Bu mutudi Bantemu ba Yehowa, tudi tudienzeja bua kukolesha mêku etu, ne a bantu bakuabu. Tudi tunemeka Nzambi bu Mufuki wa dîku. (Genese 2:21-24; Efeso 3:14, 15) Mu Bible, udi ulongesha mêyi manene adi mambuluishe bantu ba bungi pa buloba bujima bua kuikala ne dîku dimpe ne disanka.

 Tudi tudienzeja bua kutumikila mibelu idi mu Bible. Idi ituambuluisha bua kuikala balume bimpe, bakaji bimpe, ne baledi bimpe. (Nsumuinu 31:10-31; Efeso 5:22–6:4; 1 Timote 5:8) Meji adi mu Bible adi ambuluisha kabidi bantu badi mu mêku adi benamu bashilangane ku bitendelelu. (1 Petelo 3:1, 2) Mona malu a kudi bena dibaka kampanda bavua kabayi Bantemu kumpala bambe:

•   “Bidimu bietu bisambombo bia kumpala, bivua bia matandu ne tunyinganyinga. Panyima pa Ivete mumane kulua Ntemu wa Yehowa, ukavua ne dinanga dia bungi ne lutulu. Mashintuluka avuaye muenze mmapandishe dibaka dietu.”​—Clauir wa mu Brésil.

•   “Mvua mbenga pavua bayanyi Chansa mutuadije kulonga Bible ne Bantemu ba Yehowa bualu mvua ngela meji ne: bavua bapandulula mêku. Kadi kubangila anu dîba adi, ngakamona ne: Bible muambuluishe dîku dietu mpindieu.”​—Agness wa mu Zambie.

 Mu mudimu wetu wa buambi, tudi tuleja bantu mudi kutumikila mibelu ya meji idi mu Bible mua kubambuluisha bua:

•   Kusungula muena dibaka nabu ne meji

•   Kupitshisha tshidimu tshia kumpala tshia dibaka bimpe

•   Kusomba bimpe ne dîku dia muena dibaka nabu

•   Kumanya mua kutula makuta

•   Kulekela matandu

•   Kumanya mua kufuilangana luse

•   Kulongesha bana

 Mu kuamba kuimpe, misangu mikuabu didi dikebesha bilumbu. Tshilejilu, mu 1998 luapolo lua makebulula a tshiapu kampanda (Sofres) ludi luleja ne: mu dibaka dimue pa mabaka 20 muvua muena dibaka umuepele muikale Ntemu ke muvua mujuka bilumbu bikole dîba divuaye yeye au utshivuilaku Ntemu.

 Yezu ukavua muambe ne: bantu badi batumikila malongesha ende bavua mua kukenga bua tshikisu tshia mu dîku bua tshikondo kampanda. (Matayi 10:32-36) Mumanyi wa malu a kale Will Durant wakamba ne: mu bukalenge bua Lomo “Bena Kristo bavua bapeta bilumbu bia dipandulula mêku,” a ne bamue ba ku Bantemu ba Yehowa badi batuilangana ne bilumbu bia muomumue lelu. Mmumue ne: Bantemu ba Yehowa ke badi bakebesha dibenga kupetangana anyi?

 Mu dipangadika dia mbulamatadi mu tshilumbu tshia kufunda Bantemu ba Yehowa bua dipandulula mêku, kabadi ka manême a bantu ka ku Mputu kakamba ne: muntu udi kayi Ntemu mu dîku utu misangu yabungi ukebesha bilumbu padiye ubenga bua “kuitaba ne kunemeka budikadidi budi nabu bena mu dîku diabu badi Bantemu bua kudisunguila ne kuenza malu a mu tshitendelelu tshiabu.” Kabadi kakasakidila ne: “Bualu ebu budi mu mêku onso adi ne bena dibaka ne ditabuja dishilangane nansha Bantemu ba Yehowa.” b Nansha mudibu batuilangana ne lutatu lua bitendelelu bienza malu mashilashilangane, Bantemu ba Yehowa badi badienzeja bua kutumikila mubelu wa mu Bible wa ne: “Kanupingajidi muntu bubi ku bubi. . . . Bikalaku mushindu, enzayi tshionso tshinudi nuenu mua kuenza bua kuikala mu ditalala ne bantu bonso.”​—Lomo 12:17, 18.

 Bantemu ba Yehowa badi batumila mukenji wa kuselangana “anu mu Mukalenge,” mmumue ne: kuselangana ne muntu udi ne ditabuja dimue ne diabu. (1 Kolinto 7:39) Mukenji eu ngua mu Bible ne ngua kutumikila. Tshilejilu, tshiena-bualu kampanda tshiakamba ne: “dîku didi ne bena dibaka mu tshitendelelu tshimue, benza malu amue, ne ditabuja dimue” badi bapeta ngikadilu mimpe mu malanda abu.​—Journal of Marriage and Family 2010. c

 Mu mishindu yonso, Bantemu ba Yehowa kabatu bakankamija badi ne diabu ditabuja bua kulekelangana ne muena dibaka nabu udi kayi Ntemu to. Bible udi wamba ne: “Bikala muanetu wa balume ne mukaji udi kayi muena kuitabuja, kadi mukaji au muanyishe bua kusomba nende, kamulekedi to; ne bikala mukaji ne mulume udi kayi muena kuitabuja, kadi mulume au muanyishe bua kusomba nende, mukaji kalekedi bayende to.” (1 Kolinto 7:12, 13) Bantemu ba Yehowa badi bitaba bua kutumikila mukenji eu.