1. Lelo ngikadilo mikatampe ya Leza i ngikadilo’ka, ne kino kikutononanga umumone namani?

BIBLE witulombola amba, “Leza i buswe.” (1 Yoano 4:8) Lelo kino kishintulula na bubine bika? Buswe bubadilwa mu ngikadilo mivule miyampe ya Yehova. I ngikadilo yandi mikatampe. Kadipo’tu enka na buswe. Ino i buswe. Buswe buludikanga bintu byonso byalonga. Bine tufwijanga’ko pa buswe bwa Yehova bwāmutonwene apange diulu ne ntanda ne bintu byonso bidi’po!

2. Lelo buswe bwa Leza bwitupanga kikulupiji’ka? (Tala kifwatulo ku ngalwilo.)

² Yehova udi na kanye pa bupangi bwandi. Buswe bwaetuswele bwitukulupijanga amba mpango yandi pa muzo wa muntu ikafikidila na bubinebine. Boba bamukokele bakemwena byabuyabuya. Kimfwa, pa mwanda wa buswe Yehova “i mutūle’ko difuku dyalanga kutyibila ntanda ikelwe na bantu mambo mu boloke na muntu watongele,” ke Yesu Kidishitu kadi. (Bilongwa 17:31) Tukulupile’mba buno butyibi bukekala’ko. Kino kikekala kintu kya kutendelwa ku bantu ba kikōkeji bakekala’ko nyeke.

3. Lelo būmi bwetu bwadi bwa kwikala namani shi Leza kadipo uswele bantu?

³ Lelo būmi bwa bantu bwadi bwa kukekala namani shi Leza kadipo na ngikadilo mikatampe ya buswe? Bantu badi bakwendelela kwiludika abo bene pampikwa buswe na lupusa lwa Satana, leza wa mushikwa. (2 Kodinda 4:4; 1 Yoano 5:19; tanga Kusokwelwa 12:9, 12.) Bine, shi Yehova kadipo wituswele nankyo būmi bwetu bwa kumeso bwadi bwa kukekala bubi!

4. Mwanda waka Yehova wālekele butomboki pa buludiki bwandi?

⁴ Satana paātombokele buludiki bwa Leza, wāikele kadi kuningila bambutwile betu babajinji kutomboka. Waālakene buludiki boloke bwa Leza Mubikadi wa Diulu ne Ntanda. Satana wādi ufwatakanya amba buludiki bwandi i buyampe kutabuka bwa Leza. (Ngalwilo 3:1-5) Yehova wālekele Satana na tunangu kakitatyi katyetye aludike. Inoko na bubine bipa bilupukile’ko bilombola amba bantu nansha ke Satana kebabwanyapo kwikala baludiki bayampe.

5. Lelo i bika bilombola mānga ya muntu?

⁵ Dyalelo ntanda yendanga ibipila’ko. Kintu kya bantu midiyo 100 bafwile ku mavita mu myaka 100 ishele kunyuma’i. Bible wisambila pa “mafuku a mfulo” amba: “Babi ne bandimbañani bakabipila’ko kutabuka.” (2 Temote 3:1, 13) Kadi Bible unena amba: “A Yehova ngyukile’mba dishinda dya muntu kedidipo kwadi aye mwine, ehe; kekidipo mu muntu unañanga kolola matabula andi.” (Yelemia 10:23) Na bubine mānga ilombola patōka amba bino binenwa i bya bine. Yehova kāpangilepo muntu na bukomo bwa kwiludika aye mwine.

6. Mwanda waka Leza ulekele’ko bintu bibi?

⁶ Yehova pa kuleka babi bendelele kwikala’ko mu kitatyi kampanda, wālombwele kadi amba enka buludiki bwandi bo budi na bukomo. Kumeso kotwenda’ku, Leza ukonakanya babi bonso. Ebiya, i kutupu muntu nansha umo ukealakanya pa buswe ne buludiki bukaludika Leza biyampe. Ubwanya kwituvuluja kupityila ku mānga ya muntu amba i kutupu ntomboki nansha umo ukekala’ko. Bintu bibi kebikekala’kopo nansha dimo.

7, 8. Le Yehova ulombolanga namani buswe bwandi?

⁷ Yehova i mulombole buswe bwandi bukatampe mu miswelo mivule. Langulukila’po bidi pa bukata ne buya bwa diulu ne ntanda. I dibundwe na midiyala ne midiyala ya bisansa bya ñenyenye kadi kisansa ne kisansa kya ñenyenye mudi midiyala ne midiyala ya ñenyenye ne imbuo. Mubadilwa umbuo wetu, Mukambakamba wa ñenyenye, mutanwa ne dyuba. Pampikwa dyuba i kutupu kintu nansha kimo kibwanya kwikala’ko. Bino bipangwa byonso bilombola amba Yehova ye Umpangi wetu kadi bilombolanga ngikadilo yandi pamo bwa bukomo, tunangu, ne buswe. Bine, ngikadila ya Leza “yampikwa kumweka i mimweke patōka tamba ku kupangwa kwa ino ntanda, mwanda i mimwekelele mu bintu byalongele, enka ne bukomo bwa nyeke ne Buleza bwandi.”​—Loma 1:20.

⁸ Yehova wāpangile ntanda mwanda wa kwikala’po. Bine, bintu byonso bidi pano pa ntanda banyama ne bantu bimwenanga’mo. Leza wālongele kifuko kilumbuluke pa kwikala bantu ne kwibapa milangwe mibwaninine ne ngitu nayo yāpangilwe mwanda wa kwikala’ko nyeke. (Tanga Kusokwelwa 4:11.) Kadi, “upananga bidibwa ku nyema yonso; mwanda lusa lwandi i lwa nyeke.”​—Ñimbo 136:25.

9. Nansha Yehova byadi Leza wa buswe, lelo i bika byashikilwe?

⁹ Yehova i Leza wa buswe, ino ushikilwe bintu bibi. Kimfwa, Ñimbo 5:4-6 inena padi Yehova amba: “Ke-wi-muntu abe kudipo Leza wakuloelelwa impupa, . . . Ushikilwe bonso bakulonga bubi. Ukebonakanya babepa mabela; Yehova ushikilwe bwa kyamunyanji muntu wa mashi ne buñongojani.”

10, 11. (a) Lelo i bika bikafikila bantu babi? (b) Lelo Yehova ukapala mpalo namani bantu ba kikōkeji?

¹⁰ Yehova ukatalula’ko bintu bibi mu kitatyi kyandi kitungwe pano pa ntanda ponso mwanda i Leza wa buswe ne kadi ushikilwe bintu bibi. Kinenwa kya Leza kitulaya amba: “Bakulonga bibi bakatyibwako; ino boba batengele Yehova, abo bakapyana ntanda. Ke-kuntu kukidi bidi kitatyi kityetye, ne mubi ukēkala kutupu’ye.” Bakinkwa na Yehova “bakalotelela fututu.”​—Ñimbo 37:9, 10, 20.

¹¹ Kadi Kinenwa kya Leza kitulaya amba: “Boloke bakapyananga ntanda, ne kwikala monka nyeke.” (Ñimbo 37:29) Bantu ba kikōkeji “bakēsangaja mu bungi bwa ndoe.” (Ñimbo 37:11) Mwanda waka? Mwanda Leza wetu wa buswe usakilanga nyeke biyampe bengidi bandi ba kikōkeji. Bible witulombola amba: “Ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.” (Kusokwelwa 21:4) Bine, buno bukekala būmi bwa kutendelwa ku bantu ba kikōkeji bakemwena buswe bwa Leza!

12. Le “muntu mubwanininye” i muntu wa muswelo’ka?

¹² Bible witulombola amba: “Bambila muntu mubwanininye ubandile moloke swā! mwanda mfulo yandi yewa muntu i ndoe. Ino bakujilula abo bakonakanibwa pamo; mfulo ya babi īkatyibwangako.” (Ñimbo 37:37, 38) “Muntu mubwanininye” i yewa uyuka Yehova ne wandi Mwana ne kukōkelela ku kiswa-mutyima kya Leza. (Tanga Yoano 17:3.) Ukulupile na mutyima umo amba, “ino ntanda ipitanga ne bya kusakasaka byayo bine, inoko yewa ulonga kiswa-mutyima kya Leza udi’ko nyeke.” (1 Yoano 2:17) Mwanda mfulo ya ino ntanda i bafwena, o mwanda i kya kampeja-bukidi kotudi ‘kutengela Yehova, ne kulamata mu dishinda dyandi.’​—Ñimbo 37:34.

13. Lelo i kilongwa’ka kikatampe kya buswe bwa Leza?

¹³ Nansha byotudi bampikwa kubwaninina, inoko tubwanya kukōkela Leza. Kadi tubwanya kusamba kipwano kya pabwipi na Yehova pa mwanda wa kitapwa kya kinkūlwa kya Yesu, kilongwa kikatampe kya buswe bwa Leza. Yehova wāletele kinkūlwa mwanda wa bantu ba kikōkeji bamone mukenga wa kunyongololwa ku bubi ne ku lufu. (Tanga Loma 5:12; 6:23.) Yesu wādi ukōkele Leza mu bula bwa kitatyi kilampe momwa mūlu, o mwanda Yehova wādi ukulupile amba wandi Mwana ukashala nyeke mukōkele pano pa ntanda. Yehova byadi Tata wa buswe wātenekelwe pa mutyima pa kumona bantu babi basusula wandi Mwana. Inoko, Yesu wākwatakenye buludiki boloke bwa Leza na kikōkeji ne kulombola’mba muntu mubwaninine ubwanya kushala nyeke mulamate kudi Leza nansha shi watanwa mu makambakano makomo namani.

14, 15. Lelo lufu lwa Yesu i luletele bantu bika?

¹⁴ Yesu nansha byaātenwe na makambakano mavule, ino aye wāshele nyeke mulamate kudi Yehova ne kukwatakanya buludiki bwandi bwa Leza boloke. Bine, tufwijanga’ko Yesu mwanda kupityila ku lufu lwandi wāfutyile kinkūlwa kine kipele bantu mukenga wa kukekala na būmi bwa nyeke mu ntanda mipya ya Leza! Mutumibwa Polo ulombola buswe bwituswele Yehova ne Yesu kupityila ku kinkūlwa. Unena amba: “Potwadi tukidi bakōkekōke, Kidishitu wafwidile bantu ba kubulwa bwine Leza pa kitatyi kitungwe. Mwanda ke divulepo muntu kufwila moloke; ino na bubine, pa mwanda wa muntu muyampe, muntu ubwanya padi kusomonwa kumufwila. Ino Leza wetulombola buswe bwandi mu uno muswelo amba, potwadi tukidi babipya-mambo, Kidishitu wetufwidile.” (Loma 5:6-8) Mutumibwa Yoano wāsonekele amba: “Pano e pasokokēle buswe bwa Leza kotudi, mwanda Leza watumine wandi Mwana mubutulwe bunka mu ino ntanda amba tumwene būmi ponka padi aye. Buswe bwine  budi namino, ke kunenapo amba batwe twamusenswe Leza, ino amba aye wetusenswe watuma ne wandi Mwana bu kitapwa kya kupwanija pa mwanda wa bubi bwetu.”​—1 Yoano 4:9, 10.

¹⁵ Yesu wānenene amba “Leza byaasenswe ino ntanda bikatampe mpata, wapēne wandi Mwana mubutulwe bunka, amba ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) Nansha Yehova byaātenekelwe bininge pa mutyima, ino wāpēne wandi Mwana bu kinkūlwa. Kino kilombola muswelo wasenswe bantu bininge. Ne kadi buno buswe bukalādila nyeke ne nyeke. Polo wāsonekele amba: “Nkulupile na kusumininwa’mba nansha lufu nansha būmi nansha bamwikeulu nansha maludiki nansha bintu bidi’po pano nansha bintu bikāya’ko nansha bukomo nansha bula bwa mūlu nansha bula bwa munshi nansha kipangwa kikwabo shi kika, shi kika kebikakokejapo kwitusansanya na buswe bwa Leza budi mudi Kidishitu Yesu Mfumwetu.”​—Loma 8:38, 39.

16. Lelo Bulopwe bwa Kimeshiasa i Bulopwe’ka ne i ani Yehova waātombwele bu Muludiki wabo?

¹⁶ Umbikalo wa Leza, Bulopwe bwa Kimeshiasa, i bintu bilombola buswe bwa Yehova bwaswele bantu. Muswelo’ka? Yehova wātombwele kala Muludiki uswile bantu ne kadi i mubwanye bisakibwa bya kuludika, uno ke ungipo i Yesu Kidishitu. (Nkindi 8:31) Leza i mutonge bantu 144 000 kukaludika na Kidishitu mūlu. Pobakasangulwa bakevwanija bisakibwa bya bantu. (Kusokwelwa 14:1) Yesu paādi pano pa ntanda Bulopwe o wādi mutwe wa mwanda mukatampe mu bufundiji bwandi ne kadi wāfundije bana bandi ba bwanga kulomba amba: “Tata wetu wa mūlu, dijina dyobe dipandulwe. Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mateo 6:9, 10) Bine, tutengele malondololo a ino milombelo kitatyi Bulopwe bwa Leza kyo bukaletela bantu madyese mavule!

17. Leta kwishila kudi pa buludiki bwa Yesu ne bwa bantu.

¹⁷ Padi kwishila kukatampe pa buludiki bwa buswe bwa Yesu ne bwa bantu. Buludiki bwa bantu buletanga mavita mene epaya midiyo ne midiyo ya bantu. Ino Yesu Muludiki wetu, witusenswe ne kadi wiulanga ngikadilo milumbuluke ya Leza, kupityidila buswe. (Kusokwelwa 7:10, 16, 17) Yesu wānenene amba: “Iyai kondi banwe baputuma na mingilo ne balēmenenwe, nami nkemutūja. Selai lupungu lwami ne kuboila ñeni kondi, mwanda ndi na ngikadila italala ne mutyima wa kwityepeja, kadi mukamona kutūja kwa myuya yenu. Mwanda lupungu lwami i luyampe, ne kiselwa kyami nakyo i kipēla.” (Mateo 11:28-30) Bine, buno bo buswe’po bwitulailwe!

18. (a) Lelo i bika byalongekele mu 1914? (b) Lelo i bika byotukabandaula mu kishinte kilonda’ko?

¹⁸ Bible witulombola amba Bulopwe bwa Leza bwāshilwile kuludika mūlu mu 1914. Tamba penepa kwāikele kukongakanibwa kwa bashele’ko bakaludika na Yesu momwa mūlu ne kubungakanya “kibumbo kikatampe” kya bantu bakapita ku mfulo ya ino ngikadilo ne kutwela mu ntanda mipya. (Kusokwelwa 7:9, 13, 14) Lelo kino kibumbo i kibaye namani dyalelo? Lelo i bika bibalomba Leza? Kishinte kilonda’ko kikabandaula ino myanda.