Mvua muena Katolike, mukolele mu Rochester tshimenga tshia mu New York. Baledi banyi bakabengangana pamvua ne bidimu muanda mukulu. Nunku munkatshi mua lumingu mvua nsomba ne mamu mu nzubu ya balanda muvuaye ufutshila ne mu Disambombo ne mu Dia lumingu mvua nya kusombela kudi tatu mu kartshie ka babanji. Pangakamona mushindu uvua mamu utata bua kutukolesha tuetu bana basambombo, ngakela meji a kulua mubanji bua kuambuluisha dîku dietu.

 Tatu uvua ujinga bua ntute diakalenga, ke kuyaye nanyi mu tshilongelu tshikuabu tshivuabu banemeka bikole. Tshilongelu atshi tshivua nzubu wa tshilala benyi. Ngakatshinanga, meme kudifundishamu, ngela meji ne: Nzambi uvua wenda wandamuna disambila dianyi dia kulua mubanji ne kuikala ne disanka. Meme kulonga malu a mua kulama nzubu ya tshilala benyi, a mikenji ne a makuta munkatshi mua bidimu bitanu, eku ngenza mudimu mu nzubu wa tshilala benyi wa casino mu Las Vegas mu tshimenga tshia Nevada.

 Pamvua ne bidimu 22, mvua mulombodi tshindondi mu nzubu wa tshilala benyi wa casino au. Bantu bavua bammona ne: mvua mubanji ne mvua mutute diakalenga, misangu ya bungi mvua ndia biakudia bitambe buimpe ne nnua maluvu makole ne mvinyo wa mushinga mukole. Balunda banyi ba ku mudimu bavua bangambila ne: “Wavuluka ne: makuta ke panu.” Buabu bobu makuta ke tshintu tshidi mua kupetesha bantu disanka dilelela.

 Mudimu wanyi uvua kabidi wa kukebela babanji bavua balua kunaya manaya a makuta mu Las Vegas biakudia ne maluvu. Nansha muvuabu babanji, bavua bamueneka kabayi ne disanka to. Meme kutuadija kudiumvua panyi tshiyi ne disanka to. Bushuwa, pamvua ngenda mpeta makuta a bungi, kanyinganyinga kavua kenda kavula paku ne tshivua mmona tulu butuku to. Ngakatuadija kuela meji a kudishipa. Ngakadimona mutekeshibue mu mikolo bua nsombelu umvua nende au, meme kuebeja Nzambi ne: “Nkuepi kundi mua kupetela disanka dilelela?”

 Tshikondo atshi, bayayanyi babidi bakavua balue Bantemu ba Yehowa bakalua kusombela mu Las Vegas. Nansha mumvua mubenge mikanda yabu, mvua ngitaba bua kubala nabu Bible wanyi. Mu Bible wanyi, malu onso avua Yezu muambe avua mafunda mu dikala dikunze. Bu mumvua muitabe malu onso avua Yezu muambe, bayayanyi abu bakabanga kungambila anu malu a Yezu. Mvua kabidi ndibadila Bible.

 Malu a bungi angakabala akankemesha. Tshilejilu, Yezu wakamba ne: “Panudi nusambila, kanuambuludi malu amue amue bu bampangano, badi bela meji ne: nebabumvuile bua mêyi a bungi adibu bakula.” (Matayi 6:7, The New American Bible) Kadi pabi, mumpele wetu uvua mmumpeshe tshimfuanyi tshia Yezu, kungambilaye ne: meme nsambila mutangile ku tshimfuanyi atshi, ngambulula disambila dia Tatu wetu ne dia Muoyo Mariya misangu dikumi, Nzambi neampeshe makuta bungi buonso bumvua nabu dijinga. Kadi ngakajingulula ne: meme ngambulula masambila au misangu ne misangu, kabivua ne diambuluisha nansha dimue kundi to. Ngakabala kabidi mêyi a Yezu a ne: “Kanubikidi muntu nansha umue pa buloba ne: tatu to, bualu Tatu wenu udi anu umue, Yeye udi mu diulu.” (Matayi 23:9) Ke meme kudiebeja kabidi ne: ‘Bua tshinyi meme ne bena Katolike nanyi bakuabu tudi tubikila bamumpele betu ne: “Tatu”?’

 Pangakabala mukanda wa mu Bible wa Yakobo, ke pangakatuadija kuela meji bikole a malu amvua ngenza mu nsombelu wanyi. Mu nshapita 4, Yakobo wakafunda ne: “Kanuena bamanye ne: bulunda ne malu a panu budi lukuna ne Nzambi anyi? Ke bualu kayi, muntu yonso udi musue kuikala mulunda wa malu a panu udi udivuija muena lukuna wa Nzambi.” (Yakobo 4:4) Mêyi a mvese wa 17 a ne: “Ke bualu kayi, bikala muntu mumanye mua kuenza tshidi tshimpe kadi kayi utshienza, udi wenza mpekatu” avua mene mmankemeshe bikola. Pashishe ngakabikila bayayanyi abu meme kubambila ne: ngalekedi kuenza mudimu ku nzubu wa tshilala benyi aku, bualu uvua unsaka bua kuenza malu ankavua mukine bu mudi: kunaya manaya a makuta ne kuikala ne lukuka.

 Mvua musue kuakaja malanda anyi ne Nzambi, kabidi ne a baledi banyi ne bana betu. Nunku ngakangata dipangadika dia kukepesha malu mu nsombelu wanyi bua ngikale ne dîba dia bungi dia kuenza nanku. Kadi kabivua bipepele bua kuenza mashintuluka onso au to. Tshilejilu, bakandomba bua kuenza mudimu wa makuta a bungi mu nzubu wa tshilala benyi au wa casino, bua ngikale mpeta difutu dibandile ku dia kumpala misangu ibidi anyi isatu. Kadi meme mumane kusambila bua bualu abu, ngakangata dipangadika dia ne: tshiena musue kabidi nsombelu wa nunku to. Ngakalekela mudimu au, meme kuya kusombela muaba wa ditekela mashinyi wa mama, ne meme kutuadija kuenda kamushinga ka mpana biakudia mu restoran.

 Nansha mukavua Bible mungambuluishe bua kumanya tshivua ne mushinga wa bungi mu nsombelu, tshivua anu nya mu bisangilu bia Bantemu ba Yehowa to. Bayayanyi abu bakangebeja bua tshinyi tshivua munange Bantemu. Ngakabambila ne: “Bualu Yehowa Nzambi wenu udi utapulula bena mu mêku. Tshikondo tshia Nowele ne tshia mifikilu ya diledibua ke tshia kusomba ne bena mu dîku, kadi nuenu kanutu nusekelela mafesto aa to.” Umue wa ku bayayanyi abu kutuadijaye kudila ungebeja ne: “Kadi matuku makuabu a munkatshi mua tshidimu utu kuepi? Tutu basue kuikala nebe dîba dionso. Kadi wewe udi musue kulua anu kutudi mu bikondo bia mafesto au, ne anu paudi umona ne: udi muenzejibue bua kulua.” Mêyi ende au akandenga ku muoyo bikole, meme kutuadija kudila nende.

 Diakamue pangakamanya ne: Bantemu ba Yehowa mbanange bena mu mêku abu bikole, meme ke uvua mu tshilema, ngakangata dipangadika dia kubuela mu tshimue tshia ku bisangilu biabu ku Nzubu wa Bukalenge. Pangakayamu ngakatuilangana ne Kevin, mulongeshi wa Bible mupiluke ungakatuadija kulonga nende Bible.

 Kevin ne mukajende bavua bakepeshe malu mu nsombelu wabu bua kupitshisha dîba diabu dia bungi mudibi bikengela bua kuambuluisha bakuabu bua kumvua malu a mu Bible. Makuta avuabu nawu avua mabambuluishe kabidi bua kuya mu Afrike ne mu Amérique centrale muvuabu badifile bua kuibaka nzubu ya Betele ya Bantemu. Bavua ne disanka dia bungi ne bavua banangangane. Meme kudiambila ne: ‘Ke nsombelu umvua njinga kuikala nende eu.’

 Kevin wakandeja filme uvua uleja masanka adi bantu badi benza mudimu wa bu misionere bapeta, meme kuangata dipangadika dia ne: dimue dituku nendue misionere. Mu 1995, meme mumane kulonga Bible ne muoyo mujima munkatshi mua ngondo isambombo, ngakabatijibua meme kulua Ntemu wa Yehowa. Pamutu pa meme kulomba Nzambi bubanji, ngakatuadija kusambila ne: “Kumpeshi bupele anyi bubanji nansha.”​—Nsumuinu 30:8.

 Mpindieu nkadi mubanji. Tshiena mubanji bua makuta to, kadi ndi mubanji mu nyuma. Ngakatuilangana ne Nuria mukajanyi undi munange bikole mu ditunga dia Honduras, ne tudi benze nende mudimu wa bumisionere mu ditunga dia Panama ne dia Mexique. Tudi badimuenene mudi mêyi a mu Bible aa malelela: “Dibenesha dia Yehowa ke didi divuija muntu mubanji, ne Yeye kena utentekapu dikenga”!​—Nsumuinu 10:22.