Yehowa uvua wambila bena Yuda ba mu tshikonda tshia muprofete Yelemiya malu adi mu mvese eu. Bu muvua bantu balengulule mikenji miakane ya Yehowa a ne mibelu mimpe ivua baprofete bende babapeshe, Yehowa kavua mua kubakuba ku bipeta bibi bia njila yabu mibi to.​—Nsumuinu 1:24-32.

 “Nunku, mona tshidi Yehowa wamba.” Muaku wa ne: “Nunku,” udi utuangaja mvese wa 1 ne mikuabu idi ilonda. Mu Yelemiya 11:1-10, Yehowa wakambila bantu bende ne: bavua bashipe tshipungidi tshivuaye mudie ne bankambua babu anyi dîyi divuabu basuike. (Ekesode 24:7) Bena Yuda bakatuadija kutendelela mpingu pamutu pa kutendelela Mufuki wabu. Nunku, bu mukavuabu batendelela mpingu, bakenza malu mabi a bungi; kufikabu too ne ku dilambula bana babu mu kapia.​—Yelemiya 7:31.

 “Mona ndi mbatumina dikenga.” Misangu yonso itu Bible wamba ne: Nzambi mmuenze bualu kampanda, bidi biumvuija ne: mmubulekele bua buenzeka. Ke mudibi kabidi bua tshivua bantu bende benze. Pavuabu baditue mu ditendelela nzambi ya dishima pamutu pa kumutendelela yeye, bakadikebela nkayabu ntatu mibi mitambe, kuenzabi bua Yehowa kabakubi kabidi to. Bua bualu abu, mukalenge wa Babilona wakapeta mushindu wa kubutula Yelushalema, kukuata benamu kuya nabu. Nzambi ya dishima ivua bantu beyemene ayi kayivua mua kubasungila to.​—Yelemiya 11:12; 25:8, 9.

 “Padibu bambikila bua kubambuluisha, tshiakubateleja to.” Yehowa katu uteleja masambila a bantu badi ne ‘bianza biuwule tente ne mashi’ anyi badi beyemena nzambi ya dishima bua ibasungile to. (Yeshaya 1:15; 42:17) Kadi utu uteleja masambila a bantu badi banyingalale ne muoyo mujima bua bilema bivuabu benze ne bapingane kudiye.​—Yeshaya 1:16-19; 55:6, 7.

 Mu 647 K.Y., Yehowa wakasungula Yelemiya bua kuikala muprofete. Yelemiya wakadimuija bantu ba mu Yuda bua dilumbuluisha dia Nzambi dikavua pakufika munkatshi mua bidimu 40. Kadi bakateka mutu mukole. Tshikondo atshi, Yelemiya wakafunda malu adi mu Yelemiya 11:11. Ndekelu wa bionso malu avuaye mubambile bua kubadimuija akakumbana mu 607 K.Y., pavua bena Babilona babutule Yelushalema.​—Yelemiya 6:6-8; 39:1, 2, 8, 9.

 Mu mukanda wa Yelemiya mudi kabidi mukenji udi ufila ditekemena. Yehowa wakambamu ne: “Padi bidimu 70 mu Babilona bikumbana, . . . nenkumbaje mulayi wanyi pa kunupingaja muaba eu [buloba bua bena Yuda].” (Yelemiya 29:10) Yehowa wakakumbaja mulayi au mu 537 K.Y., pavua bena Madayi ne bena Pelasa bamane kutshimuna Babilona. Yehowa wakitaba bua bantu bende bavua batangalake mu Babilona bapingane mu ditunga diabu ne bua bakajilule ntendelelu mulelela.​—2 Kulondolola 36:22, 23; Yelemiya 29:14.

 Tangila kafilme kîpi aka bua kumona mu tshikoso malu adi mu mukanda wa Yelemiya.