TAMBA mu 1992, Kitango Kyendeji i kipe bakulumpe batame ku mushipiditu kadi babwino mwanda wa kwibakwasha bavuije mwingilo wabo mu makomite. * (Tala kunshi kwa dyani.) Bano bakwashi ba mu “mikōko mikwabo,” bakwatakenye na mvubu Kitango Kyendeji. (Yoano 10:16) Batanwanga ku mīsambo ya yenga ne yenga ya mu komite mobengidila. Mwingilo wabo i wa kukongakanya myanda yonso isakibwa ne kuleta’po milangwe. Ba mu Kitango Kyendeji bo bakwatanga butyibi bwa mfulo, ne kadi bakwashi bakengelelanga shi myanda yanenenwe i milongwe. Bano batutu bavuijanga mwingilo o-onso obapelwe na mutyima tō. Bedanga na ba mu Kitango Kyendeji ku bitango bya pa bula ne bya matanda. Kadi babwanya kutumwa mwanda wa kukapempula mabilo a musambo bu mikendi ya kité.

Tutu umo waingile bu mukwashi tamba 1992 unena amba, “Kitatyi kyomvuija mwingilo wami, Kitango Kyendeji, akyo papo kitanga mutyima nakampata ku myanda ya ku mushipiditu.” Tutu mukwabo waingile bu mukwashi mu bula bwa myaka 20 unena amba, “I dyese dikatampe dyonkikokejapo kudingakanya na kintu kikwabo.”

Kitango Kyendeji i kipe bano bakwashi biselwa bivule ne kadi kibafwijanga’ko pa mwanda wa uno mwingilo mukomo obengidila banababo na kikōkeji. Nanshi batwe bonso ‘tupei bantu ba uno muswelo bulēme bukatampe.’​—Fidipai 2:29.