“Ndi munuambile malu aa bua nuikale ne ditalala ku butuangaji buanyi. Pa buloba nenuikale ne dikenga, kadi koleshayi muoyo! Ndi mutshimune ba pa buloba.”​—Yone 16:33, Nkudimuinu wa bulongolodi bupiabupia.

 “Nakunuambila malu â bua nuenu nuikale ne ditalala munda muanyi. Ha buloba nudi ne dikenga; kadi nukoleshe mitshima yenu; nakuhita ba ha buloba bukole.”​—Yone 16:33, Mukanda wa Nzambi.

 Yezu wakajadikila bayidi bende ne mêyi au ne: badi pabu mua kusankisha Nzambi nansha bobu batuilangana ne makenga anyi buluishi.

 “Ndi munuambile malu aa bua nuikale ne ditalala ku butuangaji buanyi a.” Mvese udi uleja kabidi ne: ditalala ki ndibenga kuikalaku dia buluishi to. Kadi nditalala dia mu muoyo ne mu meji. Ditalala adi didi dipetshibua ku butuangaji bua Yezu udi mulaye bua kutuma nyuma muimpe. “Muambuluishi” wa bukole au uvua ne bua kuambuluisha bayidi ba Yezu bua kutshimuna lutatu kayi luonso.​—Yone 14:16, 26, 27.

 “Pa buloba nenuikale ne dikenga, kadi koleshayi muoyo!” Yezu kavua musokoke bayidi bende makenga avuabu ne bua kutuilangana nawu, bu mudi malu mabi anyi dikengeshibua to. (Matayi 24:9; 2 Timote 3:12) Tshidibi, bavua ne bua ‘kukolesha muoyo.’

 “Ndi mutshimune ba pa buloba.” Apa, muaku “buloba” udi uleja bantu babi badi kule ne Nzambi. b 1 Yone 5:19 udi wamba ne: “Ba pa buloba bonso badi ku bukokeshi bua mubi,” anyi Satana. Nunku ba pa “buloba” ebu badi bela meji ne benza malu mu mushindu udi ubengangana ne disua dia Nzambi.​—1 Yone 2:15-17.

 Satana ne ba pa buloba bakenza muabu muonso bua kupangisha Yezu bua kukumbaja disua dia Nzambi, divua ditangila dilongesha bakuabu malu a Nzambi, ne difila muoyo wende mupuangane bu tshia kupikulangana natshi. (Matayi 20:28; Luka 4:13; Yone 18:37) Kadi Yezu kakalekela bua ba pa buloba banyange meji ende ne bamuseje kule ne Nzambi to. Wakashala ne lulamatu too ne ku lufu. Ke bualu kayi, wakafika ku diamba ne: wakatshimuna ba pa buloba ne Satana “mukokeshi wa buloba” kavua ne “bukokeshi” pa mutu pende to.​—Yone 14:30.

 Yezu wakafila tshilejilu tshiende yeye bua kuleja bayidi bende ne: bobu pabu bavua mua kushala ne lulamatu kudi Nzambi nansha pavua muoyo wabu mutoke utetshibua. Nanku, bivua bienze anu bu uvua ubambila ne: “Nudi mua kutshimuna penu pa ba buloba anu mundi panyi mubatshimune.”

 Yezu wakamba mêyi au butuku bua muladilu wa lufu luende. Bu muvuaye mumanye ne: uvua ne bua kufua mu katupa kakese, wakababidila mpunga au bua kuambila bapostolo bende ba lulamatu mibelu mikuabu ya ndekelu. Wakabambila amue malu avua ne bua kubelesha meji bikole aa: Kabavua ne bua kumumona kabidi to, bavua ne bua kubakengesha, anyi mene kubashipa. (Yone 15:20; 16:2, 10) Bu muvuabi mua kubatshingisha, Yezu wakajikija ne mêyi adi mu Yone 16:33 bua kubakankamija ne kubakolesha.

 Mêyi a Yezu ne tshilejilu tshiende bidi mua kukankamija kabidi bayidi bende ba lelu. Bena Kristo bonso badi mua kushala balamate Nzambi nansha padibu batuilangana ne ntatu.