Kitango kya Watch Tower Bible and Tract Society of Pennsylvania kyalongele kupwila kwa pa mwaka kutala mingilo mu Njibo ya Bitango ya Batumoni ba Yehova ya mu Newburgh, New York, U.S.A, mu Dya Mposo, mafuku 5 Kweji 10, 2019. Pa kupwa kwisambila pa mingilo, Kitango Kyendeji kyavungulwile mīsambo ikankamika ku mushipiditu ku bantu 20679 batenwe’ko, kubadila’mo ne boba badi belungile na bingidilwa bya nshinga mu bifuko bikwabo. Tala mu kīpi myanda yadi mu kipindi ne kipindi. *

Tutu Gerrit Lösch, mwine wadi mwimaniji wa mpangiko, wanenene mwisambo mubajinji wadi wimanine pa Mateo 23:10, wituvuluja’mba mutangidiji wetu i Yesu Kidishitu, ke muntupo kampanda.

Tutu Stephen Lett walombwele mvubu ya kupāna na nsangaji. Muswelo umo otukalombola’mo buntu i wa kukwatakanya mwingilo wa kupāna bukwashi. Tutu Lett walombwele mu kīpi bikoleja bitambile ku bimpengele bya kipangila ne byalupukile ku mwingilo wa kuleta bukwashi mu mwaka wa mingilo wa 2018 ne 2019. Batutu ne bakaka 900 000 ne kupita batengelwe na bino binkumbulu; Mobo a Bulopwe 700 ne kupita pamo ne mobo 15000 ne kupita a banabetu apomokele. Batumoni ba Yehova bajimije madolala midiyo 49 ne kipindi pa kuleta bukwashi.

Wavuile kino kipindi na video ilombola muswelo wafwijije’ko basapudi pa kupwa kukwashibwa.

Ino video yalombwele amba Batumoni ba Yehova batalanga kintu kya byūbakwa 80000 ntanda yonso. Kadi yalombwele ne manwa otwingidija pa kulama, kūbakulula, ne kūbaka mobo a kwingidila’mo mingilo ya Leza.

Mu ino mānga mudi ne bwipangudi bwa mu kibīko bwa batutu basatu bene bakweshe mafuku kunyuma mu mwingilo wa kutonga ne kupota kifuko kyaubakilwe’po musambo wa mu États-Unis ne kité kya ntanda yonso, i Batutu Max Larson, Tutu George Couch, ne Tutu Gilbert Nazaroff. Bano batutu bonso basatu balombwele mobamwenine patōkelela kuboko kwa Yehova pa kusokola bifuko palapala bya kūbaka’po.

Ino video yalombwele amba Batumoni ba Yehova i bakwate’ko mpangiko ya kūbaka mobo mu Ramapo, New York, mwine musa kwingidilwa myanda ya bisanji. Luno lubanza ludi ku makilometele 3 shi utamba ku kité kya ntanda yonso mu Warwick, New York. Kitungo kyetu i kya kushilula lūbako mu 2022 ne kupwa’lo mu Kweji 12, 2026. Pakanana luno lūbako, tukekala tusakilwa bengidi ba kwilanga 1500 difuku ne difuku.

Ino video yalombwele amba tamba mu Kweji 1, 2020, basapudi basaka kutandabula mwingilo wabo bakekala bayuja mukanda wa kulomba kwabo pa mpangiko idi pa jw.org ne kwiutuma ku kitango kyabo kya bakulumpe.

Pano mukokeja kutonga mafishe a mawi makwate kupityila ku Amazon Alexa nansha ku Google Assistant.

Tutu David Splane watōkeje mwivwanino wetu wa bupolofeto bulembelwe mu Yoela shapita 2, bwisambila pa kibumbo kya njie. Tutengele kwifunda kino kitōkeji kya mwivwanino pokisa kulupulwa mu Kiteba kya Mulami.

Tutu Samuel Herd walombwele patōka kamweno kadi mu Bisonekwa Bijila—Bwalamuni bwa Ntanda Mipya (Bible wa Kwifunda) mwine ulupwilwe’nka pa Entelenete. Kupwa, walombwele kulupulwa mu Angele kwa Bisonekwa Bijila—Bwalamuni bwa Ntanda Mipya (Bible wa Kwifunda), tamba ku Mateo kutūla ku Bilongwa mu Bible mutampe. Basapudi babwanya kulomba’ye mu kyabo kipwilo.

Tutu Anthony Morris wanenene ukoma amba ku bene Kidishitu ba bine, kusapula myanda miyampe i mwingilo wa mvubu kupita yonso. Mobo a kwingidila’mo mingilo ya Leza akwashanga Kitango Kyendeji kibwanye kuteakanya mwingilo wa busapudi ne kupāna bidibwa bya ku mushipiditu ku bantu ba Yehova. Tutu Morris wapitulukile mu binenwa bikunka mutyima bidi mu Kiteba kya Mulami kya mafuku 15 Kweji 11, 1976 bya amba: “‘Kyamalwa kikatampe’ pa kwiya, kifwaninwe kutana mwingilo wa busapudi pa kanshinyenshinye kao, munane ntanda yonso. Kwiya kwa Mfumwetu Yesu mwanda wa konakanya babi kukatulumuna bantu bya binebine—enka ne bantu ba Yehova bene, mwanda bakatanwa batokene bininge mu uno mwingilo kupita bitatyi bikwabo!”

Tutu Mark Sanderson washintulwile amba, monka mwālaile’kyo Yesu, bantu ba Leza batengele kushikibwa “na mizo yonso.” (Mateo 24:9) Inoko, Tutu Sanderson wetukankamikile tutyine Yehova, ke muntu mukwabopo, mhm.—Ñimbo ya Mitōto 111:10.

Kwalombwelwe ne video itenga mutyima ya batutu ne bakaka mu Rusi banekenye moyo wa kupangwapangwa. Uno mwisambo pamo ne video byakankamikile bantu bonso ba Yehova batamije kininga kya uno muswelo.

Tutu Geoffrey Jackson walombwele muswelo wa kwingidija binenwa bidi mu Bisonekwa bya Kingidiki bya Bwine Kidishitu bine bingidije bishima “ñeni mibwane.” Wakomeneje ne kamweno ka kulamina nyeke ‘milangwe yetu mibwane senene’ (kishima pa kishima “kwikala babwane mu ñeni senene”) mu ano mafuku a mfulo.—1 Petelo 1:13.

Tutu Kenneth Cook wasapwile kisonekwa kya mwaka wa 2020, Mateo 28:19 kinena’mba: “Nanshi, endai mukalonge bana ba bwanga . . . , mwibabatyijei.” Wanenene ukoma kamweno kadi mu kukwasha bantu ba mityima myoloke bapāne būmi bwabo kudi Yehova ne kubatyijibwa.

Mpangiko ya ku mushipiditu, mwikadile, kupwila kwa pa mwaka, itutononanga twendelele kwielela’ko mu mwingilo wa Yehova.