DIUMVUIJA DIA MVESE YA MU BIBLE

Mâko 1:15—“Bukalenge bua Nzambi bukadi pabuipi”

TELEJA MU

“Tshikondo tshisungula tshikadi tshikumbane, Bukalenge bua Nzambi mbusemene pabuipi. Nyingalalayi bua mpekatu yenu, ne nuitabuje lumu luimpe.”—Mâko 1:15, Nkudimuinu wa bulongolodi bupiabupia.

‘Dîba diakukumbana. Bukalenge bua Nzambi bukadi pabuipi; kudimunayi mioyo yenu, anyishayi Muanda Mulenga.’—Mâko 1:15, Muanda Mulenga Lelu.

Diumvuija dia Mâko 1:15

Yezu Kristo wakamba ne: Bukalenge bua Nzambi a bukavua “pabuipi,” anyi bukavua “busemene pabuipi,” bualu yeye ke uvua ne bua kulua Mukalenge wa Bukalenge abu ne uvua muaba au munkatshi mua bavua bamuteleja.

Yezu kavua usua kuamba ne: Bukalenge abu bukavua butuadije kukokesha to. Bushuwa, wakalua kuleja bayidi bende pashishe ne: Bukalenge abu butshivua bua matuku atshilualua. (Bienzedi 1:6, 7) Kadi, Yezu wakafika anu pa dîba, mu tshidimu menemene tshikavua Bible mumanyishe tshivuaye ne bua kumueneka bu Mukalenge. b Ke bualu kayi, wakamba ne: “Tshikondo tshisungula tshikadi tshikumbane,” mmumue ne: tshikondo tshia yeye kutuadija mudimu wende wa diyisha evanjeliyo, anyi lumu luimpe, ludi lutangila Bukalenge.—Luka 4:16-21, 43.

Bua bantu kupetabu masanka a lumu luimpe lua Bukalenge, badi ne bua kunyingalala, mmumue ne: kumvua bibi bua mpekatu ivuabu benze ku kale ne kutumikila mikenji ya Nzambi. Bantu bavua banyingalale bakaleja ne: bavua bitabuje lumu luimpe lua Bukalenge bua matuku atshilualua abu.

Malu adi Mâko 1:15 wakuila

Yezu wakamba mêyi au ku ntuadijilu kua mudimu wende mu Galela. Matayi 4:17 udi wakula bua bualu bumue bumue ebu udi uleja ne: “Kutuadijila anu dîba adi,” Yezu wakayisha Bukalenge bua Nzambi. Bukalenge abu ke buvua tshiena-bualu tshia mudimu wa Yezu wa diyisha. Bushuwa, mbabutele misangu mipite pa 100 mu Evanjeliyo inayi c, ya bungi yakudiyi mu mêyi akamba Yezu. Mu Bible, Yezu wakakula bikole bua Bukalenge bua Nzambi kupita tshiena-bualu tshikuabu kayi tshionso.

Bala Mâko nshapita wa 1 pamue ne malu mumvuija mu mamanyisha a kuinshi kua dibeji, mvese idibu baledilamu, bimfuanyi, ne karte.

a Bukalenge bua Nzambi mmbulamatadi wa mu diulu mujadika kudi Nzambi bua kukumbaja disua diende bua buloba. (Danyele 2:44; Matayi 6:10) Bua kumanya malu makuabu, tangila tshiena-bualu tshia “Bukalenge bua Nzambi ntshinyi?”

b Yezu uvua ne bua kulua mukalenge bua kukumbaja umue wa ku midimu yende bu Masiya mulaya, muleji mpala wa Nzambi wa pa buende. Bua kumanya malu makuabu adi atangila milayi ya buprofete ya mu Bible idi yakula bua Yezu bu Masiya, tangila “Milayi ya buprofete ya bualu bua Masiya idi ijadika ne: Yezu ke Masiya au anyi?”

c Evanjeliyo mmikanda inayi ya kumpala ya mu Mifundu ya mu tshiena Greke ya buena Kristo, idibu batamba kubikila ne: Dipungila Dipiadipia, idi yakula bua nsombelu wa Yezu ne mudimu wende wa diyisha.