Tòo. Tuetu Bantemu ba Yehowa tudi bena Kristo, kadi katuena tudiangata bu bantu bakatombokela Katolike bu mudi bena Mishonyi to. Bua tshinyi?

 Mukanda kampanda udi wamba ne: tshitendelelu tshia Mishonyi “ntshitendelelu tshidi tshitombokele tshitendelelu tshia Katolike.” Nansha mutudi tuetu Bantemu ba Yehowa katuyi tuitaba malongesha a bena Katolike, katuena tudiangata bu bena Mishonyi, mmumue ne: bantu bakatombokela tshitendelelu tshia Katolike to. Bua tshinyi? Bua malu adi alonda aa:

1.   Malongesha a bungi a bena Mishonyi adi abengangana ne tshidi Bible ulongesha. Tshilejilu, Bible udi ulongesha ne: “kudi Nzambi umue”; Nzambi kena Busatu bunsantu to. (1 Timote 2:5; Yone 14:28) Udi kabidi ulongesha patoke ne: Nzambi udi unyoka benji ba malu mabi, ubabutula tshiendelele; katu ubakengesha kashidi mu iferno wa kapia to.​—Misambu 37:9; 2 Tesalonike 1:9.

2.   Katutu tutontolola tshitendelelu tshia Katolike anyi bitendelelu bikuabu, peshi tukeba kubishintulula to. Kadi tutu tuyisha anu lumu luimpe lua Bukalenge bua Nzambi, tudienzeja bua kuambuluisha bantu bua bitabuje lumu luimpe elu. (Matayi 24:14; 28:19, 20) Katutu tukeba bua kushintulula bitendelelu bikuabu to, kadi tudi tuditatshisha bua kuyisha bantu ba meji mimpe bulelela budi butangila Nzambi ne Bible Dîyi diende.​—Kolosayi 1:9, 10; 2 Timote 2:24, 25.