Mu mafuku 16 Kweji 4, 2018, Kidye Kikatampe kya Azerbaidja kyaitabije butyibi bwa kidye kityetye bwa kufuta na kamweno ba Irina Zakharchenko ne Valida Jabrayilova pa mwanda wa kukutwa kobakutyilwe pambulwa mwanda mu myeji 11. Dibajinji, mu Kweji 2, 2017, Kidye Kikatampe kyalekele kulondalonda bano banabakaji babidi pa myanda ya kupāna mabuku a kipwilo pa kubulwa lupusa lwa Leta. Inoko, Kidye Katampe kyalekele bidye bya ba sivile bifute bano bana-bakaji.

Pa kupwa kubingijibwa, ba lolo Zakharchenko ne lolo Jabrayilova Batumoni ba Yehova bakanenene bidye bya ba sivile bibafute pa mwanda wa kususulwa kwabo. Mu Kweji 8, 2017, kidye kya ntanda kyebafuta na kamweno, ino balomba kubandaula monka uno mwanda kudi ba mu Mwingilo Utala Mfutwa ya bantu. Mu Kweji 11, 2017, kidye kyabandawile monka myanda, kyaitabija butyibi bwa kidye kya ntanda. Kadi bapela’bo kudi ba mu Mwingilo Utala Mfutwa ne kukatūla mwanda’wa ku Kidye Kikatampe mu Kweji 2, 2018. Kidye Kikatampe kyapela kusambija’o monka ne kunena bafute bano bana-bakaji babidi.

Kutentekela pa kwibafuta, Kidye Kikatampe kyaitabije amba balupusa basuswile ba lolo Zakharchenko ne lolo Jabrayilova na kwingidija lupusa lwabo ne kutyumuna byepelo bya bano bana-bakaji bambulwa mambo.