“Ngasa wanyi mmukukumbane, bualu bukole buanyi budi buenda buvuijibua bupuangane mu butekete.”​—2 Kolinto 12:9, Nkudimuinu wa bulongolodi bupiabupia.

 “Ngasa wanyi udi ukukumbana, bua bukole buanyi budi bukumbashibua tshishiki mu butekete buebe.”​—2 Kolinto 12:9, Mukanda wa Nzambi.

 Nzambi wakalaya bua kupesha mupostolo Paulo bukole buvuaye ukengela bua ananukile mu ntatu ne mu malu avuaye kayi mua kukokesha.

 “Ngasa wanyi mmukukumbane.” Tudi mua kukudimuna kabidi diandamuna divua Nzambi mupeshe Paulo ku masambila avuaye muele njila ne njila ne: “Bulenga buanyi ke tshionso tshiudi ukengela.” Mu mêyi makuabu, ngasa wa Nzambi uvua mukumbane bua kuambuluisha Paulo bua ananukile mu ntatu. Mushindu kayi? Muaku udibu bakudimune ne: “ngasa,” anyi “bulenga,” udi uleja dipa dia tshianana ditudi katuyi bakanyine didi Nzambi mutupeshe ne muoyo mujima. Malu avua Paulo mufunde adi aleja ne: ngasa wa Nzambi wakamuambuluisha bikole. Nansha muvuaye kumpala mukengeshanganyi, Nzambi wakamupesha bukole buvuaye ukengela bua kushintulula bikadilu biende ne kuambuluisha bakuabu bua balue bena Kristo. (1 Kolinto 15:9, 10; 1 Timote 1:12-14) Paulo wakeyemena Nzambi ne muoyo mujima bua amuambuluishe bua kutantamena ntatu yonso yakapetaye.

 “Bualu bukole buanyi budi buenda buvuijibua bupuangane mu butekete.” Mukalenge Yehowa a wakavuluija Paulo ne: bukole buende budi butamba kumuenekela kudi bantu badi ne butekete anyi bena mapanga. (2 Kolinto 4:7; 12:8) Padi bena Kristo bamanya mikalu yabu ne beyemena Yehowa, badi bitaba bua bukole buende bubambuluishe bikole menemene. (Efeso 3:16; Filipoyi 4:13) Mu ngumvuilu au ke mudi bukole bua Nzambi bumuenekela kudi bantu badi ne butekete.

 Paulo wakafundila bena Kristo ba ku Kolinto mukanda ku bukole bua nyuma bu mu 55 P.Y. Mu tshitupa tshia ndekelu tshia mukanda au, wakaleja ne: uvua ne bukokeshi bua kuikala mupostolo. Wakaleja nanku bualu bantu bakuabu bavua badivuije balongeshi bavua bamupetula, pamuapa bamulumbuluisha bua tshimuenekelu tshiende anyi ngakuilu wende.​—2 Kolinto 10:7-10; 11:5, 6, 13; 12:11.

 Bua kudibingisha, wakaleja ne: bu yeye mudieyemene kavua mua kuenza mudimu wende anyi kutantamena ntatu ya bungi to. (2 Kolinto 6:4; 11:23-27; 12:12) Mu nshapita wa 12 wakakula bua “dieba mu mubidi” dia mu tshimfuanyi pamuapa lutatu lua munanunanu lua ku mudibi anyi kanyinganyinga. (2 Kolinto 12:7) Nansha muvuaye kayi mumvuije lutatu luende alu, wakadisuika bua kulunanukila ne diambuluisha dia Nzambi.

 Lelu bena Kristo pabu badi mua kutuilangana ne ntatu anyi dikengeshibua. Kumanya ne: bukole bua Nzambi budi mua kubambuluisha bua kunanukila mu ntatu yonso idibu mua kupeta kudi kubakolesha. Anu bu Paulo, badi mua kuamba ne dishindika dionso ne: “Pandi ne butekete ke pandi ne bukole.”​—2 Kolinto 12:10.

 Tangila filme muîpi eu bua kumona kadiosha ka mukanda wa 2 Kolinto.