Mu mafuku 18 Kweji 12, 2021, Tutu Dirk Grundmann, wingila mu Komite wa Musambo wa mu Bulaya bwa pa Bukata waelele lubila lwa kulupulwa kwa kipindi kibajinji kya Bible wa Bisonekwa Bijila—Bwalamuni bwa Ntanda Mipya mu ludimi lwa batumāma lwa mu Alemanye. Kubwipi kwa bantu 800 balondele ku video kulupulwa kwa mikanda ya mu Bible, wa Mateo ne wa Yoano.

Umbikalo wa Alemanye waitabije ludimi lwa batumāma lwa mwabo bu ludimi ke mu 2002. Ino Batumoni ba Yehova abo bengidijanga luno ludimi lwa mu Alemanye ku bitango bikatampe ne bityetye tamba mu myaka ya 1 960. Dyalelo mu Alemanye mudi basapudi 571 bengidija Ludimi lwa Batumāma mu bipwilo 11 ne bisumpi 21.

Uno o musunsa umbajinji walupulwa mikanda mituntulu ya mu Bible myalamwinwe mu Ludimi lwa Batumāma lwa mu Alemanye. Mafuku kunyuma, basapudi badi bekalanga’nka na mavese abala-anga alamwinwe ebakwasha mu kifundwa kya pa kasuku ne mu busapudi.

Musapudi umo wanenene amba: “Byokekwadipo mikanda ya mu Bible mituntulu poso’nka mavese palapala, o mwanda byadi bitukomena divule kusokola musoñanya wa mu Bible nansha kintu kya kubingija nakyo bufundiji. Kadi byadi bikomo ne kukankamika mwifundi abandaule mwanda kampanda wa mu Bible difuku ne difuku, ke-pantu kusokola’tu kipindi kampanda kya mavese a kutala nenki adi i makambakano.”

Mwalamuni umo wanenene amba: “Na bubine i kintu kitendelwa kotudi kwingila uno mwingilo wa kwalamuna Kinenwa kya Yehova, ke Bible kadi, amba babitwi bamone muswelo wa kupwana na Yehova. Twi basangale bininge pa kupebwa dino dyese dya kwingila uno mwingilo.”

Tulomba’mba Bible wa Bwalamuni bwa Ntanda Mipya mu Ludimi lwa Batumāma lwa mu Alemanye akwashe boba betyepeje bayuke mashinda a Yehova.—Ñimbo ya Mitōto 25:9.