Bantemu ba Yehowa batu benza mudimu ne Bible ya bungi mishilangane bua kudilongela. Kadi tutu tuanyisha nangananga Bible wa Bible​—Nkudimuinu wa bulongolodi bupiabupia mu miakulu ikadibu bamukudimune, bualu udi utela dîna dia Nzambi, udi ne malu majalame, ne mmupele bua kumumvua.

•   Ditela dîna dia Nzambi. Bamue bapatudi ba Bible ki mbapeshe Muenaye bunême to. Tshilejilu, mu Bible mukuabu mbatelamu mêna a bantu bapite pa 70 bavua bambuluishe mu mushindu kampanda bua kumupatula. Kadi ki mbatelamu dîna dia Yehowa Nzambi, Muenaye muaba nansha umue to.

   Kadi mu Bible wa Nkudimuinu wa bulongolodi bupiabupia, mbapingaje dîna dia Nzambi miaba binunu ne binunu ivuadi mu mifundu ya ntuadijilu, padi eku bena mu komite wa bavua bapatule Bible eu kabayi bamanyike.

•   Malu majalame. Bible yonso ki mmiambe mêyi a mu Bible ne bujalame buonso anu muvuabu baafunde ku kale to. Tshilejilu, Bible mukuabu mmukudimune Matayi 7:13 mushindu eu: “Buelelayi ku tshiibi tshikese, bualu tshiibi tshidi tshifikisha ku inferno ntshinene ne njila udi ufikishaku mmupepele.” Kadi mifundu ya ntuadijilu mmiakule bua muaku “kabutu,” ki mbua “inferno” to. Pamuapa bakudimunyi bavua basakidile muaku “inferno” bualu badi bitaba ne: bantu babi badi bakengeshibua mu inferno wa kapia bua kashidi ne tshiendelele. Dilongesha adi kadiena mu Bible to. Ke bualu kayi, Bible wa Nkudimuinu wa bulongolodi bupiabupia udi wamba ne bujalame buonso ne: “Buelelayi ku tshiibi tshikese, bualu tshiibi tshidi tshinene ne njila udi mualabale udi ufikisha ku kabutu.”

•   Mupepele bua kumvua. Nkudimuinu muimpe udi ne bua kuikala mujalame, mutoke, ne mupepele bua kumvua. Tuangate tshilejilu. Mu 1 Petelo 1:13, mupostolo Petelo wakatela tshiambilu tshikuabu tshidi tshiumvuija ku muaku ku muaku ne: “Nuele bimono bia meji enu mikaya.” Bu mudi tshiambilu atshi katshiyi tshiumvuika bikole mu Tshiluba tshidibu bakula matuku etu aa, mu Bible wa Nkudimuinu wa bulongolodi bupiabupia mbakudimune mvese eu mu mushindu udi umvuika bipepele. Udi wamba ne: bena Kristo badi ne bua ‘kulongolola meji abu bua mudimu.’

 Pa kumbusha ditela dîna dia Nzambi, diamba malu majalame, ne adi umvuika bipepele, Bible wa Nkudimuinu wa bulongolodi bupiabupia mmushilangane kabidi ne mikuabu yonso mu bualu ebu: badi bamuabanyina bantu tshianana. Ke bualu kayi, bantu miliyo ne miliyo badi mua kubala Bible mu muakulu wabu wa ku dibele, too ne bavua kabayi ne mushindu wa kusumba wabu Bible to.