“Nzambi udi utubela bua kuikala ne dinanga dia buena diende mu mushindu eu: patutshivua benji ba mpekatu, Kristo wakatufuila.”​—Lomo 5:8, Nkudimuinu wa bulongolodi bupiabupia.

 “Tshimanyinu tshia mudi [Nzambi] mutunange, mpadi Kristo mutufuile tuetu batshikale bena mibi.”​—Lomo 5:8, Mukenji Mulenga.

 Yehowa a Nzambi wakaleja mudiye mutunange bikole pavuaye muitabe bua Muanende, Yezu Kristo, afuile bantu bena mpekatu. (Yone 3:16) Bu mudi bantu bena mpekatu, batu anu bela meji ne benza malu mu mushindu udi ubengangana ne mikenji miakane ya Nzambi. (Kolosayi 1:21, 22) Kadi, Nzambi wakatulengeja nende “ku diambuluisha dia lufu lua Muanende.” (Lomo 5:10) Ke bualu kayi, tudi ne mushindu wa kudia bulunda buimpe ne Nzambi mpindieu ne tudi ne ditekemena dia muoyo wa kashidi mu matuku atshilualua.​—Lomo 5:11; 1 Yone 4:9, 10.

 Bena Kristo bavua mu Lomo ke bavua mupostolo Paulo mufundile mêyi au. Mu nshapita 5 wa mukanda uvua Paulo mufundile bena Lomo, wakumvuija bua tshinyi bena Kristo bavua mua kusanka batuishibue bua ditekemena diabu. (Lomo 5:1, 2) Ditekemena adi “kadiena dielangana mâyi ku makasa,” bualu ndishindamene pa dinanga dikole divua Nzambi mulejile mu Yezu. (Lomo 5:5, 6) Yezu wakatumikila Nzambi mu malu onso, bualu buvua Adama kayi muenze to. (Lomo 5:19) Dibenga kutumikila dia Adama diakafikisha ndelanganyi yende ku mpekatu ne ku lufu. (Lomo 5:12) Kadi ku diambuluisha dia ditumikila dia Yezu ne mulambu wende, bantu badi batumikila badi ne ditekemena dia kupeta muoyo wa tshiendelele.​—Lomo 5:21.