“Yeye mmuenze tshintu tshionso tshilengele mu tshikondo tshiatshi. Uvua mene muteke lungenyi lua dikalaku tshiendelele mu muoyo wabu; nansha nanku bantu kabakujingulula mudimu udi Nzambi mulelela muenze ku ntuadijilu too ne ku ndekelu to.”​—Muambi 3:11, Nkudimuinu wa bulongolodi bupiabupia.

 “Yeye wakafuka tshintu tshionso tshiakane mu tshikondo tshiatshi; wakateka lungenyi mu mitshima ya bantu, kadi kabena bamanye mua kujingulula mudimu wa Nzambi wakenzaye ku tshibangidilu tshia buloba tô ne kunshikidilu kuabu.”​—Muambi 3:11, Mukanda wa Nzambi.

 “Yeye mmuenze tshintu tshionso tshilengele mu tshikondo tshiatshi.” Muaku wa mu tshiena Ebelu udibu bakudimune muaba eu ne: “tshilengele” kawena anu umvuija bulengele bua mubidi anyi bua tshintu to. Badi kabidi mua kuwukudimuna ne: “tshilongolola bimpe,” “tshiakane,” anyi “tshikumbane.” (Muambi 3:11, dimanyisha) Midimu mimpe ya Nzambi kayena anu itangila bintu bionso bidiye mufuke to, kadi idi itangila kabidi bionso bidiye wenza bua kukumbaja disua diende.​—Danyele 2:21; 2 Petelo 3:8; Buakabuluibua 4:11.

 “Uvua mene muteke lungenyi lua dikalaku tshiendelele mu muoyo wabu.” Nzambi wakafuka bantu bua bashale ne muoyo kashidi. (Misambu 37:29) Nunku bidi biumvuika bimpe ne: mmuteke kabidi lungenyi alu munda muabu. Kadi Adama ne Eva (bena dibaka ba kumpala) kabakatumikila Nzambi to; biakabakebela bobu ne ndelanganyi yabu lufu. (Genese 3:17-19; Lomo 5:12) Nansha nanku, Nzambi mmulaye bua ‘kukumbaja dijinga dia tshintu tshionso tshidi ne muoyo,’ too ne dijinga dia bantu dia kushala ne muoyo kashidi. (Misambu 145:16) Bible udi umvuija mudi Yehowa muenze malu bua bantu bapete kabidi ditekemena dia muoyo wa tshiendelele.​—Lomo 6:23.

 “Bantu kabakujingulula mudimu udi Nzambi mulelela muenze ku ntuadijilu too ne ku ndekelu to.” Meji a Nzambi kaena kujingulula, ke bualu kayi Bible udi wamba ne: meji ende kaena “kulondolola.” (Lomo 11:33) Nansha nanku, Nzambi udi ne dijinga dia kusokoluela bantu badi basue kumusankisha malu adiye mulongolole.​—Amosa 3:7.

 Mukanda wa Muambi bavua bawufunde kudi mukalenge Solomo wa mu Isalele wa kale, uvua mumanyike bikole bua meji avua Nzambi mumupeshe. Mu mukanda eu mudi mibelu mimpe ya mua kumanya malu adi ne mushinga ne adi kaayi ne mushinga. (Muambi 1:2, 3; 2:1, 17; 7:1; 12:1, 13) Mu nshapita 3, Solomo wakumvuija malu makuabu adi atangila anu dikalaku dia bantu. Wakatelamu malu a bungi mashilashilangane. (Muambi 3:1-8, 10) Nzambi mmupeshe bantu budikadidi bua kudisunguila malu adibu basue kuenza ne tshikondo tshia kuenza. (Dutelonome 30:19, 20; Yoshua 24:15) Solomo wakumvuija ne: bantu badi mua kupetela bushuwa disanka ku bipeta bia mudimu wabu mukole anu padibu beleshangana diboko ne malu adi Nzambi mulongolole ne banemeka ‘tshikondo tshidiye musungule,’ mmumue ne: kalandriye kende. Ke tshivua Solomo mubikile ne: “Ndipa dia kudi Nzambi.”​—Muambi 3:1, 12, 13.

 Tangila filme muîpi eu bua kumona kadiosha ka mukanda wa Muambi.