Lelo kulanga’mba bafwe bakekala kadi bōmi monka i kwikala bu kitabija-vidingi? Mutumibwa Polo kādipo ulanga namino. Wāsonekele ku bukomo bwa mushipiditu amba: “Shi tukulupile mudi Kidishitu enka pa mwanda wa buno būmi kete, nankyo tufwaninwe kudidilwa bulanda kupita bonso. Ino na bubine Kidishitu wasangwilwe mu bafwe, kyangulwa kibajinji kya boba balēle mu tulo twa lufu.” (1 Kodinda 15:19, 20) Polo wādi umwene lusangukilo bu ludi’ko bine. Kadi na bubine, kyāmupēle nkankamo i lusangukilo lwa Yesu. * (Bilongwa 17:31) O mwanda Polo utela Yesu bu “kyangulwa kibajinji”—mwanda ye wādi mubajinji kusangwilwa ku būmi bwa nyeke. Shi Yesu wādi mubajinji, nankyo kudi bakwabo bamulonda.

Tala bubinga bukwabo bobwanya kukulupidila mu lusangukilo. Yehova i Leza wa bubine. “Leza . . . aye kabwanyapo kubepa.” (Tetusa 1:2) Yehova kabepele kashā ne kakabepangapo nansha dimo. Lelo ubwanya kuleta lukulupilo lwa lusangukilo ne kulombola’mba ukokeja kwilufikidija, ino waleka kufikidija’lo? Kebikokejikapo!

Mwanda waka Yehova i mutūle’ko mpangiko ya lusangukilo mu mafuku āya kumeso? I pa mwanda wa buswe bwandi. Yoba wāipangwile’mba, “shi muntu afwe, ekale mūmi monka’ni, a? . . . shi abe ukēte, nankyo nka kwitaba; nansha ukekalanga ne mutyima wa kuloelelwa ku mīngilo ya obe makasa.” (Yoba 14:14, 15) Yoba wādi ukulupile’mba Shandi wa mūlu wa buswe udi na mēlu a kumusangula. Lelo Leza waalamuka? “Amiwa Yehova nkyalamukangapo.” (Malaki 3:6) Ne pano pene Leza uloelelwe kumona monka bafwe ke bōmi, bakomo nkē kadi mu nsangaji. Kino kidi’nka na musakilanga mbutwile wa buswe  ufwidilwe mwana. Shako kwishila i kuno, Leza aye udi na bukomo bwa kulonga byasaka. (Ñimbo 135:6).

Yehova ukapa wandi Mwana bukomo bwa kuletela nsangaji mivule boba badila baswe babo bafwile. Ino le Yesu umonanga namani lusangukilo? Yesu kumeso kwa kusangula Lazalasa, wāmwene bulanda bwādi na bakaka wandya Lazalasa pamo ne balunda nandi, ebiya “wasūmija impolo.” (Yoano 11:35) Mu kitatyi kikwabo, Yesu wētene na mwana-mukaji wa kishala wa ku kibundi kya Neni, wāfwidilwe wandi mwana umo kete mwana-mulume. Yesu “wamukwatyilwa lusa, kamunena’mba: ‘Leka kudila.’” Ponka’po wāsangula wandi mwana. (Luka 7:13) Nanshi Yesu uteñwanga bininge na njia ne lufu. Yesu ukevwana nsangaji bininge kitatyi kyakaletela bantu maloa pa kyaba kya njia!

Lelo ulwanga na njia? Shi i amo, ubwanya kulanga’mba lufu kelubwanyapo kupwa. Inoko, kudi kapwa-bijo—ketwa bu lusangukilo kene kakaletwa na Leza kupityila padi wandi Mwana. Vuluka’mba Leza ukusakila wimwene kano kapwa-bijo. Ukusakila ukatundaile monka baswe bobe. Wimone’po bidi mushikete pamo mu būmi bwa nyeke bwiya kumeso, kekukidipo kadi kwishiya na baswe bobe!

Lionel, utelelwe ku ngalwilo, unena amba: “Mfulo mfulō, nefundile myanda itala lusangukilo. Dibajinji, nkyadipo mbwanya kwitabija’byo, kadi nkyadipo nkulupila muntu wadi unombola ino myanda. Ino nabandawile’yo mu Bible najingulula’mba i ya bine! Ntengele na kipyupyu kumona nkambo wami monka.”

Lelo usaka kuyukila’ko bivule? Batumoni ba Yehova bakasangela kukulombola mu Bible obe kine kyobakulupidile mu lusangukilo lwiya kumeso. *