MALONDOLOLO A MU BIBLE: “Nsá īyanga, boba bonso badi mu bibundu bakevwana diwi [dya Yesu] dyandi ne kutamba bakatamba’mo.”—Yoano 5:28, 29.

Yesu wādi wisambila pa bikalongeka kumeso, mu buludiki bwa Bulopwe bwandi, kitatyi kikalupulwa bantu badi mu Kibundu. Fernando utelelwe mu kishinte kibadikile uvuluka amba, “Natulumukile kitatyi kyonatangile musunsa mubajinji kisonekwa kya Yoano 5:28, 29. Kyampele lukulupilo lwa bine, nashilula kumona būmi bwa kumeso biyampe.”

Mu myaka ya kala, Yoba mwana-mulume wa kikōkeji wādi utengele amba shi wafu, bine Leza ukamusangula. Yoba wāipangwile amba: “Shi muntu afwe, ekale mūmi monka’ni, a?” Kupwa wālondolola na kikulupiji kyonso amba: “Mafuku onso a bulwi bwami [kitatyi kyadi mu kibundu] nkungilanga, Poso’nka kukutululwa kwami kufike. Shi abe ukēte, nankyo nka kwitaba.”—Yoba 14:14, 15.

Mwanda wa lusangukilo kewādipo mwanda mupya kudi Mata kaka wandya Lazalasa. Lazalasa paāfwile, Yesu wāsapwidile Mata amba: “Mwanenu usa kusanguka.” Aye Mata kishima-tentu amba: “Ndyukile amba ukasangukanga ku lusangukilo mu difuku dya mfulo.” Ebiya Yesu wamusapwila amba: “Ami ne lusangukilo ne būmi. Yewa ulombola lwitabijo mudi ami, nansha wafwa, ukekala mūmi monka.” (Yoano 11:23-25) Ponka’pa Yesu wasangula Lazalasa! Ino mānga isangaja itupa ntompejo ya binkumenkume bya kutendelwa bikalongeka mu mafuku āya kumeso. Mona’po bidi bantu basanguka pano pa ntanda ponso!

MALONDOLOLO A MU BIBLE: Kinenwa kya Leza kilombola amba lusangukilo lwa Yesu i lwishile na lwa bantu mwānda batelelwe mu Bible. Bano bantu mwānda bāsangwilwe na būmi pano pa ntanda. Inoko tutanga pa mwanda utala lusangukilo lwa Yesu amba: “Yesu Kidishitu . . . udi ku kuboko kwa lundyo lwa Leza, mwanda waendele mūlu.” (1 Petelo 3:21, 22) Lelo Yesu ye muntu umo kete wadi ufwaninwe kusangwilwa mūlu? Yesu wāsapwidile kala batumibwa bandi amba: “Shi naenda kukemulongolwela kifuko, nsa kwiya monka kadi nkemutambulanga kwami, amba kokwa kondi nenu mwikale konka.”—Yoano 14:3.

Kidishitu wāendele mūlu kukalongololwela bandi bana ba bwanga bamo bifuko. Boba bakasangwilwa mūlu bakekala buvule bwa 144 000.  (Kusokwelwa 14:1, 3) Ino le i bika bikalonga’mo bano balondi ba Yesu ba pabwipi?

Bakekala na bivule bya kulonga! Bisonekwa bitulombola amba: “Wa katōkwe ne ujila i yewa ubadilwa mu lusangukilo lubajinji; pa bano lufu lwa bubidi keludipo na lupusa, ino bakekala babitobo ba Leza ne ba Kidishitu, kadi bakabikalanga bulopwe pamo nandi myaka 1 000.” (Kusokwelwa 20:6) Boba bakasangwilwa momwa mūlu bakaludika bu balopwe babitobo pamo na Kidishitu pano pa ntanda.

MALONDOLOLO A MU BIBLE: Mu Bisonekwa bya ku bukomo bwa mushipiditu mudi binenwa bya mutumibwa Polo bya amba: “Nkulupile mudi Leza, enka mukulupidile ne bano bantu bene, amba kukekalanga lusangukilo lwa boloke ne bakondame bene kumo.”—Bilongwa 24:15.

Lelo i bāni bakabadilwa mu kibumbo kitela Polo bu “boloke”? Tubandaulei’ko kino kimfwa. Danyele muntu wa kikōkeji wāsapwidilwe dya ku mfulo kwa būmi bwandi amba: ‘Ukakōlolokwa ne kukemana mu kifunda kyobe pa mfulo ya mafuku.” (Danyele 12:13) Le i kwepi kwādi kwa kulangukila Danyele mu tulo twa lufu? “Boloke bakapyananga ntanda, ne kwikala monka nyeke.” (Ñimbo 37:29) Kadi Yesu wālaile amba: “Ba katōkwe i ba ngikadila italala, mwanda bakapyananga ntanda.” (Mateo 5:5) Danyele pamo ne bana-balume ne bana-bakaji bakwabo ba kikōkeji bakasangulwa mwanda wa bekale monka pano pa ntanda, kadi nyeke na nyeke.

Lelo i bāni bakabadilwa mu kibumbo kitela Polo bu “bakondame”? I midiyo ne midiyo ya bantu baikele’ko pano pa ntanda ne kufwa, bavule bene kebāikelepo na mukenga wa kuteja ne kwingidija bubinebine bwa mu Bible. Pobakasangulwa, bakekala na mukenga wa kuyuka ne kusanswa Yehova * ne Yesu. (Yoano 17:3) Boba bonso baketabija kwingidila Leza bakekala na kyepelo kya kwikala na būmi kitatyi kyonso kikekala’ko Yehova—ko kunena amba bakekala’ko nyeke.

MALONDOLOLO A MU BIBLE: Leza “Ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” (Kusokwelwa 21:4) “Bakōbaka mobo ne kwikala monka; kadi bakadima madimi a mañanza ne kudya bipa byayo.”—Isaya 65:21.

Wimone’po bidi udi mu buno būmi na baswe bobe basanguke! Inoko kipangujo i kino amba, Le i muswelo’ka okokeja kukulupila amba lusangukilo lukekala’ko?