Balunda balelela batu beyemenangana. Batu ne lulamatu kudi umue ne mukuabu, batabalelangana, nangananga mu bikondo bia ntatu anu mutu bana ba muntu balamatangane.

 “Mulunda mulelela udi uleja dinanga mu bikondo bionso.” Tshiambilu etshi badi mua kutshikudimuna kabidi ne: “Balunda batu balejangana dinanga misangu yonso.” Muaku wa mu tshiena Ebelu udibu bakudimune ne: “dinanga” mu tshiambilu etshi, udi umvuija malu a bungi kupita mushindu udi muntu umvua bua muntu mukuabu. Ndinanga muntu mukuabu kakuyi lubombo, didi dilejibua mu bienzedi. (1 Kolinto 13:4-7) Balunda badi banangangane mushindu eu badi ne lulamatu kudi umue ne mukuabu padibu bapeta ntatu idi mua kunyanga bulunda buabu bu mudi kumvua malu bibi ne ntatu mikuabu ya mu nsombelu. Badi kabidi bafuilangana luse ne muoyo mujima. (Nsumuinu 10:12) Kabidi balunda kabatu bumvuilangana mukawu padi malu a umue enda bimpe to. Kadi, udi usanka bua mulunda wende.​—Lomo 12:15.

 “Mulunda mulelela . . . mmuanetu udi muledibue bua bikondo bia dikenga.” Lusumuinu elu nduimanyine pa lungenyi lua ne: bana ba muntu batu balamatangane bikole. Ke bualu kayi, patudi tuenza muetu muonso bua kuambuluisha mulunda wetu udi mu dikenga, tudi tuenza malu anu mudi bana ba muntu ne bua kuenzelangana malu. Kabidi, bantu badi badie bulunda bua dinanga dia nunku, kabatu balekelangana padi ntatu imueneka to. Kadi, badi bakolesha bulunda buabu bualu mbanangangane ne badi banemekangana bikole.

 Mukanda wa Nsumuinu udi ne ngenyi ya meji ya bungi mifunda mu tshikoso ne mu mushindu udi ufikisha mubadi ku diela meji. Mukalenge Solomo wakafunda tshitupa tshinene tshia mukanda wa mu Bible eu. Mfundilu wende mmufuanangane ne wa kasala wa bena Ebelu, pamutu pa kufunda miaku idi ijika mu mushindu wa diatshimue, mbafunde ngenyi ya diatshimue, lumue lungenyi lushindika tshidi lukuabu luamba peshi ileja ngenzelu ya malu ibidi mishilangane. Nsumuinu 17:17 ntshilejilu tshia mfundilu wa mu kasala au, tshitupa tshibidi tshia mvense tshidi tshishindika lungenyi ludi mu tshitupa tshia kumpala. Nsumuinu 18:24 ntshilejilu tshia ngenyi ibidi mishilangane. “Kudi balunda badi pabuipi bua kuzazangana, kadi kudi mulunda udi ulamata bikole kupita muanabu ne muntu.”

 Pavua Solomo mufunde Nsumuinu 17:17, uvua mua kuikala wela meji a bulunda bukole buvua pankatshi pa tatuende Davidi ne Yonatana muana wa mukalenge Shaula. (1 Samuele 13:16; 18:1; 19:1-3; 20:30-34, 41, 42; 23:16-18) Nansha muvua Davidi ne Yonatana kabayi bana ba muntu , bavua balamatangane bikole kupita bana ba muntu. Yonatana wakateka too ne muoyo wende mu njiwu bua kukuba mulunda wende utshivua nsonga. a

 “Mulunda muimpe neakuambuluishe mu malu onsu. Muanetu udi pamue nanyi mu dikenga dionsu.”​—Mukanda wa Mvidi Mukulu (Mishonyi).

 “Mulunda webe udi ukunanga diba dionso, kadi muanenu udi ukenga nebe mu makenga onso.”​—Mukanda wa Mvidi Mukulu (Katolike).

 Tangila filme muîpi eu bua kumona kadiosha ka mukanda wa Nsumuinu.