Mu mafuku 13 Kweji 2, 2019, Bahram Hemdemov, wa myaka 55, wakutulwilwe mu buloko bwa mu Tilikemenista pa kupwa kulonga myaka iná mu kifungo kya mu Seydi. Pano ushikete pamo na Gulzira wandi mukaji, ne babo bana baná. Mukelenge Hemdemov wakwetwe mu mafuku 14 Kweji 3, 2015, mwanda’tu wa kupwila kobadi bapwidila mu yandi njibo mu kakibundi ka mufula ka mu Turkmenabad kupwa waponejibwa na Kidye kya mu Kibundi kya Lebap mu mafuku 19 Kweji 5, 2015. Buludiki bwa Tilikemenista bwalupwile bakutwa mu kifungo kintu kya misunsa isatu mu mwaka umo kitatyi kyadi kikutyilwe mukelenge Hemdemov, ino aye bamuleka’mo misunsa yonso—nansha byobakutulwile’nka ne bantapañani. Mu mafuku 15 Kweji 8, 2016, mukelenge Hemdemov wakasamba ku Kitango Kitala Byepelo bya Bantu kya Bumo bwa Mizo, kine kekyabandawile uno mwanda. Mu kifungo kya mu Tilikemenista mukishele Batumoni ba Yehova 11 bakutyilwe pa mwanda wa kupela kwingila busola nansha byokudi butyibi bukwetwe misunsa dikumi bwa kuponeja buludiki pa mwanda wa kupangapanga ne kukuta Batumoni bankasampe bapela kutwela busola mwanda wa mutyima wabo wa mundamunda.