“Bualu kakuena dîyi dikala Nzambi kayi mua kukumbaja to.”​—Luka 1:37, Nkudimuinu wa bulongolodi bupiabupia.

 “Bualu kakuena tshidi [Nzambi] kayi mua kuenza.”​—Luka 1:37, Mukanda wa Mvidi Mukulu (Katolike)

 Nzambi Wa Bukole Buonso udi mua kuenza malu adi amueneka makole ku mêsu kua bantu. Kakuena tshidi mua kumupangisha bua kukumbaja tshidiye wamba anyi ulaya to.

 Muaku wa mu muakulu wa ntuadijilu udibu bakudimune ne: “dîyi” udi mua kumvuija “bualu buamba.” Bua apa, bualu abu mbua kudi Nzambi. Udi mua kumvuija kabidi tshipeta tshia bualu budi Yehowa a Nzambi muambe. Bu mudi Dîyi dia Nzambi dikumbana misangu yonso, badi mua kukudimuna kabidi Luka 1:37 ne: “Bualu milayi ya Nzambi kayena mua kupanga kukumbana to” anyi ne: “Bualu kakuena tshidi [Nzambi] kayi mua kuenza.” Diumvuija dia mêyi a mu tshiena Greke au didi dipatula bulelela bumue bumue bua mushinga ebu: Mêyi a Nzambi onso anyi milayi yende yonso neyikumbane, bualu kakuena tshidi mua kumukolela to.​—Yeshaya 55:10, 11.

 Mu Bible mudi biambilu bia muomumue bidi biakula bua milayi ya Nzambi. Tshilejilu ku butuangaji bua muanjelu, Yehowa wakalaya Sala mukaji wa Abalahama uvua kayi ulela ne: uvua ne bua kuimita ku bukulaja buende. Nzambi wakasakidila ne: “Kudiku tshintu tshidi tshitambe Yehowa bukole anyi?” (Genese 18:13, 14) Nkambua wetu Yobo mumane kuela meji a bufuki, wakamba bua Nzambi ne: “Kakuena bualu buudi wela meji bua kuenza budi mua kukukolela nansha.” (Yobo 42:2) Pakelakane bayidi ba Yezu pabu ne: kabavua mua kukumbana bua Nzambi abapandishe, Yezu wakabavuluija ne: “Bua Nzambi malu onso adi mua kuenzeka.”​—Matayi 19:25, 26. b

 Muanjelu udibu babikila ne: Gabaliele wakamba mêyi adi mu Luka 1:37. Wakaambila nsongakaji muena Yuda utshivua kamama uvuabu babikila ne: Mariya. Gabaliele uvua ufuma ku dimuambila ne: uvua ne bua kulela “Muana wa Mutambe Bunene”; uvua ne bua “kumuinyika ne: Yezu.” Muana au uvua ne bua kulua Mukalenge wa Bukalenge bua Nzambi buakokesha bua kashidi.​—Luka 1:26-33; Buakabuluibua 11:15.

 Mariya wakakonka mushindu uvua bualu bua nanku mua kuenzeka bualu kabavua banji kumusela to, kavua “muanji kusangila ne mulume.” (Luka 1:34, 35) Gabaliele wakamuandamuna ne: Nzambi uvua ne bua kuenza malu ne nyuma wende muimpe anyi bukole buenzeji. Tshikondo atshi, Yezu uvua muana wa Nzambi wa mu nyuma mu diulu. Nunku Yehowa wakela muoyo wende mu tshishima munda mua Mariya ku diambuluisha dia nyuma wende muimpe. (Yone 1:14; Filipoyi 2:5-7) Ke yeye kuimita mu tshishima. Muanjelu wakakolesha ditabuja diende mu bukole budi nabu Nzambi, kumuambilaye ne: mulela wende Elizabeta uvua muimite pende muana wa balume “mu bukulakaja buende” kukavua tumatuku. Elizabeta ne bayende Zekâya kabavua balele bana to bualu Elizabeta uvua nkumba. (Luka 1:36) Muanabu wakalua Yone Mubatiji, ukavua Yehowa pende mumanyishe mudimu wende.​—Luka 1:10-16; 3:1-6.

 Pashishe muanjelu Gabaliele wakamba mêyi adi mu Luka 1:37, pamuapa muikale ne Mariya ne Elizabeta mu meji. Lelu mêyi au adi ajadikila batendeledi ba Yehowa ne: neatungunuke ne kukumbaja milayi yende, bu mudi wa bukokeshi buakane bua Muanende Yezu Kristo Mukalenge wa Bukalenge buende bua mu diulu buapingana mbulamatadi ya bana ba bantu.​—Danyele 2:44; 7:13, 14.

 Tangila filme muîpi eu bua kumona kadiosha ka mukanda wa Luka.