“Teka tshionso tshiudi wenza kudi Yehowa.”​—Nsumuinu 16:3, Nkudimuinu wa bulongolodi bupiabupia.

 “Uteke midimu yebe mu bianza bia [Mukalenge], biudi ujinga nebikumbane.”​—Nsumuinu 16:3, Mukanda wa Mvidi Mukulu (Katolike).

 Mvese eu udi ujadikila bonso badi batendelela Nzambi mulelela ne: malu adibu balongolola bua kuenza neende bimpe bobu bamueyemene pa kukeba buludiki buende ne kubulonda.

 “Teka tshionso tshiudi wenza kudi Yehowa.” Kumpala kua batendeledi ba Yehowa a kuangata mapangadika, batu banji kukeba buludiki buende ne didipuekesha dionso. (Yakobo 1:5) Bua tshinyi? Mbua bualu ebu: misangu ya bungi bantu batu ne bukokeshi bukese menemene pa malu adi abafikila anyi kabatu nabu to. (Muambi 9:11; Yakobo 4:13-15) Bualu bukuabu, pamuapa mbapangile meji a kukumbaja malu adibu balongolole. Ke bualu kayi, bantu ba bungi batu bateka malu abu kudi Nzambi ne meji onso. Badi benza nanku padibu bamulomba buludiki mu disambila ne benza malu mu diumvuangana ne disua diende anu mudidi dileja mu Bible, Dîyi diende.​—Nsumuinu 3:5, 6; 2 Timote 3:16, 17.

 Tshiambilu tshia ne: ‘Teka tshionso tshiudi wenza kudi Mukalenge’ b tshidi tshiumvuija ku muaku ku muaku “kubungulujila Mukalenge midimu yebe.” Bilondeshile mukanda kampanda, tshiambilu etshi tshidi tshileja “muntu udi wangata bujitu buvuaye muambule ubupesha mukuabu udi ne bukole ne mukumbane menemene bua kubuambula.” Bonso badi beyemena Nzambi ne budipuekeshi buonso bikale batuishibue ne: Nzambi neabambuluishe ne neabakuatshishe.​—Misambu 37:5; 55:22.

 Tshiambilu tshia ne: “tshionso tshiudi wenza” katshiena tshiumvuija ne: Nzambi neitabe tshionso tshidi muntu mulongolole bua kuenza anyi ne: neatshibeneshe to. Bua Yehowa kubeneshaye muntu, udi ne bua kulongolola malu ende au mu diumvuangana ne mikenji yende ne disua diende. (Misambu 127:1; 1 Yone 5:14) Nzambi katu ubenesha badi kabayi bamutumikila to. Mu bulelela, “udi utatakaja malu adi bantu babi balongolole bua kuenza.” (Misambu 146:9) Kadi eku, ukuatshisha badi baleja mudibu bamukokela pa kunemeka mikenji idiye muele mu Bible.​—Misambu 37:23.

 “Ne malu audi mulongolole neakumbane.” Imue nkudimuinu ya Bible mmikudimune tshiambilu etshi ne: ‘malu audi mulongolole neajadikibue.’ Mu Mifundu ya mu tshiena Ebelu, anyi itubu batamba kubikila ne: Dipungila Dikulukulu, muaku udibu bakudimune mu Tshiluba ne: “wakajadika” udi ne lungenyi lua kuasa bishimikidi, ne batu batamba kuwutela bua bufuki bua Nzambi budi bushindame. (Nsumuinu 3:19; Yelemiya 10:12) Bia muomumue, Nzambi udi ujadika bikole malu a bantu badi benza malu makane ku mêsu kuende, ubambuluisha bua kuikalabu ne nsombelu muimpe wa disanka, mu bukubi, ne bashindame.​—Misambu 20:4; Nsumuinu 12:3.

 Lusumuinu elu bavua balufunde kudi mukalenge Solomo, uvua mufunde tshitupa tshinene tshia mukanda wa Nsumuinu. Uvua ne bukole bua kuela nsumuinu binunu ne binunu bua meji avua Nzambi mumupeshe.​—1 Bakalenge 4:29, 32; 10:23, 24.

 Mu nshapita wa 16, Solomo mmutuadije kutumbisha meji a Nzambi, ne mmuleje mudi Nzambi mukine bena lutambishi. (Nsumuinu 16:1-5) Pashishe udi ulua kujikija ne bualu bua mushinga budi buambuluisha bantu bua kujingulula tshiena-bualu tshine tshia mukanda wa Nsumuinu tshia ne: Muntu udi mua kupeta meji malelela anyi kukumbaja malu adiye mulongolole anu yeye udipuekesha, witaba bua Nzambi amulombole. (Nsumuinu 16:3, 6-8, 18-23) Mbatambe kuambulula bulelela bua nshindamenu ebu mu Bible.​—Misambu 1:1-3; Yeshaya 26:3; Yelemiya 17:7, 8; 1 Yone 3:22.

 Tangila filme muîpi eu bua kumona kadiosha ka mukanda wa Nsumuinu.