Mu mafuku 2 Kweji 4, 2018, Nursultan Nazarbayev, mulopwe wa Kazakista wafwidile lusa Teymur Akhmedov wa myaka 61, wadi mukutwe mu bula bwa mwaka ne kupita pa myanda ya bubela. Kufwilwa lusa kwafudije bisambo byonso. Mukelenge Akhmedov bamulombwele amba abamufwila lusa mu mafuku 4 Kweji 4, kadi buloko bwandi bwapwa paadi mupasulwe mu lupitalo. Pano udi na kyandi kisaka kadi ulondanga bundapi bwa misongo ya dyaya.

Mukelenge Akhmedov, Kamoni wa Yehova bamukwete ne kumukuta mu mafuku 18 Kweji 1, 2017, pa mwanda’tu wa kusapwila bakwabo nkulupilo yandi. Myeji mivule kumeso kwa kumukwata, wesambile myanda ya mu Bible na bantu badi bemwekeja bu basangedile nkulupilo ya Batumoni ba Yehova. Bano bantu badi bengila pamo na bampulushi ba mu bufyafya ba mu Kazakista, Kitango Kitala Mutyima-Ntenke wa Ntanda, kadi badi bakwata ku mawi byobadi besamba nandi. Pa mwanda wa bino byobadi bakwata, kino kitango kyakwete mukelenge Akhmedov, bamulambika’mba “ulengejanga bipwilo bikalañane” ne amba wadi unena’mba “kipwilo . . . kyabo i kipite bipwilo byonso,” binenwa bine bijilula Kijila kya 174(2) kya Kazakista kya kupēla muntu mfuto.

Pa kumukwata, baipangula mukelenge Akhmedov ne kumutûla mu kifungo mu myeji isatu kailaije kusambijibwa. Mu mafuku 2 Kweji 5, 2017, kidye kyamutyibila butyibi bwa kukutwa mu myaka itano ne kumukankaja mingilo ya kipwilo mu myaka isatu shi wakutululwa.

Baavoka ba mukelenge Akhmedov balombele misunsa mivule kusambijibwa monka mwanda wa kukutululwa kwandi, ino bidye byapela. Paapwile kutûla myanda ku bidye byonso bya mu Kazakista, wakasamba ku bidye bya matanda onso mwanda wa kukutululwa kwandi. Wakasambile ku Kisumpi kya ONU Kitala Mingilo ya Bantu Bakutyilwe Pampikwa Mwanda ne ku Kitango kya ONU Kitala Byepelo bya Bantu.

Mu Kweji 10, 2017, Kisumpi kya ONU kyatopeka Kazakista pa kukuta mukelenge Akhmedov ne kwibasoñanya bamukutulule bukidibukidi mwanda wadi wingila “mingilo ya ndoe ikwatañene na bwanapabo bwa kipwilo.” Mu Kweji 1, 2018, Kitango Kitala Byepelo bya Bantu kyaitabija kulomba kwa mukelenge Akhmedov, kyamupa bwanapabo bwa kitatyi kityetye ne kunena Kazakista akwate’ko mpangiko ya kumundapija bukidibukidi. Kadi Kitango Kitala Byepelo bya Bantu pokyadi kikungila butyibi bwa mfulo ku kisambo kya uno mukelenge, kyasoñenye Kazakista amukutulule lonso.

Paadi mukutwe, misongo ya mukelenge Akhmedov yadi iningila’ko. Ku ngalwilo kwa uno mwaka, bamuñanga bamulombwele amba udi na dyaya dya mu muongo kadi amba būmi bwandi busa kubipila’ko. Ebiya kukwatañana na bwanapabo bwa mu kitatyi kityetye bwamupele Kitango Kitala Byepelo bya Bantu ne kulomba kwaalombele ku bidye bya matanda onso, balupusa ba mu Kazakista banena mukelenge Akhmedov atumine Mulopwe Nazarbayev mukanda wa kumulomba lusa.

Wamutumina uno mukanda mu mafuku 5 Kweji 3, 2018, ne kulomba beubandaule bya bukidibukidi mwanda wa kundapibwa kutyina’mba dyaya dyakasambakana mu ngitu. Enka mu kitatyi kimo kyonka’kya balami ba kifungo batundulwila mukelenge Akhmedov ku Almaty mu Kazakista, kwine kobamupaswile mu mafuku 27 Kweji 3, 2018.

Mukelenge Akhmedov, wandi mukaji Mafiza ne bandi bana i basangēle kupwa kwa makambakano abo. Kadi bafwijanga’ko Mulopwe Nazarbayev pa kufudija bisambo byandi. Pobamukutyile pampikwa mwanda, buludiki bwafungile konte yandi ya banki, kadi kino kyasuswile bininge wandi mukaji kitatyi kyaadi mukutwe.

Batumoni ba Yehova bakulupile amba kufwilwa lusa kwa mukelenge Akhmedov kulombola’mba balupusa ba mu Kazakista basa kupa Batumoni bwanapabo bukatampe bwa kutōta mu ndoe kwampikwa kijika.