuku a mfulo i kifikidile. Tukulupile amba mfulo ibafwena, kepamwandapo’tu  twitabijanga byonso byotwivwana, ino i pa mwanda tukulupile amba bupolofeto bwa mu Bible bufikidilanga. Tufwaninwe kuta’ko mutyima ne kwikala beteakanye ku mfulo iya’i.

10, 11. (a) Mwanda waka Yesu wānene bandi bana ba bwanga amba “keshai’nka kukesha”? (b) Lelo i bika byānene Yesu balondi bandi kulonga shi mfulo keifikilepo bukidibukidi na mobadi balangikila? (Tala kifwatulo ku ngalwilo.)

¹⁰ Bavule mu bukata mwetu kebengidile Yehova na kikōkeji ne kutengela kwiya kwa difuku dyandi mu bula bwa myaka mivule. Ino nansha shi ketudi batengele mu bula bwa kitatyi kilampe namani, tufwaninwe kwendelela kukungila kwiya kwa dino difuku dyafwena’di. Tufwaninwe kwikala beteakanye ku kitatyi kisa kwiya Yesu konakanya ntanda ya Satana. Vuluka byānene Yesu balondi bandi kulonga, wānene amba: “Talai’nka kutala, kemwakilālai, mwanda kemuyukilepo kitatyi kitungwe pokikafika. Bidi pamo’nka bwa mwana-mulume umo wenda lwendo lulampe, washiye njibo yandi ne kupa bapika bandi lupusa, muntu ne muntu mwingilo wandi, kadi wasomanya kalama wa pa kibelo akeshe’nka kukesha. Penepo nanshi keshai’nka kukesha mwanda kemuyukilepo kitatyi kīya Mwinē njibo, shi i kyolwa bininge, shi i pa bukata bwa bufuku, shi i ku mazolo, nansha i ku lubanga bwē, mwanda shi waiya mu kitulumukila, kakimutana mulēle. Ino kyokya kyonemunena, nanena’kyo ne ku bonsololo amba: Keshai’nka kukesha.”—Mako 13:33-37.

¹¹ Kitatyi kyaivwanije balondi ba Yesu amba washilula kubikala mu 1914, bajingulwile’mba mfulo ibwanya kufika kitatyi kyo-kyonso. O mwanda beteakenye’ko na kulonga bivule mu mwingilo wa busapudi. Yesu wānene amba ubwanya kwiya nsá kemipite, ‘ku mazolo, nansha ku lubanga bwē.’ Shi byaikele namino, le balondi bandi badi banenwe kulonga bika? Yesu wānene amba: “Keshai’nka kukesha.” Nansha shi tubamone amba tubailaija kitatyi kekilampe, kino kekilombolapo amba mfulo idi kulampe nansha amba keikafikapo mu kino kyetu kitatyi.

12. Le Habakuka wāipangwile Yehova bika, ne Yehova wāmulondolwele namani?

¹² Mupolofeto Habakuka wātengele na kitūkijetyima paādi usapula bonakani bwa Yelusalema. Bapolofeto bakwabo bamubadikidile nabo basapwile uno musapu mu bula bwa myaka mivule. Habakuka wāmwene’mba kudi bubi ne bukondame buvule kutabuka. Wālomba Yehova bukwashi na kwipangula amba: “A Yehova, i ku mwaka ka o nkakwabija?” Nansha Yehova byākalombwelepo kitatyi kikafika mfulo, wālaile Habakuka amba: “Kekikejepo, mhm.” Kadi Yehova wāsapwila Habakuka amba “kunga’kyo.”—Tanga Habakuka 1:1-4; 2:3.

13. Le i bika byādi bibwanya kulanga Habakuka, ne mwanda waka kulanga namino kwādi kubwanya kuleta kyaka?

¹³ Langa’po bidi shi Habakuka wākōkele  kukungila mfulo ne kunena amba: ‘Nakungila bonakani bwa Yelusalema mu bula bwa myaka na myaka. Mfulo ibaije. Nkikisapulapo uno musapu. Bakwabo bāye basapule’o.’ Le byādi bya kwikala namani shi wālangile uno muswelo? Kādipo wa kwitabijibwa na Yehova. Kadi shi kādipo mwiteakanye ku kwiya kwa mfulo wādi wa kufwa.

14. Mwanda waka tufwaninwe kufwija’ko Yehova pa kwitudyumuna twendelele kukungila mfulo?

¹⁴ Wimone’po bidi udi mu ntanda impya. Binkumenkume byonso byālailwe bitala pa mafuku a mfulo bilongeke monka mwēbinenene Yehova. Ukulupile mudi Yehova bininge, kadi ukulupile na mutyima obe onso amba ukalonga kintu kikwabo kyo-kyonso kyalaile. (Tanga Yoshua 23:14.) Kadi ufwijanga’ko Yehova pa kutūla kwatūdile’ko kitatyi kya kuleta mfulo ne pa kudyumuna bantu bandi bendelele kwiikungila.—Bilongwa 1:7; 1 Petelo 4:7.

15, 16. Mwanda waka tufwaninwe kulonga byonso byotubwanya mu mwingilo wetu wa busapudi mu kino kitatyi kya mfulo?

¹⁵ Bulongolodi bwa Yehova bukendelela kwituvuluja tute mutyima ku kwingidila Yehova. Bivulujo bitukwashanga twendelele kuvudilwa bya kulonga mu kwingidila Leza ne kumona patōkelela amba musapu wetu i wa kampeja-bukidi. Tukulupile’mba kiyukeno kya Yesu kifidilanga pano ne amba mfulo isa kufika panopano ponka. O mwanda tutulanga Yehova pa kifuko kibajinji mu bwetu būmi ne kwendelela kusapula myanda miyampe ya Bulopwe.—Mateo 6:33; Mako 13:10.

¹⁶ Kitatyi kyotusapwila bantu bakwabo myanda miyampe, twibakwashanga bapande ku mfulo ya ntanda ya Satana īya panopano. Kyamalwa kimo kibi kyalongekele mu 1945 pa dijiba, kitatyi kyalobele kyombo kya Wilhelm Gustloff. Bantu tununu ne tununu bafwa. Kaka umo ne wandi mulume bapandile ku kino kyamalwa. Kaka uvuluka amba nansha padi kepalobela kyombo, mwana-mukaji umo wadi udila’nka kudila amba: “Yō masakoshi ami a bisandi! Yō masakoshi ami a bisandi! Yō ne malungo mene ami abulēme! Malungo ami onso a bulēme adi munshi mu kobo ka kyombo. Najimija byami bintu byonso!” Ino Bantu bakwabo mu kyombo bajingulwile kintu kya mvubu  mikatampe, ebiya balonga bukomo bwa kupandija myuya ya bantu. Dyalelo būmi bwa bantu budi mu kyaka. Tunenwe netu kwikala bwa bano bantu bakwabo badi mu kyombo bampikwa mutyima wa kwisakila ne kumona mwingilo wetu wa busapudi bu wa kampeja-bukidi. Tufwaninwe kulonga byonso byotubwanya mwanda wa kukwasha bantu bakapande ku mfulo ya ino ngikadilo ya bintu.

17. Mwanda waka tufwaninwe kukulupila’mba mfulo ibwanya kufika kitatyi kyo-kyonso?

¹⁷ Twi bamone patōkelela amba bupolofeto bwa mu Bible bufikidilanga ne amba mfulo ya ino ngidadilo imbi ya bintu keidi mu bisuku. Tutengele kitatyi “masengo dikumi” ne “kinyema kya ntanda” pobikatamba mutōtelo wa bubela, ke Babiloni Mukatampe kadi. (Kusokwelwa 17:16) Ketufwaninwepo kulanga’mba kukidi kitatyi kilampe kumeso kwa kino kulongeka. Bine, ketufwaninwepo kwilwa amba Leza ‘ukatūla’kyo mu mityima yabo’ kukatamba mutōtelo wa bubela ne amba kino kikalongeka bukidibukidi kadi mu kitatyi kyo-kyonso! (Kusokwelwa 17:17) Ntanda imbi ya Satana isa kufula panopano ponka. Nanshi tufwaninwe kukōkela ku kidyumu kya Yesu kya amba: “Dyumukai banwe bene kutyina’mba mityima yenu yakalēmenenwa na mudīlo-mpata, na mutomeno-mpata, ne na makambakano a mu būmi, kadi dyodya difuku dyakemukwata bukidi bonka mu kitulumukila pamo bwa dikinga.” (Luka 21:34, 35; Kusokwelwa 16:15) Tushalei nyeke batale ne kuvudilwa nyeke bya kulonga mu mwingilo wa Yehova, na kukulupila amba, ‘uloñanga bino bintu bino’bi ku yewa umukupile.’—Isaya 64:4.

18. Lelo i kipangujo’ka kikalondololwa mu kishinte kilonda’ko?

¹⁸ Pano potwilaije mfulo ya ino ntanda imbi, tufwaninwe kuteja madingi a mwanā bwanga Yude a amba: “A baswedibwe, mwitamijei banwe bene mu lwitabijo lujila nakampata kadi lombelai na mushipiditu ujila amba mwilame mu buswe bwa Leza, pomwilaija lusa lwa Mfumwetu Yesu Kidishitu pa mwanda wa būmi bwa nyeke.” (Yude 20, 21) Ino le i muswelo’ka otukalombola’mba tukungile ntanda impya ya Leza isa kwiya panopano ponka ne amba twiitengele? Tukabandaula uno mwanda mu kishinte kilonda’ko.