10 KWEJI 5, 2018
RUSI
Kidye kya mu Orel Kibandaula Bukamoni Bubajinji mu Kisambo kya Dennis Christensen
Mu mafuku 23 Kweji 4, 2018, bashilwile monka kusambija Dennis Christensen mu Kidye dya Ntanda kya Zheleznodorozhniy kya mu Orel. Mukelenge Christensen mwanā kibundi wa Danwa kadi Kamoni wa Yehova, bamukwete mu Kweji 5, 2017 paadi mukapwile ne kumulama tamba penepa mu kitatyi kampanda.
Zuji, Mukelenge Fomin walambikile Christensen mambo a ‘kuteakanya mingilo ya Bulongodi butyumuna bijila,’ bwitwa bu Bulongolodi bwa mu Kibundi bwa Kipwilo dya Batumoni ba Yehova mu Orel, bwaimikilwe mu Kweji 6, 2016 pa kulambikwa bya bubela’mba butyumunanga bijila. Baavoka ba Christensen bapelele buno butyibi mwanda kipwilo kya Batumoni ba Yehova mu Orel ke kayukenopo ka mungya bijila, ino i kisumpi kya batōtyi ba ndoe bebungila pamo mwanda wa kwifunda Bilbe. Bandi baavoka banenene bakoma’mba buludiki bwa balupusa ba mu Rusi kebukankejepo mutōtelo wa Batumoni ba Yehova ne amba bijila bya ntanda ya Rusi bipanga muntu lupusa lwa kukulupila byonso byasaka. * Nanshi Mukelenge Christensen pa kwingila mingilo ya kipwilo, wādi’tu ulombola lwitabijo lwandi.
Baivwene batumoni babajinji mu mafuku 24 Kweji 4, 2018. Zuji waita dibanjinji mwingidi wa Leta wingilanga mu Mwingilo wa Kulama Mutyima-ntenke wa Kibundi emane ku kiketelo kya mambo. Uno mwingidi waleta bukamoni amba wadi utūdile kamela ka kukwata bipita ku Njibo ya Bulopwe tamba mu 2017. Inoko kabwenyepo kulombola byadi bipita munda, mwanda byaadi ukwete byadi’tu bilombola Mukelenge Christensen utundaila bāya na nsangaji. Kupwa zuji waita lolo umo wa mu kibundi wakapwidile na Batumoni ba Yehova mu Orel. Ino kesambīle’po pa mingilo ya Christensen mwanda wakapwidile’tu ne kayukeno ka mungya bijila kekatalwilwe mu Orel.
Irina Christensen
Difuku dilonda’po, zuji waita Kamoni wa Yehova umo mununu wa myaka 78 ku kiketelo kya mambo. Zuji pa kupwa kumwipangula mu mansá abidi ne kipindi mwanda wa kumona “bubinga” bwa kuponejeja usambijibwa, aye wanena’tu amba Batumoni kebadipo na bendeji nansha batangidiji, ne amba kebengidijangapo ku kupwila kwabo mabuku apelejibwe mu Rusi.
Kisambo kikashilula monka mu mafuku 14 Kweji 5, 2018, kadi kikalonga mafuku mavule mu mwine Kweji’wa. Shi wapenejibwa, Mukelenge Christensen udi mu kyaka kya kupityija mu kifungo myaka isamba kutūla ku dikumi. Batumoni ba Yehova ba ntanda yonso balangalañanga pa uno mwanda kadi kuzumbijanga mutyima pa būmi bwa Mukelenge Christensen ne wandi mukaji, Irina.
^ mus. 3 Pa kukwata butyibi bwa kupeleja kayukeno ka mungya bijila ka Batumoni ba Yehova ba mu Orel, Kidye Kikatampe kyanene amba: “Bano bantu kebayetwepo lupusa lwa kutonga kipwilo kyobasa, mwanda i kutupu kibakankaja kutōta na bwanapabo pampikwa kwingidija mabuku a kipwilo mudi myanda ijilula kijila.”