“Kanusamishi mutu bua tshintu nansha tshimue, kadi mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne bieledi bienu bia meji ku butuangaji bua Kristo Yezu.”​—Filipoyi 4:6, 7, Nkudimuinu wa bulongolodi bupiabupia.

 “Kanuditatshishi bua kantu nansha kamue, apo mu dikenga dionso nunyemene ku malomba ne masambila, nuanyishe [Nzambi], numuambile majinga enu. Nanku bupole bua [Nzambi] budi bupite meji onso, nebulame mioyo yenu ne ngenyi yenu mu dina dia Kristo Yezu.”​—Filipoyi 4:6, 7, Mukanda wa Mvidi Mukulu (Katolike).

 Disambila didi mua kuambuluisha bantu ba Nzambi bua kupeta disulakana ku malu adi abalubakaja bikole anyi abakebela tunyinganyinga tupite bukole. Nzambi mmulaye bua kubapesha ditalala mu muoyo wabu diabambuluisha bua kutantamena malu adi abasamisha mutu ne bua kulama meji abu ne mioyo yabu. Mu mvese 6 mudi mishindu ya kusambila idi mua kubapetesha ditalala dia buena edi.

 Masambila a disengelela mmasambila a muntu ulomba Nzambi diambuluisha umutendekena ne muoyo mujima. Muntu udi mua kusengelela Nzambi mu disambila padi malu mamutonde anyi padiye mu njiwu anu muakenza Yezu. (Ebelu 5:7) Masambila a nanku batu baambulula njila ne njila.

 Milombu mmalu masunguluke adi muntu ulomba Nzambi. Bantu ba Nzambi badi mua kumulomba nanku “mu malu onso,” tuambe ne: “mu nsombelu kayi yonso.” Kadi masambila a nanku adi ne bua kuikala umvuangana ne disua dia Nzambi didi dileja mu Bible.​—1 Yone 5:14.

 Masambila a disakidila Nzambi ngatudi tumuela nawu tuasakidila bua malu adiye mutuenzele ne ikalaye mua kutuenzela kabidi. Patudi tutuma meji etu ku malu atudi ne bua kuelela Nzambi tuasakidila, bidi bituambuluisha bua kushala anu ne disanka mu malu onso.​—1 Tesalonike 5:16-18.

 Padi Nzambi umvua masambila a mushindu au, udi upesha batendeledi bende ditalala. “Ditalala dia Nzambi” nditukija didi muntu upeta padiye udimona nende mu bulunda bukole. (Lomo 15:13; Filipoyi 4:9) Ditalala edi “didi dipite dijungulula dionso dia malu” bualu ndia kudi Nzambi ne didi mua kutuambuluisha kupita ne mutuvua belele meji.

 Mvese eu udi wamba ne: ditalala dia Nzambi didi mua kulama mioyo yetu. Muaku wa tshiena Greke udibu bakudimune bu ‘kulama’ mmuanabu ne muaku wa mu busalayi udi uleja tshivua tshisumbu tshia basalayi tshienza kale bua kulama tshimenga tshivua tshikolesha ne ngumbu. Bia muomumue, ditalala dia Nzambi didi dikuba meji a muntu ne muoyo wende. Didi dimuambuluisha bua kubenga kuzengela mu lungenyi padi malu mamutonde.

 Ditalala didi Nzambi utupesha didi ditukuba “ku butuangaji bua Kristo Yezu,” bualu mu Yezu ke mutudi mua kudila bulunda ne Nzambi. Yezu wakafila muoyo wende bu mulambu wa tshia kutupikula natshi bua mpekatu yetu. Tuetu ne ditabuja kudiye, netupete mabenesha a kudi Nzambi. (Ebelu 11:6) Yezu ngudi kabidi ututuangaja ne Nzambi patudi tusambila. Yezu wakamba ne: “Muntu kena mua kulua kudi Tatu kayi mupitshile kundi to.”​—Yone 14:6; 16:23.

 Mukanda wa Filipoyi udi mu Bible mmukanda uvua mupostolo Paulo mufundile bena Kristo ba mu tshimenga tshia Filipoyi. a Mu tshitupa tshikadi bu nshapita 4 wa mukanda eu mpindieu, Paulo uvua ukankamijamu bavua mu tshisumbu bua kusankabu, ubela tuasakidila bua muoyo wabu wa dipeshangana bintu uvua mumusankishe pende. (Filipoyi 4:4, 10, 18) Udi ulejamu mudi disambila difikishangana ku ditalala dia Nzambi, ulejamu kabidi malu mimpe a kuelela meji ne bienzedi bimpe bidi mua kupetesha muntu diambuluisha dia kudi “Nzambi wa ditalala.”​—Filipoyi 4:8, 9.