Mu kino kitatyi kidi’ko mavita a kwilwa kwa basivile mu République démocratique du Congo, i kupone kadi misongo mibi ya Ebola tamba mu Kweji 8, 2018. Lapolo ilombola’mba bantu kupita pa 1 088 i bakwatwe’yo, kadi bantu 665 abapu kala kufwa nayo mu mitamba ya Kivu wa Kungala ne mu Ituri. I kya bulanda kuyuka’mba banabetu nabo i batengwe na ino misongo. Musambo wa Congo (Kinshasa) unena’mba kudi banabetu batame 10 ne bana basatu bafwile na Ebola. Kudi ne tutu umo wakwetwe nayo, ino pano ke mukomo.

Musambo wa Congo (Kinshasa) wapelwe lupusa na Komite wa Bakwatakani lwa kuteakanya’ko video imo ya pa bula ne mwisambo mwanda wa kukwasha banabetu belame ku ino misongo. Mu video’ya mudi madingi a kamweno, kimfwa asoñanya kutūla’ko bipungwa bya koila’mo ku makasa, madingi alondelwe na bipwilo byonso. Kino kilongwa kya kamweno i kikwashe ku kutyepeja kusambuka kwa misongo. Kino kyalengeje ne mabilo abidi a Leta atala myanda ya bukomo bwa ngitu atumine bilo ya musambo mikanda ya kwibafwija’ko pa kimfwa kyabo kiyampe ne pa kikōkeji kya Batumoni ba Yehova mu kitatyi kiponene ino misongo ya Ebola.—Mateo 5:16.

Mu bibundi bimo, banabetu batūdilwe kufula kwa bunka mu bula bwa mayenga kampanda. Bilo ya musambo yanenene batadi 12 ba kipindi batundulule bitango byabo bya ntanda mwanda wa kutyina kwisambwila ino misongo. Musambo wakwete’ko ne mpangiko ya kunena bipwilo bitengelwe na ino misongo bilonde’tu ku mavideo mpangiko ya kitango kya ntanda mu Mobo abo a Bulopwe, mwanda wa kukwasha banabetu badye bidibwa bya ku mushipiditu.

Tukyendelela na kulombela pangala pa batutu ne bakaka ba mu République démocratique du Congo. Tukankamikwanga na lukulupilo lwa mu Bible lwitulaya kitatyi kya kumeso, kine kikatalulwa’ko misongo.—Isaya 33:24.