Kasumbu kaludiki ka Bantemu ba Yehowa nkamanyishe ne: mbasungule biro bia filiale bia miaba kampanda bua kutetabu programe wa dibanguluila bimue bia ku bisangilu bietu bia tshisumbu bia bantu batuilangana pamue. Biro bia filiale bidibu bambile bualu ebu nebisungule Nzubu ya Bukalenge ya miaba ikadi bantu ba bungi bangate bisalu ne bavule kabayi ne disama dia korona to. Tshikole, bionso bikalabu mua kuenza mu muanda eu nebienzeke anu mu dinemeka dia mêyi ne mikandu ya mbulamatadi ya matunga adibu idi itangila dituilangana pamue dia bantu mu nzubu. Dimanyisha edi bavua badibadile bena mu mêku a Betele a pa buloba bujima mu Ditanu dia 15/10/2021.

Bipeta biapatuka ku diteta adi nebiambuluishe bua kumona ni badi mua kuanyishila bisumbu bikuabu ndambu bua kutuadijululabi pabi bisangilu bia bantu batuilangana pamue ebi. Dimanyisha adi divua dileje kabidi ne: tshibungi tshia midimu ya bulongolodi buetu idi ikengela bua bantu kutuilangana pamue neyanji kushala anu mimane too nansha ne mu dia 1/1/2022.

Tudi ne dianyisha dia bungi dia mudi Kasumbu kaludiki katabalela dîku dietu dia buloba bujima ne mudiku kalongolola bua kuenda kupingajulula malu a midimu yetu ya malu a Nzambi ku ndambu ku ndambu. Tuikalayiku tusambila bua Yehowa atungunuke ne kulombola mapangadika aa ne kuabenesha.​—Nsumuinu 14:16