“Longesha muana wa balume njila udiye ne bua kulonda; nansha padiye ukola kakumbukamu to.”​—Nsumuinu 22:6, Nkudimuinu wa bulongolodi bupiabupia.

 ‘Yisha muana mu njila udiye ne bua kuendela; nunku pakolaye, kena umukamu.’​—Nsumuinu 22:6, Mukanda wa Nzambi.

 Baledi badi balongesha bana babu bua kunanga Nzambi ne kutumikila mikenji yende badi mua kutekemena ne: dilongesha adi nediambuluishe bana matuku abu onso a muoyo.

 “Longesha muana njila udiye ne bua kulonda.” Badi mua kukudimuna kabidi mêyi aa ne: ‘yisha muana mu njila udiye ne bua kuendela.’ Mukanda wa Nsumuinu udi ukankamija baledi misangu ne misangu bua kulongesha bana babu tshidi tshimpe ne tshidi tshibi katshia ku buana. (Nsumuinu 19:18; 22:15; 29:15) Kadi baledi bimpe mbamanye ne: anu bu bantu bakole, bana babu badi pabu ne budikadidi bua kudisunguila malu. Nanku kabena anu babambila tshia kuenza patupu to, badi babeleshisha meji ne babambuluisha bua kulua bantu bakole bashindame badi mua kudiangatshila mapangadika mimpe nkayabu.​—Dutelonome 6:6, 7; Kolosayi 3:21.

 Kudi bamanyi ba malu a mu Bible badi baleja ne: tshiambilu etshi tshidi tshiumvuija “kulongesha muana bilondeshile tshidiye,” anyi bilondeshile majinga ende a ku tshifukilu. Diumvuija adi didi mua kumueneka bu dimpe, kadi tshiambilu tshia mu tshiena Ebelu tshidibu bakudimune ne: “mu njila udiye ne bua kulonda” tshidi pamuapa tshileja kuikala ne nsombelu muimpe ne muakane. Mukanda wa Nsumuinu udi uleja njila ibidi idi muntu mua kuendela. Wa kumpala badi bamubikila ne: “njila wa bantu bimpe,” “njila wa meji,” ne “njila mululame.” (Nsumuinu 2:20; 4:11; 23:19) Muibidi badi bamubikila ne: “njila wa bena malu mabi,” “njila wa muntu mutshimbakane,” ne “njila mubi.” (Nsumuinu 4:14; 12:15; 16:29) Nunku njila udi muana “ne bua kulonda” udi uleja “njila mululame,” mmumue ne: nsombelu udi Bible Dîyi dia Nzambi ulongesha.​—Misambu 119:105.

 “Nansha padiye ukola kakumbukamu to.” Padi baledi balongesha bana babu mikenji ya Nzambi ya bikadilu, bana abu mbafuane kushala mu njila mululame matuku abu onso a muoyo. Kadi abi kabiena biumvuija ne: muana udibu balongeshe bimpe ‘kakumbuka’ mu njila mululame pa kubenga kutumikila mikenji ya Nzambi to. Tshilejilu, muntu yeye usomba ne bantu badi bakankamija bakuabu bua kuenza malu mabi, udi mua kulekela ‘njila mululame’ ne kuenza malu mabi. (Nsumuinu 2:12-16; 1 Kolinto 15:33) Nansha nanku, padi baledi balongesha bana babu bua kutumikila mikenji ya Nzambi badi babapesha mpunga mutambe buimpe wa kututa diakalengele mu nsombelu wabu.​—Nsumuinu 2:1, 11.

 Nsumuinu nshapita wa 22 mmuenze ne mêyi mîpi adi aleja mutudi mua kutumikila meji a Nzambi mu nsombelu mishilashilangane. Kudi mvese idi ileja mushinga wa kuikala ne lumu luimpe ku mêsu kua Yehowa. a Lumu alu muntu udi mua kulupeta padiye udipuekesha, muikale tshipapayi, ne muenji wa mudimu. (Nsumuinu 22:1, 4, 9, 29) Mvese mikuabu idi ileja ne: bantu badi babenga kutumikila mikenji ya Nzambi ne bakengesha bapele nebakenge bibi menemene.​—Nsumuinu 22:8, 16, 22-27.

 Nansha mudi mvese ya bungi ya mu Nsumuinu nshapita wa 22 kayiyi yakula bua kulongesha muana, idi yumvuija nsombelu udi ufikisha ku dianyishibua kudi Nzambi ne ku disanka dilelela. (Nsumuinu 22:6) Padi baledi balongesha bana babu bua kuikala ne nsombelu au badi baleja ne: mbasue bua bikale ne nsombelu mutambe buimpe.​—Efeso 6:1-3.

 Tangila filme muîpi eu bua kumona kadiosha ka mukanda wa Nsumuinu.