Difila dia mapoloma a kalasa ka Gilada ka 148, divua dienzeke anu bu mutu dia tulasa tukuabu dienzeka, kadi divua dishilangane ku bualu bumue ebu: kakuvua muntu nansha umue mu nzubu wa difidila mapoloma to. Bantu bonso bavua bamuenena ndongamu au ku biamu. Mu tshikondo tshia disama didi ditangalake bikole pa buloba edi, mushindu udi difila dia mapoloma edi dienzeke udi ujadika bushuwa ne: bulongolodi buetu butu bushintulula malu bilondeshile nsombelu.

Ndongamu wa difila mapoloma au uvua muenzeke mu dia 14/3/2020, muaba wa tulasa tua Watchtower, ku Patterson mu New York. Muanetu Stephen Lett wa mu Kasumbu kaludiki ke uvua mulombole ndongamu au. Balongi bavua bajikije kalasa aku bavua 55. *

Mbingu ndambu kumpala kua ndongamu au kuenzeka, bakatuadija kuakula bua disama dia korona mu ngumu pa buloba bujima. Anu bu mukavuabi bileja mu tshitupa tshia Ngumu (Salle de presse) tshia mu site wa jw.org, biro bidi bilombola mudimu wa Bantemu ba Yehowa pa buloba bujima biakatuadija kulondesha ngumu ayi pa tshibidilu ne kupesha bisumbu bionso buludiki mu diumvuangana ne bidi bakokeshi bamba.

Tshilejilu, bakokeshi mbakandike didisangisha dia bantu ba bungi. Bua bualu abu ne makuabu kabidi, Kasumbu kaludiki kakapangadija ne: muntu nansha umue kabuedi mu ndongamu au to; nansha balongi kababikidi bantu bua kubuelamu to. Bena mu dîku dia Betele ne balongi ba kalasa ka Gilada bavua batumikile buludiki abu, mbatushile tshilejilu tshimpe.​—Yone 13:34, 35.

Nansha nanku, bavua balongolole malu bua babikidibue ne bena ku Betele bende bamuenena ndongamu au ku biamu. Bena Kristo netu ba pa buloba bujima bapite pa binunu 10 pamue ne balunda ne bena mu mêku a balongi ba kalasa aku bavua pabu benda bamuenena ndongamu au ku biamu.

Bena mu Kasumbu kaludiki mbasue bua bisangilu bietu bitutu tuenza nangananga bia ku lumingu, bitungunuke anu ne kuenzeka nansha mudiku tshipupu tshia korona tshidi tshitangalake etshi. Nunku, mbaleje Betele yonso malu masunguluke a kuenza bua kulongolola bisangilu bia tshisumbu bilondeshile nsombelu wa pa muaba ne pa muaba. Bua imue miaba, bana betu badi benzela bisangilu mu tusumbu tukese anyi babienzela ku biamu kadi benda bamonangana ku kamera. Tudi batuishibue ne: bana betu ba pa buloba bujima nebatungunuke anu ne kupeta biakudia bia mu nyuma ebi.

Kakuyi mpata, kakuena tshintu nansha tshimue tshidi mua kupangisha bukole bua Yehowa bua kutuambuluisha bua tutantamene tshipumbishi nansha tshimue.​—Misambu 18:29.