“Bua malu onso ndi ne bukole ku diambuluisha dia yeye udi umpesha bukole.”​—Filipoyi 4:13, Nkudimuinu wa bulongolodi bupiabupia.

 “Ndi mua kuenza malu onso mu bukole bua [Kristo] udi unkolesha.”​—Filipoyi 4:13, Muanda Mulenga Lelu.

 Mêyi avua mupostolo Paulo mufunde aa, adi ajadikila bantu badi batendelela Nzambi ne: nebapete bukole bua kuenza disua diende.

 Nkudimuinu mikuabu ya Bible idi ileja ne: Kristo ke uvua mupeshe Paulo bukole. Kadi muaku “Kristo” kawena usanganyibua mu maniskri a kale menemene a mu tshiena Greke to. Ke bualu kayi, bakudimunyi ba bungi ba matuku etu aa badi bafunda ne: “yeye udi umpesha bukole” (Nkudimuinu wa bulongolodi bupiabupia), “udi unkolesha” (Mukanda wa Nzambi), ne ‘udi mpokolo wa bukole buanyi’ (New American Bible). Kadi Paulo uvua wakula bua nganyi?

 Malu akavua Paulo mufunde mu mukanda umue umue eu adi aleja ne: uvua wakula bua Nzambi. (Filipoyi 4:6, 7, 10) Anu mu mukanda umue eu, Paulo ukavua mufundile bena mu Filipoyi ne: “Nzambi . . . ke udi unupesha . . . bukole bua kuenza malu adi amusankisha.” (Filipoyi 2:13) Ne mu 2 Kolinto 4:7 wakafunda ne: Nzambi ke uvua umupesha bukole bua kuenza mudimu wa diyisha bimpe. (Fuanyikija ne 2 Timote 1:8.) Nunku, kudi malu adi atusaka bua kuamba ne: Paulo uvua wakula bua Nzambi pavuaye mufunde ne: “yeye udi umpesha bukole.”

 Ntshinyi tshivua Paulo usua kuamba pakafundaye ne: uvua ne bua kupeta bukole “bua malu onso”? Pamuapa malu avuaye muakuile avua atangila nsombelu mishilashilangane ivuaye upeta pavuaye wenza disua dia Nzambi. Ikale ne bikese anyi bia bungi, uvua mueyemene Nzambi bua amuambuluishe. Nunku wakamanya mua kusanka ne bivuaye nabi mu nsombelu yonso.​—2 Kolinto 11:23-27; Filipoyi 4:11.

 Mêyi a Paulo adi mua kuambuluisha batendeledi ba Nzambi lelu. Nzambi neabapeshe bukole budibu bakengela bua kutantamena ntatu ne kuenza disua diende. Udi mua kubapeshabu kupitshila ku nyuma wende muimpe, anyi bukole buenzeji, ku batendeledi bende ne ku Bible Dîyi diende.​—Luka 11:13; Bienzedi 14:21, 22; Ebelu 4:12.

 Mêyi aa nga mu mêyi a ndekelu a mu mukanda uvua Paulo mufundile bena Kristo ba mu Filipoyi. Uvua mubafundile mukanda au bu mu 60-61 P.Y., mu tshikondo tshivuabu bamuele mu buloko mu Lomo bua musangu wa kumpala. Munkatshi mua tshikondo kampanda, bena Kristo ba mu Filipoyi kabavua bambuluishe Paulo ne bintu bia ku mubidi to. Kadi dîba adi bavua bafuma ku dimutumina bintu bivuaye mua kudiambuluisha nabi.​—Filipoyi 4:10, 14.

 Paulo wakela bena Kristo ba mu Filipoyi kalumbandi ne muoyo mujima bua muoyo wabu wa kupa, kubafundilaye mukanda ubajadikila ne: bavua bakumbaje majinga ende. (Filipoyi 4:18) Wakababidila kabidi mpunga au bua kubaleja bulelela bua mushinga budi butangila nsombelu wa buena Kristo ebu: Bena Kristo bonso nansha bobu bapele anyi babanji, badi mua kusanka ne bidibu nabi padibu beyemena Nzambi bua abambuluishe.​—Filipoyi 4:12.