Mu dia 20/5/2015, mulombodi wa tshimenga tshia Rostov-sur-le-Don, tshimenga tshitambe bunene tshia ku sud kua ditunga dia Russie, wakatumina Bantemu ba Yehowa mukanda wa dianyisha, ubela kalumbandi “bua muvuabu badifile ne muoyo umue bua kuteka mankenda mu tshimenga tshikondo tshia muvu wa luya.”

Pavua bena mu tshimenga bakeba mushindu wa kuteka mankenda mu Rostov-sur-le-Don, Bantemu ba Yehowa ba mu bisumbu binayi bakangula bintu bia manyanu ne bipese bia bintu bivua biuwule mu njila ya tshimenga ne kumpenga kua musulu. Mu mêba anayi tshianana, bakuwuja mifuku ya bintu bia manyanu mitue ku 300 yakaluabu kuambula kudi mashinyi.

Bua tshinyi Bantemu bavua basumpakana bua kuambuluisha bena mu tshimenga tshiabu? Mamu kampanda diende Raisa, udi ne bidimu 67, udi wamba ne: “Tshivua mua kushala muvunge maboko to. Ndi musue bua tshimenga tshietu tshikale ne mankenda bua muntu yonso udi musombelamu ikale musombele kaba ka mankenda. Nansha mudi bantu anu bakese bamanye tshitudi benze, ndi ngenza mudimu eu ne disanka. Tshidi ne bualu, Yehowa mmumone tshitudi tuenza.” Tatu mukuabu diende Aleksander udi wamba pende ne: “Katuena anu tuyisha bantu to, kadi tudi kabidi tubenzela midimu ya mushinga. Ndi ngumvua disanka pandi ngenzelaku mukuanyi bualu kampanda.”

Bantu bakanyisha lungenyi lua didifila lua Bantemu ba Yehowa. Muntu kampanda wa mu tshimenga etshi wakakema pavuaye mumanye ne: kabavua bafute Bantemu bua kuenza mudimu eu to. Wakangata dipangadika dia kuenza pende mudimu ne wakamba pashishe ne: “Tshivuaku ngela meji ne: muntu udi mua kuenza mudimu wa disukula mu tshimenga ne kuikala ne disanka to!” Wakamba kabidi ne: “Bamue ba kunudi ki mbasombele nansha muaba eu to, kadi nudi anu nulua bua kutusukuilawu!”

Mulombodi wa tshimenga wakamona ne: kasumbu kakese ka Bantemu kavua kakunguije mushiki munene menemene wa bintu bia manyanu. Wakabakuata foto bimane ku mifuku ya bintu ivuabu bunguije bua “kuleja bantu bakuabu mushindu udi mudimu ne bua kuenzeka.”