Mbandelele mu ditunga dia Ouganda mu tshimenga tshia Gomba. Bantu ba bungi ba mu tshimenga atshi mbalanda ba katshia. Katuvua ne nzembu to, nunku butuku tuvua tutemesha miendu.

 Baledi banyi bavua babidime. Bavua bumbuke mu Rwanda baye kusombela mu ditunga dia Ouganda. Bavua ne madimi a kafe ne a bibote. Bibote abi bivua bibambuluisha bua kulamba maluvu avua bantu banua bikole avuabu babikila ne: waragi. Baledi banyi bavua bamuna kabidi nzolo, mbuji, ngulube, ne ngombe. Bilondeshile bibidilu bia kuetu ne mushindu uvuabu bankoleshe, ngakafika ku ditaba ne: mukaji udi ne bua kutumikila bayende misangu yonso ne kena mua kuleja luende lungenyi nansha.

 Pamvua ne bidimu 23, ngakaya kusombela mu Rwanda. Meme ne bena mulongo nanyi bakuabu, tuvua tuya miaba itubu bajila maja. Bu mumvua ntamba kuya mu umue wa ku miaba ayi, bavua balombolamu bakampesha karte bua ngikale mbuelamu tshianana tshiyi mfuta makuta to. Mvua munange kabidi kumona filme ya bantu batutangana ne ya malu a tshikisu ivuabu balejamu. Bintu bimvua njikija nabi lutetuku ne bantu bamvua nsomba nabu bakamfikisha ku dilua muena tshikisu, mukuatshiki wa maluvu, ne muendi wa masandi.

 Mu 2000, ngakabanjija mamu mukuabu utshivua nsonga diende Skolastique Kabagwira, tuetu kulela nende bana basatu. Bilondeshile malu avuabu bandongeshe pantshivua nsonga, mvua mutekemene ne: padiye undomba tshintu anyi ungela muoyo ikale utua binu kumpala kuanyi. Mvua musue kabidi bua bintu bionso bituvua nabi mu dîku bikale anu bianyi meme nkayanyi bua ngikale ngenza nabi tshionso tshimvua musue. Misangu ya bungi mvua mpatuka dilolo, mpinganga mu dîba isatu wa patshiatshia. Pa tshibidilu mvua mpingana nanku munue mukuatshike. Pavua Skolastique unenga bikole bua kulua kunkanguila tshiibi, mvua mututa.

 Tshikondo atshi, bu mumvua ntangila midimu yonso ya dilama kumpanyi wa muntu kampanda, bavua bamfuta dikuta divumvuke. Kumbelu, Skolastique uvua udienzeja bua kungitabijija bua tuikale tuye nende mu tshitanda tshiabu tshia Mpenta. Kakuyi mpata uvua wela meji ne: nenshintuluke. Kadi meme tshivua musue kuyamu to. Ngakatuadija kunanga mamu mukuabu. Bu mumvua ne tshikisu ne bikadilu bibi, Skolastique wakaya kusombela kudi baledi bende ne bana banyi basatu abu.

 Mulunda wanyi mukuabu ukavua mukulumpe wakangeleshisha meji bua nsombelu umvua nende au. Wakankankamija bua tulengejangane ne Skolastique. Kungambilaye ne: udi ne bana bimpe ba dikema, ki mbimpe bikale ntanta nebe to. Nunku mu 2005, ngakalekela kunua maluvu, kulekela ne mukaji mukuabu au, meme kulengejangana ne Skolastique. Tuetu kuselangana mu 2006. Nansha nanku, ntshivua anu ne tshikisu ne mmukengesha.

 Mu 2008, Ntemu wa Yehowa mukuabu diende Joël wakalua kunyisha kumbelu, meme kuteleja bivuaye wamba. Yeye ne Ntemu mukuabu diende Bonaventure bavua balua kututangila pa tshibidilu munkatshi mua ngondo ya bungi. Tuvua tuyukila nabu malu a mu Bible bikole. Mvua mbela nkonko ya bungi, nangananga bua malu adi mu mukanda wa Buakabuluibua. Mvua ndienzeja bua kubatuisha ne: bidi Bantemu balongesha mbia dishima. Tshilejilu, ngakabebeja bua tshinyi badi bamba ne: “musumba munene wa bantu” badibu batele mu Buakabuluibua 7:9 nebasombele pa buloba, pende mvese au udi wamba ne: ‘Mbimane kumpala kua nkuasa wa bukalenge wa Nzambi ne kumpala kua Yezu Kristo Muana wa mukoko.’ Joël wakandamuna nkonko yanyi ayi ne lutulu luonso. Tshilejilu, wakambadisha Yeshaya 66:1 mudi Nzambi wamba ne: buloba ‘ntshitekelu tshiende tshia makasa.’ Biumvuika bimpe ne: musumba munene wa bantu abu mbimane pa buloba kumpala kua nkuasa wa bukalenge wa Nzambi. Ngakabala kabidi Misambu 37:29, udi wamba ne: bantu bakane nebasombe pa buloba bua kashidi.

 Ke meme kushisha kuitaba bua kulonga Bible. Nunku Bonaventure uvua ulua kutulongesha meme ne mukajanyi Skolastique. Malu amvua ndonga mu Bibe akansaka bua kushintuluka. Ngakalonga mua kunemeka mukajanyi. Tshitshiena njinga kabidi bua ikale utua binu kumpala kuanyi padiye ungela muoyo anyi undomba tshintu to. Ndi mulekele too ne lungenyi lua ne: bintu bionso bitudi nabi mu dîku mbianyi meme nkayanyi. Ngakalekela kabidi kutangila filme ya malu a tshikisu. Kulekela malu onso au kakuvua kupepele to, kuvua kundomba didikanda dia bungi ne didipuekesha.

 Bidimu ndambu kumpala, mvua mutume Christian muananyi wa kumpala mu Ouganda bua aye kusomba ne balela banyi bakuabu. Kadi pangakabala Dutelonome 6:4-7, ngakajingulula ne: ku mêsu kua Nzambi meme ne mukajanyi ke bavua ne bujitu bua kutabalela bana betu. Mu dibatabalela amu mudi dibalongesha mêyi a Nzambi. Tuvua ne disanka dia katshia patuvua bapingajije muanetu au kumbelu! Wakasanka pende bikole.

 Ndi mulonge ne: Yehowa nNzambi wa luse, ne ndi mutuishibue ne: mmufuile luse bua ngelelu wanyi wa meji ne bikadilu bianyi bia kale. Ndi ne disanka dia bungi dia muvua Skolastique muitabe pende bua kulonga Bible. Tuakadilambula nende kudi Yehowa, tuetu kubatijibua mu dia 4/12/2010. Mpindieu tukadi tueyemenangana, ne tudi ne disanka mu dîku dietu bua mutudi tutumikila mêyi manene a mu Bible. Mukajanyi utu ne disanka dia bungi bua muntu mpingana diakamue kumbelu padi mudimu ujika. Udi kabidi ne diandyisha bua mundi mmutua mushinga ne mmunemeka. Kabidi ne bua mumvua muangate dipangadika dia kulekela maluvu makole, ne mundi tshiyi kabidi muena tshikisu. Mu 2015, bakanteka mukulu bua ngenze mudimu wa bulami mu tshisumbu tshietu. Mu bana banyi batanu, basatu bakadi babatijibue.

 Pangakatuadija kulonga Bible ne Bantemu ba Yehowa, tshivua ngitabakana malu avuabu bandongesha tshianana tshianana to. Biakankemesha bikole bua muvuabu bandamuna nkonko yanyi ne Bible. Meme ne Skolastique tudi bafike ku dimona ne: bantu badi badiamba mudibu benzela Nzambi mulelela mudimu badi ne bua kutumikila mikenji yende, kabayi balengulula mikuabu to. Ndi ne dianyisha diyila ne panshi bua mudi Yehowa munkoke kudiye ne bua mundi mu dîku dietu dia mu nyuma. Pandi ngela meji a nsombelu wanyi, ndi mutuishibue ne: Nzambi udi mua kuambuluisha muntu yonso udi muakaje muoyo wende bua kushintuluka bua amusankishe.