1, 2. Le Yehova i mwitufundije namani kumusanswa?

KULETA kimfwa o muswelo mulumbuluke ukokeja shabana kufundijija’mo bandi bana. Shi usenswe bana, nabya webafundija nabo kusanswa. I kutupu mukwabo witusenswe mwitusanshilwe Yehova, Tata wetu. Nanshi, tufundile kusanswa, “mwanda aye wetusenswe dibajinji.”​—1 Yoano 4:19.

² Lelo Yehova i mulombole namani amba “wetusenswe dibajinji”? Bible unena’mba: “Potwadi tukidi babipya-mambo, Kidishitu wetufwidile.” (Loma 5:8) Yehova, Tata wa buswe wētupele wandi Mwana bu kinkūlwa mwanda wa kwitukūla ku bubi ne lufu. Kino kyabuntu kilēme kyalengeje tufwene Yehova ne kulombola buswe botumuswele. Yehova wāletele kimfwa na kwela kino kitapwa kikatampe. I mwitufundije amba tufwaninwe kulombola buswe na kwipāna ne na kwikala na buntu.​—1 Yoano 4:10.

3, 4. Le tukalombola namani amba tusenswe Leza?

³ Buswe i ngikadilo mikatampe ya Yehova. O mwanda tubaimvwanija kine kyānenene Yesu amba kijila kikatampe i kino amba: “Sanswa Yehova Leza obe na mutyima obe onso, na muya obe onso, na ñeni yobe yonso, ne na bukomo bobe bonso.” (Mako 12:30) Yehova usakanga tumusanswe na ‘mutyima wetu  onso.’ Shi tubasanswa muntu kampanda nansha kintu kankenge kupita’ko Yehova, bine bimusansanga. Inoko ketufwaninwepo kumusanswa bya kitumbuzaji. Kadi Yehova usakanga umusanswe na “ñeni yobe yonso” ne na “bukomo bobe bonso.” Ko kunena’mba mu buswe botuswele Yehova mubadilwa ne muswelo otulangulukila pa bintu byotulonga.​—Tanga Mika 6:8.

⁴ Nanshi tufwaninwe kuswa Yehova na būmi bwetu bonso ne na bintu byetu byonso. Shi tumubadikije kumeso mu būmi bwetu, nabya tubalombola’mba bine tumusenswe. Mu kishinte kibadikile, twesambile’mo miswelo iná ilombola Yehova amba usenswe bininge bandi bana. Tumonei muswelo wa kulombola Yehova amba tumusenswe na kuningija buswe bwetu kwadi.

5. Potulangulukila pa byonso bitulongēle Yehova, le kino kitutononanga kulonga bika?

⁵ Shi abakupe kintu, ufwijanga’ko. Kadi byolēmekele kyabuntu’kya, wikingidijanga. Yakoba wāsonekele amba: “Kyabuntu kyonso kiyampe ne kya kupānwa kyonso kibwaninine kitambanga kūlu, kitūkanga kudi Shandya bitōkeji bya mūlu, aye kashintangapo nansha kwalamuka pamo bwa minjiñininya yalamukaalamuka.” (Yakoba 1:17) Tufwijanga’ko Yehova pa kwitupa bintu bitukwasha twikale bōmi kadi na nsangaji. Tumonanga mwaetuswidile, netu tusaka kulombola’mba tumusenswe. Le nobe ye molangila?

6. Le i bika byādi bifwaninwe kulonga bene Isalela pa kusaka’mba Yehova ebesele nyeke?

⁶ Yehova wāpele bene Isalela bintu bivule bilumbuluke. Myaka tutwa na tutwa wādi wibaludika na bijila byandi ne kwibapa byonso byobādi basakilwa mu būmi. (Kupituluka 4:7, 8) Bene Isalela nabo bādi bakokeja kufwija’ko Yehova na kukōkela bino bijila. Kimfwa, pobādi bela bitapwa, bādi bafwaninwe kumupa “bibajinji bya mulakisho bya ntanda.” (Divilu 23:19) Bene Isalela bādi bayukile amba Yehova ukebesela nyeke shi bamukōkele ne kumupa bintu byabo bya mulakisho [bitabuke kunengela].​—Tanga Kupituluka 8:7-11.

7. Le tukengidija namani “bintu” byetu bya bulēme pa kulombola Yehova amba tumusenswe?

⁷ Netu tukokeja kulombola Yehova amba tumusenswe na kumupa “bintu” byetu bya bulēme. (Nkindi 3:9) Tumulēmekanga na kumupa byobya byotudi nabyo. Kimfwa, tubwanya kutūla byabuntu bya kukwatakanya nabyo mwingilo wa Bulopwe mu kipwilo kyetu ne kujokoloka ntanda yonso. Twikale na bingi nansha bityetye, batwe bonso tubwanya kulombola amba tusenswe Yehova. (2 Kodinda 8:12) Ino kudi ne miswelo mikwabo ya kulombola Yehova amba tumusenswe.

8, 9. I muswelo’ka mukwabo otukokeja kulombola Yehova amba tumuswele? Le i bika byalongele ba Mike ne kyandi kisaka?

⁸ Yesu wētufundije kukimba bidi Bulopwe ne kuleka kuzumbija mutyima pa byakudya ne bivwalwa. Tata wetu i mwitulaye kwitupa byobya byotusakilwa. (Mateo 6:31-33) Tukulupile Yehova kadi tuyukile amba ukafikidija uno mulao. Ne kadi bidi, shi ubasanswa muntu kampanda, umukulupilanga. Kadi poenda ukulupila bininge Yehova, po pene ukamuswelelela. (Ñimbo 143:8) O mwanda tufwaninwe kwiipangula’mba: ‘Lelo mpangiko yami ne muswelo oñingidija kitatyi ne bukomo bwami bilombola’mba bine nsenswe Yehova? Le nkulupilanga Yehova avuije bisakibwa byami difuku ne difuku?’

⁹ Mike ne kyandi kisaka bakulupile Yehova. Mike paadi mwanuke, wadi wabila nyeke kukasapula mu ntanda ya bweni. Nansha ke paasongele waikala na bana babidi wadi ukidi’nka na uno mutyima. Mike ne kisaka kyandi pa kutanga nsekununi ya batutu ne bakaka bakengile kokwa kusakilwa  basapudi, bakwata butyibi bwa kupēleja būmi bwabo. Bapotoloja yabo njibo ne kuvilukila mu kobo katyetye. Kadi Mike watyepeje ne buvule bwa mwingilo waadi nao wa kukundula bintu ko kumona wamona kyaba kya mwa kwiuvilwila mu ntanda mikwabo kupityila ku Entelenete. Ku mfulo, Mike ne kisaka kyandi babwenye kuvilukila mu ntanda ingi, ne kukengila bininge mwingilo wa busapudi. Mike unena’mba, “Twemwenine bubinebine bwa binenwa bya Yesu bidi mu Mateo 6:33.”

10. Mwanda waka i biyampe tulangulukile pa byobya byotwifunda padi Yehova na mwālongele Davida?

¹⁰ Mulopwe Davida wālembele amba: “Madiulu ēlanga lubila lwa ntumbo ya Leza; kadi diulu nadyo dilombolanga mīngilo ya makasa andi.” Wābweja’ko amba: “Mukanda-wabijila wa Yehova i mubwanininye wa kwalwija muya; busapudi bwa Yehova i busumininwe, budyumuna bendalale ke badyumuke.” Kulangulukila pa bijila bilumbuluke bya Yehova ne pa bupangi bwandi bunengele kwālengeje Davida afwene kudi Yehova ne kumulombola’mba umuswele. Davida wānene amba: “Myanda ya kyakanwa kyami, ne mifwatakanyo ya mutyima wami, ītabijibwe kudi abe mu kifuko kyobe, Abe Yehova, kidibwe kyami, ne mukūdi wami.”​—Ñimbo 19:1, 7, 14.

11. Tukengidija namani buyuki bwitupele Yehova pa kumulombola’mba tumuswele? (Tala kifwatulo ku ngalwilo.)

¹¹ Dyalelo, Yehova witufundijanga bivule bitala padi, pa mpango, bupangi, ne pa Kinenwa kyandi. Ntanda ikankamikanga bantu kufunda, inoko masomo malamala ebalengejanga divule baleke kuswa Leza. Ino Yehova aye kasakangapo’tu twikale na buyuki kete, ino witukwashanga twikale ne na tunangu. Usaka twingidije byobya byotwifunda mwanda wa kwikwasha batwe bene ne bakwetu. (Nkindi 4:5-7) Kimfwa, witusakila tusapwile bakwabo “buyuki bwinebwine bwa bubine” ne kwibakwasha amba bapande. (1 Temote 2:4) Tumwekejanga buswe botuswele Yehova ne bakwetu na kufundija bantu bintu bitala pa Bulopwe bwa Leza ne byobya byobukebalongela.​—Tanga Ñimbo 66:16, 17.

12. Le i bika byanene nkasampe umo mwana-mukaji bitala pa kyabuntu kitamba kudi Yehova?

¹² Bankasampe nabo babwanya kulangulukila pa byonso bibalongēle Yehova ne byaebafundije. Shannon ukivulukanga kitango kyobatenwe’ko na nkasandi mwana-mukaji, papo aye na myaka 11, nkasandi nandi na myaka 10. Mu kipindi kimo kya ku Kitango kya Distrike kinena’mba, “Kwipāna kwa Bwine Leza,” balombele bankasampe bonso, kubadila’mo ne Shannon pamo  ne nkasandi bakashikate pa kifuko kya pa bula. Ku ngalwilo bidi byamutulumuna. Ino amba atale bankasampe bonso bebapa dibuku Les jeunes s’interrogent​—Réponses pratiques. Lelo kino kyabuntu kilumbuluke kyamutonwene amone Yehova namani? Unena’mba: “Ye ponamwene amba Yehova udi’ko bine ne kadi amba unswile bininge, bininge nakampata. Bine i nsangaji’po kashā pa kumona’mba Yehova, Leza wetu mukatampe wetupe na mutyima tō kino kya kupānwa kiyampe kadi kibwaninine!”

13, 14. Le tukalonga namani shi Yehova wetudingila, ne mwanda waka?

¹³ Bible wituvuluja’mba: “Mwanda yewa musanshibwe na Yehova umudingilanga, pamo’nka bwa shamuntu ne mwanandi waloelelwe.” (Nkindi 3:12) Potwitabija madingi a Yehova ne kumuleka etufundije, ye potuyukanga kulonga kyokya kiyampe ne kwikala na ndoe. Shako, “i kutupu kulemununwa kumwekanga bu kusangaja mutyima mu kitatyi’kya, ino kusanshijanga mutyima.” (Bahebelu 12:11) Nansha nankyo, le tukalonga namani shi Yehova wetudingila? Ketufwaninwepo nansha dimo kupumpunya madingi a Yehova nansha kwendelela kukalala potwimvwana byobya byoketusenswepo. Tusenswe Yehova, o mwanda tumutejanga ne kushinta popa petusakila kushinta.

¹⁴ Mu mafuku a Malaki, Bayuda bavule bāpelele kuteja Yehova. Bāpela kwitabija’mba bitapwa byabo kebimusangajangapo. O mwanda Yehova wēbapele madingi makomo pa uno mwanda. (Tanga Malaki 1:12, 13.) Bine, Yehova wādi wibadingila kyaba ne kyaba ino abo kuteleka mpika. Ko kwibanena’mba: “Nkatuma mafingo ko mudi, kadi nkafinga madyese enu.” (Malaki 2:1, 2) Kino kibalombola’mba shi tupele nyeke kuteja madingi a Yehova ne kwiamona bu keadipo na mvubu, tukajimija kipwano kyetu nandi.

15. I milangwe’ka yotufwaninwe kwepuka?

¹⁵ Ntanda ya Satana ikankamikanga bantu bekale na mitatulo ne mutyima wa kwisakila. Bavule kebasakangapo kulemununwa nansha kulombolwa kya kulonga. Bamo bemvwananga madingi mwanda’tu abamuningila’o. Ketufwaninwepo kwikala namino. Bible witusoñanya tuleke “kwiula ino ngikadilo ya bintu.” Ino, tufwaninwe kwimvwanija kisaka Yehova kotudi ne kulonga bimusangaja. (Loma 12:2) Witudingilanga kupityila ku bulongolodi bwandi  mu kitatyi kifwaninwe. Kimfwa, tudyumunwanga mwa kwikadila na muntu wa ngitu ingi, mwa kutongela balunda, ne mwa kutongela bya kwipwija nabyo mukose potutūja. Shi twitabije na mutyima tō madingi a Yehova kupwa twashinta, tumusangajanga, kadi tulombolanga amba tudi na mutyima wa kufwija’ko pa buludiki bwandi ne amba tumusenswe binebine.​—Yoano 14:31; Loma 6:17.

16, 17. (a) Mwanda waka tufwaninwe kukimba bidi mulangila Yehova kumeso kwa kukwata butyibi? (b) I bika byālongele bene Isalela pa kyaba kya kukulupila Yehova?

¹⁶ Bana batyetye bakulupilanga bambutwile babo bebakwashe ne kwibakinga. Enka ne batame babijanga bukwashi ku bambutwile babo. Bayukile amba nansha byobafwaninwe kwikwatyila butyibi, ino bambutwile babwanya kwibapa madingi mayampe. Yehova, Tata wetu witulekanga twikwatyile butyibi. Ino byotukulupile mwadi ne kumusanswa, tumulombanga nyeke bukwashi ne kukimba kuyuka byalanga pa butyibi botusaka kukwata. Shi tukulupile Yehova, uketupa mushipiditu wandi ujila witukwashe tulonge kyokya kyoloke.​—Fidipai 2:13.

¹⁷ Mu mafuku a Samwele, bene Isalela bānekenibwe na bene Fidishitia. Ino pa kyaba kya kulomba Yehova ebalombole kya kulonga, ke banena’mba: “Leka bidi tulēte ko tudi dikumbo dya kipwanino kya Yehova mu Shilo, amba difika mubukata mwetu ne kwitupandija mu kuboko kwa balwana netu.” Byāfula kwepi? “Ino kwādi kekutapwa-ikukunya’tu, kwapona ku ba Isalela tununu makumi asatu benda panshi. Kabidi dikumbo dya Leza dyakwatwa.” (1 Samwele 4:2-4, 10, 11) Bene Isalela bālangile amba kuselela’tu Dikumbo kobadi kukalengeja Yehova ebakwashe ne kwibakinga. Kebālombelepo Yehova bukwashi ne kukimba kuyuka mwalangila. Ino bālongele byobādi bamona’mba ye byoloke, ino bāmona dyemo.​—Tanga Nkindi 14:12.

18. Le Bible i mukufundije bika bitala kikulupiji kyobe mudi Yehova?

¹⁸ Mulembi wa mitōto wādi usenswe bininge Yehova ne kumukulupila wāsonekele amba: “Ukulapile mudi Leza; ke-ne-muntu ami nanshi nkamutendelanga pa mwanda wa bukomo bwa mpala yandi. Abe Leza wami, muya wami ubakālala munda mwami; E po nakuvulukila.” (Ñimbo 42:5, 6) Le nobe ye molangila padi Yehova? Le wimwene pabwipi nandi ne kumukulupila? Ubwanya kuyuka muswelo wa kumukulupila bininge. Bible witunena’mba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.”​—Nkindi 3:5, 6.

19. Le i muswelo’ka okalombola Yehova amba umusenswe?

¹⁹ Yehova byaetusenswe dibajinji, wetufundije mwa kumuswela. Tulangulukilei nyeke pa bintu bivule byaetulongēle ne pa muswelo waetusenswe bininge. Twendelelei kumulombola amba tumusenswe na mutyima wetu onso, na muya wetu onso, na ñeni yetu yonso, ne na bukomo bwetu bonso.​—Mako 12:30.