“Kadi badi batekemena kudi Yehowa nebapetulule bukole. Nebaye muulu ne mapuapua bu nyunyi ya mikanku. Nebanyeme lubilu, kabakupungila to; nebende, kabakutshioka to.”​—Yeshaya 40:31, Nkudimuinu wa bulongolodi bupiabupia.

 ‘Badi bindila Yehowa nebasangishe bukole buabu; nebabande muulu ne mapuapua bu nyunyi ya mikanku, nebanyeme lubilu ne kabena bapungila, nebende ne kabena bateketa.’​—Yeshaya 40:31, Mukanda wa Nzambi.

 Yehowa a Nzambi udi ulaya batendeledi bende ne: neabapeshe bukole budibu nabu dijinga bua kutantamena anyi kunanukila mu malu onso adibu mua kutuilangana nawu.

 “Badi batekemena kudi Yehowa nebapetulule bukole.” Badi batekemena kudi Nzambi anyi beyemena bukole ne dijinga diende dia kuambuluisha bantu bende, badi mua kuikala batuishibue ne: neabambuluishe. (Nsumuinu 3:5, 6) Nzambi utu wenza mudimu ne nyuma wende muimpe anyi bukole buenzeji bua kuambuluisha badi bamutendelela.​—Luka 11:13.

 “Nebaye muulu ne mapuapua bu nyunyi ya mikanku.” Ngakuilu wa mu tshimfuanyi eu udi uleja buenzeji budi bukole bua Nzambi mua kuikala nabu kudi muntu. Mpepele ya luya idi ibanda muulu ke itu yambuluisha nyunyi wa mukanku bua kubanda muulu ne kubalula mapuapua kayi upapala to. Padi mukanku upeta lupepele lua luya ludi lubanda muulu, udi ubalula mapuapua ne unyungulukamu, mpindieu lupepele alu ludi luwubandisha muulu mule menemene. Padiwu upitshila mu mpepele ya luya mishilashilangane ya nanku, udi mua kushala muulu mutantshi wa mêba mavule ne kuya muaba mukuabu kabiyi biwulomba makanda a bungi to.

 “Nebanyeme lubilu, kabakupungila to.” Ntatu utudi tutuilangana nayi idi mua kututekesha anyi kututshiokesha mu lungenyi, kadi tudi mua kunanukila ku diambuluisha dia bukole budi Nzambi utupesha. Bukole abu budi mua kutuambuluisha bua kuenza malu mimpe nansha tuetu mu ntatu mikole. Mupostolo Paulo uvua munanukile mu ntatu mipite bungi wakafunda ne: “Bua malu onso ndi ne bukole ku diambuluisha dia yeye udi umpesha bukole.”​—Filipoyi 4:13.

 Nzambi wakasaka muprofete Yeshaya bua kufunda mêyi au ku bukole bua nyuma mu bidimu bia 700 K.Y. Nansha mudi mvese au utangila batendeledi ba Nzambi bonso ba lulamatu, pamuapa Yehowa wakafundisha mêyi au bua kukankamija bena Yuda bavuabu baye nabu mu Babilona munkatshi mua bidimu 70. Pakapingana bena Yuda mu ditunga diabu, bakamona muvua mêyi a Nzambi au makumbane. (Yeshaya 40:1-3) Nzambi wakabapesha bukole bua kuenza luendu lule ne lua njiwu kumbukila ku Babilona too ne ku Yelushalema b mu tshidimu tshia 537 K.Y.​—Yeshaya 40:29.