3 KWEJI 3, 2020
MAPYA A KONSO
Mapya Atala Bishi bya Corona ne Mwa Kwikingila
Kité kya ntanda yonso kya Batumoni ba Yehova kilondanga na katentekeji kipupo kiponene’ki kya bishi bya corona (kiyukene bu COVID-19). Bupolofeto bwa mu Bible bwitulombola’mba bipupo bya misongo bikabadilwa mu kiyukeno kya mafuku a mfulo. (Luka 21:11) Kitatyi kipona bipupo bya misongo, i biyampe kukwata’ko manwa a tunangu a mwa kwikingila batwe bene ne kukinga bakwabo.—Nkindi 22:3.
Bamo ye bano beipangula mwikadile batutu ne bakaka pano paponene kipupo. Kipupo kya COVID-19 i kijinye bininge mingilo ku mabilo a misambo ne bipwilo bya mu Itali, Jampani, Korea wa Kunshi, ne mu matanda makwabo. Misambo i mimike bidi bupempudi bwa ku Betele. Kukwabo, Leta i mupeleje kwibunga bantu bavule pamo, ne kino kyalengeje misambo imike bitango bya bipindi. Kadi mu bifuko bimo, byalombele bipwilo kushinta muswelo wa kusapula ne wa kupwila. Nansha byokudi bino bikoleja, banabetu bendelelanga na kwikankamika mu lwitabijo ne kwikomeja.—Yude 20, 21.
Mu ino ngikadilo, banabetu bamwene kamweno kadi mu ino misoñanya idi kunshi. Ino myanda ibwanya kukukwasha abe pamo ne kisaka kyenu, kitatyi kipona kipupo kwenu.
Kokatuyuka. Shako i biyampe kuyuka mwendela kipupo ne kukwata’ko manwa a mwa kwingidila, ino muswelo wa kwikinga ufwaninwe kwimanina pa bintu bilongeka, ke pa moyopo.—Nkindi 14:15; Isaya 30:15.
Londa Bulombodi ne Mbila ya ba Lupusa. Ba lupusa bavudile kuleta’ko mbila ya mwa kukingila bantu bonso ku misongo. I biyampe kwiiyuka ne kukōkela bulombodi bobaleta.—Bene Loma 13:1.
Lama Bibidiji Biyampe bya Bukundwe. I kya mvubu koya kyaba kyonso ku makasa na sabuni ne na mema nansha kwingidija lawa ipaya bishi (désinfectant). Kadi tufwaninwe kupampula kyaba kyonso pa bifuko byonso potutenga kyaba ne kyaba ku mobo etu nansha ku Njibo ya Bulopwe. Kadi bañanga bapelejanga kwisambija mu makasa mu bitatyi bya uno muswelo, mwanda kwisambija kuzambalajanga misongo. Kitango kya Ntanda Yonso Kitala Bukomo bwa Ngitu, i kibweje’ko madingi makwabo pa bino bishi bya corona.
Sanswa Bakwenu. Batwe bonso tuyukile mvubu ya kupwila ne kusapula mu bantu, ino shi ubabela i biyampe kushala ku njibo kutyina wakasambwila bantu bakwabo misongo. Kulonga namino bo buswe, kadi nabya ukakinga batutu ne bakaka enka ne boba ke Batumonipo bene.—Mateo 22:39.
Shi Kudi Byashintwa pa Kipwilo, Londa. Mu bifuko muponene kipupo, bilo ya musambo ibwanya kwimika mu kitatyi kampanda kupwila, bitango, ne binkumenkume bikwabo bya mu butōtyi bwetu. Bino ye bilongekele mu bifuko bimo mutyibidīle bishi bya COVID-19, kimfwa mu bipindi bimo bya ntanda ya Itali, Jampani, ne mu Korea wa Kunshi. Mungya ngikadilo ya kwenu, bakulumpe bakokeja kukwata kupwila mu video ikokeja kutala basapudi abo kwabo. Basapudi babwanya kusapula kupityila ku telefone, ku misapu nansha ku mikanda.
MADINGI MAKWABO A MU MABUKU ETU
Bino bilonda’ko i bishinte bya mu mabuku bidi na misoñanya ya kamweno ya mwa kwikingila ku misongo.
Tala'po Bidi ne Bino:
MYANDA YA PANOPANO
Mapya 9 Atamba ku Kitango Kyendeji mu 2021
Tutu wa mu Kitango Kyendeji wisambila pa myanda ikankamika ne kulombola bilupukile ku mpangiko ya kupwidila ku Njibo ya Bulopwe.
MUSWELO WINGIDIJIBWA BYABUNTU BYENU
Bukwashi bwa Ntanda Yonso mu Kipupo kya Ntanda Yonso
Bukomo botwalongele bwa kuleta bukwashi mu kitatyi kya kipupo kya COVID-19 i butulumuje Batumoni ne ke Batumonipo.
MYANDA YA PANOPANO
Mapya 1 Atamba ku Kitango Kyendeji mu 2020
Tala mulongela Batumoni ba Yehova ba mu Korea wa Kunshi, mu Itali, ne mu États-Unis pa bishi bya corona biponene’bi.