Bantemu ba Yehowa kabatu basekelela mifikilu ya diledibua to bualu tudi tuitaba ne: mifikilu ya nanku kayena isankisha Nzambi to. Nansha mudi Bible kayi ukandika patoke disekelela dia mufikilu wa diledibua, udi utuambuluisha bua kuela meji ku bidi ne mushinga mu malu aa ne kumanya mutu Nzambi uamona. Mona malu anayi mu malu au ne mudiwu apetangana ne mêyi manene a mu Bible.

1.   Disekelela mifikilu ya diledibua ndifumine ku bilele bia bampangano. Bilondeshile mukanda kampanda, disekelela mifikilu ya diledibua eyi divua difumine dilongesha dia ne: mu dituku dia diledibua dia muntu, “nyuma mibi ne makola bidi ne mpunga wa kubunda badi badisekelela” kabidi ne: “dikala dia balunda muaba au ne dijingilangana malu mimpe didi diambuluisha bua kukuba badi badisekelela.”(Funk & Wagnalls Standard Dictionary of Folklore, Mythology, and Legend) Mukanda wa Coutumes et usages des anniversaires (mu anglais) udi wamba ne: mu bikondo bia kale, disekelela mifikilu ya diledibua divua ne “mushinga bua kutangila bimanyinu mu mitoto” bimanyine pa “dimanya dia malu a mîdima a mbuku ya mitoto anyi ya mabulunge makuabu.” Mukanda eu udi usakidila ne: “Mu kabukulu, buji itubu batemesha dituku dia mufikilu wa diledibua itu ne bukole bua mîdima bua pa buabu bua kukumbaja malu adi muntu ujinga ne adibu bamujingila.”

    Kadi Bible utu ubipisha malu a mîdima bu mudi a majimbu, a mbuku, a bakishi, anyi “bualu bua nunku.” (Dutelonome 18:14; Galatiya 5:19-21) Mu kuamba kuimpe, bualu bumue buvua Nzambi mulumbuluishile bena mu tshimenga tshia Babilona tshia kale mbua muvua benamu baditue mu ditangila mitoto bua kubuka didi mushindu mukuabu wa mbuku. (Yeshaya 47:11-15) Bantemu ba Yehowa kabena batamba kudifila ku malu a kudi tshilele ne tshilele tshionso tshia bantu tshifumine to; kadi muaba udi Bible ufila buludiki butoke bimpe, katuena tubenga kubulonda to.

2.   Bena Kristo ba kumpala kabavua basekelela mifikilu ya diledibua to. Nkonga-mianda kampanda udi wamba ne: bena Kristo “bavua bamona disekelela dia mufikilu wa dituku dia diledibua dia muntu bu tshilele tshia bampangano.” Bible udi uleja ne: bapostolo ne bantu bakuabu bavua Yezu mudilongeshile nkayende bakashiya tshilejilu tshidi bena Kristo bonso ne bua kulonda mu bualu ebu.​—2 Tesalonike 3:6.

3.   Tshivulukilu tshimuepele tshidi bena Kristo balombibue bua kusekelela ntshia lufu lua Yezu, kadi ki ntshia diledibua to. (Luka 22:17-20) Abu ki mbualu bua kukema to, bualu Bible udi wamba ne: “Dituku dia lufu ndipite dituku dia kuledibua.” (Muambi 7:1) Yezu, pakavuaye ku ndekelu kua matuku a muoyo wende pa buloba, ukavua mudikebele dîna dimpe ku mêsu kua Nzambi, muvuije dituku dia lufu luende dipite dituku dia diledibua diende ku buimpe.​—Ebelu 1:4.

4.   Bible katu muanji kuakulaku bua muena mudimu wa Nzambi ukavua musekelele mufikilu wa diledibua diende nansha. Ki mbiezeke ku tshipua muoyo patupu to, bualu mbatelamu mifikilu ibidi ya matuku a diledibua ivuabu basekelele kudi bantu bavua kabayi batendelela Nzambi. Kadi bibilu abi bionso bibidi mbalonde bualu buabi anu mu bubi.​—Genese 40:20-22; Mâko 6:21-29.

 Anu bu baledi bimpe bonso, Bantemu batu baleja dinanga kudi bana babu munda mua tshidimu, pa kubapesha bintu bimpe bidi bibasankisha ne kupitshisha nabu dîba badisange pamue basanka. Badi badienzeja bua kulonda tshilejilu tshipuangane tshia Nzambi, Udi upesha bana bende bintu bimpe ne muoyo mujima. (Matayi 7:11) Bana ba Bantemu kabena bamona ne: mbabapangishe tshintu to, anu mudi malu aa aleja:

•   “Bidi bitamba kusankisha paudi upeta dipa kampanda didi kadiyi ditekemena.”​—Tammy, udi ne bidimu 12.

•   “Nansha mundi tshiyi ne dipa dia musekelelu wa dituku dia diledibua dianyi, baledi banyi batu bansumbila bintu bimpe misangu mikuabu. Ntu mbianyisha bualu bitu binkemesha.”​—Gregory, udi ne bidimu 11.

•   “Udi wela meji ne: minite dikumi, mikata mikese miela mu tukopo, ne musambu ke bidi bienza difesto anyi? Wewe mua kulua kumbelu kuetu neumone tshidi difesto dia bushuwa!”​—Eric, udi ne bidimu 6.