Mu kweji mupite, balupusa ba mu Rusi balongele kampagne ka kuzakaja ne kukuta Batumoni ba Yehova bavule amba batyumunanga bijila. Bampulushi batwelele ku bukomo mu mobo a bantu mu Birobidzhan, Khabarovsk, Makadana, Orenburg, Naberezhnye Chelny, Perm, Pskov, Saratov, ne mu Tomsk. Bakwete Batumoni bakwabo bana-balume 15, balengeje Batumoni badi mu kifungo babwane 20. Bakwabo babidi nabo i bebanene kuleka kutamba mu abo mobo. Bano Batumoni 15 kubadila’mo ne badi na kintu kya myaka 70 ne 80, bebanenene bashinye mukanda wa kuleka kutaluka mu kibundi mobashikete. Mu mafuku 14 Kweji 6, 2018, balupusa ba mu Rusi basambije Batumoni 40 ne kupita. Shi abaponejibwa, badi mu kyaka kya kukukwa myaka dikumi.

Buludiki bwa Rusi bubajilula kwiivwana kobashininye mu kidye, kwa amba kupelejibwa kwa biyukeno bya mungya bijila bya Batumoni ba Yehova kekukankejapo Kamoni ne Kamoni kulombola lwitabijo lwandi. Rusi i mufutululule bino bilembwa ne kwingidija bibi Kijila kya 282 kya mu Bijila bya Kupēla Bantu Mfuto mwanda wa kulambika Batumoni amba bateakanyanga ne kukwatakanya bulongolodi “bujilula bijila.” Inoko na bubine, pa kyaba kya kulwa bantu bajilula bijila, Rusi upangapañanga bandi bana ba kibundi pa mwanda wa butōtyi bwabo bwa ndoe.

Mafuku 12 Kweji 6, Saratov. Bampulushi batwelele ne kusantaula mu mobo mavule a Batumoni, ne kuselela Batumoni dikumi ku bilo ya bampulushi mwanda wa kwibasambija. Pobadi bakimba mu njibo imo, balupusa batwejeje’mo mabuku a kipwilo apelejibwe dibajinji na kidye kya Rusi. Batumoni batano baelelwe mu buloko. Kupwa babidi balekelelwa, ino bampulushi bakuta bakwabo basatu ne kulambika ba Konstantin Bazhenov ne Feliks Makhammadiyev amba ‘bateakenye mingilo ya bulongolodi butyumuna bijila.’ Inoko kusambilwa kwa Kamoni wa busatu, Aleksey Budenchuk, kekwadipo na bukamoni. Mu mafuku 14 Kweji 6, 2018, Kidye kya Frunzenskiy kya mu Ntanda ya Saratov kyalungulwila’ko kukutwa kwa Bazhenov ne Makhammadiev kufika mu mafuku 12 Kweji 8, 2018. Kadi kino kidye kyalungulwile’ko kukutwa kwa Budenchuk, ino difuku dya kukutululwa kwandi kedyayukene. Ne kadi, bampulushi banenene Kamoni mukwabo ashinye mukanda wa kwitabija kuleka kutamba mu kibundi.

Mafuku 3 Kweji 6, Tomsk. Pa nsá ya 10:00, bampulushi ne Kibumbo Kikwabo kya pa Bula kya Basola ba Rusi, batwelele ku bukomo mu mobo a Batumoni ba Yehova mu Tomsk, Siberia. Bakutyile kintu kya Batumoni 30, kubadila’mo ne mwana-mukaji wa myaka 83. Bampulushi bayete bintu mu mobo ne mu myotoka, baikija Batumoni mu myotoka ne kwenda nabo ku Bilo Imanine Myanda ya Kujilula Bijila.

Ku Bilo, bantu badi balonda myanda, ba Ivan Vedrentsev, Aleksandr Ivanov, ne Vyacheslav Lebedev baipangwile Batumoni bamo koku bebakupila kufika ne 2:00 ya ku lubanga. Bano bantu badi balonda myanda bakimbile’nka ne kutalwija Kamoni umo pa kaji. Pobadi balonda myanda, badi batuma kyaba ne kyaba ku Bilo myotoka iselanga babela, kadi badi bakatula ku lupitalo kamoni nansha umo.

Mukutwa umo, Sergey Klimov, bamulekele mu buloko. Mu mafuku 5 Kweji 6, 2018, Kidye kya Oktyabrskiy kya Ntanda ya Tomsk kyasoñanya balungulwile’ko kukutwa kwandi kufika ne mu mafuku 4 Kweji 8, 2018, amba ‘wateakenye mingilo ya bulongolodi bujilula bijila.’ Mutyibi wapelele kushala’ye mu kifungo nansha kufuta’ye lupeto mwanda wa kukutululwa.

Mafuku 3 Kweji 6, Pskov. Bampulushi batwelele ku bukomo mu mobo mavule a Batumoni ba Yehova mu Pskov. Mu njibo imo, bakwete muntu yense wadi’mo ne kumusambija, ne beni babidi ke Batumonipo. Batumoni ba Yehova bavule, kubadila’mo ne Gennadiy Shpakovsky, baendele nabo bu Kité kya Ntanda kya Pskov kitala Mingilo ya Mutyima-ntenke wa Kibundi mwanda wa kwibasambija. Mu bano baselelwe ku bilo ya bampulushi, baningīle’mo bamo balete bukamoni bwa kuponeja Shpakovsky. Balupusa bashilwile kumusambija, bamulambika’mba ‘wateakenye mingilo ya bulongolodi bujilula bijila.’ Nansha byobamulekelele mwenda mafuku, balupusa babwanya kumusambija monka kyaba ne kyaba.

Mafuku 30 Kweji 5, 2018, Khabarovsk. Bampulushi bakutyile Ivan Puyda pobatwelele mu yandi njibo ne kusantaula’mo. Baendele nandi mu Makadana, mobamwelele mu buloko. Mu difuku 1 Kweji 6, 2018, Kidye kya Ntanda kya Zheleznodorozhniy kyasoñanya’mba ufwaninwe kwikala’mo mu kitatyi kampanda kufika ne mu mafuku 30 Kweji 6, 2018, amba ‘wateakenye mingilo ya bulongolodi bujilula bijila.’

Mafuku 30 Kweji 5, 2018, Makadana. Bampulushi belumbile byabulwi kadi beinanye batwelele mu mobo a bantu mu Makadana, bakwata ba Konstantin Petrov, Yevgeniy Zyablov, ne Sergey Yerkin bebakuta. Mu difuku 1 Kweji 6, 2018, Kidye kya Magadanskiy kyasoñanya bekale mu buloko mu kitatyi kampanda kufika ne mu mafuku 29 Kweji 7, 2018, amba ‘bakwatakenye mingilo ya bulongolodi bujilula bijila.’

Mafuku 29 Kweji 5, 2018, Shuya, Kibundi kya mu Ivanovo. Balupusa bakutyile Dmitriy Mikhailov musunsa wa bubidi. Pa kupwa kutwela mu mobo mu mafuku 20 Kweji 4, bampulushi bamulambikile amba ‘wateakenye mingilo ya bulongolodi bujilula bijila.’ Mu mafuku 29 Kweji 5, balupusa bamulambika monka’mba ‘ukwatakanyanga na lupeto mingilo ijilula bijila.’ Mu mafuku 3 Kweji 6, 2018, Kidye kya Shuya kyasoñanya bamulame mu buloke mu kitatyi kampanda kufika ne mu mafuku 19 Kweji 7, 2018.

Mafuku 27 Kweji 5, 2018, Naberezhnye Chelny, Bulopwe bwa Tatarstan. Bengidi ba mu Mwingilo Utala Mutyima-ntenke wa Kibundi basantawile bufuku mu mobo ne kusela’mo bingidilwa bya busenswe, matelefone ne mapasepor. Bakwata ba Ilkham Karimov, Konstantin Matrashov, ne Vladimir Myakushin bebakuta. Mu mafuku 29 Kweji 5, 2018, Kidye kya Ntanda kya Naberezhnochelninskiy kyasoñanya bebalame mu buloko mu kitatyi kampanda kufika ne mu mafuku 25 Kweji 7, 2018 amba bateakenye ne kulemba bantu mu bulongolodi “bujilula bijila” ne kukwatakanya mingilo yabo. Kupwa bakuta ne Aydar Yulmetyev, kadi mu mafuku 31 Kweji 5, 2018, kidye kyalungulula kukutwa kwabo mu kitatyi kampanda.

Mafuku 22 Kweji 5, 2018, Perm. Padi pajokela ba Aleksandr ne Anna Solovyev mu Perm batamba ku Moldova, bakata ba bampulushi badi bebatengēle ku ngala ya kudiye, bakuta Solovyev makalaka ku makasa, bebayata bintu byabo, basela mulume mu motoka umo, mukaji nandi mu mukwabo baenda nabo ku bilo ya bampulushi. Pobakutyile Solovyev mu kitatyi kampanda, bampulushi bakasantawile mu yandi njibo ne kwipangula mukaji bipangujo. Mu mafuku 24 Kweji 5, 2018, Kidye kya Ntanda kya Sverdlovskiy kyamwela mu kifungo amba “waingile mingilo ya bulongolodi bujilula bijila.’

Mafuku 17 Kweji 5, 2018, Birobidzhan. Mu mwingilo wa bampulushi obadi beta bu Difuku dya Butyibi, bakata ba bampulushi 150 ne bengidi ba mu Mwingilo Utala Mutyima-ntenke wa Kibundi batwelele ku bukomo mu mobo 22 a Batumoni ba Yehova. Bampulushi bayete matabulete, matelefone ne lupeto. Bampulushi bakwetu Alam Aliev, mu Batumoni 34 bobatwelēle mu mobo bamukuta. Mu mafuku 18 Kweji 5, Kidye kya Ntanda kya Birobidzhanskiy kyasoñanya bamulame mu buloko mu kitatyi kampanda kufika ne mafuku 13 Kweji 7, 2018, amba ‘wateakenye mingilo ya bulongolodi bujilula bijila.’ Mu mafuku 25 Kweji 5, 2018 Mutyibi Sizova wa ku Ntanda ya Bayuda ke yadipo italwa na mwanda, mwine wadi mu Kidye kya kubandaula myanda monka, waitabija kusambija Aliev monka ne kupela musoñanya wa kumwela mu kifungo.

Mafuku 16 Kweji 5, 2018, Orenburg. Bakata ba bampulushi batwelele ku bukomo mu mobo ne kusantaula’mo. Bakwata Batumoni basatu: ba Aleksandr Suvorov, Vladimir Kochnev, ne Vladislav Kolbanov. Mu mafuku 18 Kweji 5, Kidye kya Ntanda kya Promyshlenniyn kyasoñanya balame Kolbanov mu kifungo mu kitatyi kampanda, amba ‘wakwatakenye na lupeto mingilo ya bulongolodi bujilula bijila.’ Kadi badi balonda myanda banena Batumoni bakwabo bashinye mukanda wa kwitabija kuleka kutamba mu kibundi pobalonda myanda.

Bumo bwa Mizo ya mu Bulaya ne États-Unis balembele mikanda ya kuponeja Rusi mwanda wa kubulwa kulēmeka bwanapabo bwa bantu. Bumo bwa Mizo bwanene Rusi “alēmeke kwiivwana kweivwanikile matanda onso pa bwanapabo budi na bantu bwa kutonga kipwilo ne nkulupilo, bwanabapo bwa kwisamba ne bwanapabo bwa kubungakana.” États-Unis nandi wanenene Rusi “akutulule bukidibukidi bantu bonso bakutyilwe pa mwanda wa kwingidija bwanapabo bwabo bwa kutonga kipwilo ne nkulupilo.”

Philip Brumley, Avoka Mudingidi wa Batumoni ba Yehova wanenene amba: “Batumoni ba Yehova kujokoloka ntanda yonso i bakambakanibwe bininge na kupangwapangwe kukatampe kobapangapanga banababo bene Kidishitu mu Rusi. Dyalelo Batumoni ba Yehova basusulwanga’nka na mobasuswidilwe mu bulopwe bwa Kikoministe. Kupityila ku bilongwa ne kasusu kandi, Rusi wafutulula bininge binenwa byandi bya kulēmeka byepelo bikatampe bya bantu.”

• Dennis Christensen

  Myaka 45, Oryol, mukutwe tamba mafuku 25 Kweji 5, 2017, kadi ukekala mu kifungo kufika ne mu difuku 1 Kweji 8, 2018.

• Valentin Osadchuk

  Myaka 42, Vladivostok, mukutwe tamba mafuku 19 Kweji 4, 2018, kadi ukekala mu kifungo kufika ne mu mafuku 20 Kweji 6, 2018.

• Viktor Trofimov

  Myaka 61, Polyarny, mukutwe tamba mafuku 18 Kweji 4, 2018, kadi ukekala mu kifungo kufika ne mu mafuku 11 Kweji 10, 2018.

• Roman Markin

  Myaka 44, Polyarny, mukutwe tamba mafuku 18 Kweji 4, 2018, kadi ukekala mu kifungo kufika ne mu mafuku 11 Kweji 10, 2018.

• Anatoliy Vilitkevich

  Myaka 31, Ufa, mukutwe tamba mafuku 10 Kweji 4, 2018, kadi ukekala mu kifungo kufika ne mu mafuku 2 Kewji 7, 2018.