Mu dia 1/1/2023, muanetu Armando Ochoa wa mu Komite wa filiale wa Amerike wa pankatshi uvua mumanyishe ne: Bible mujima wa Nkudimuinu wa bulongolodi bupiabupia wa muakulu wa tumama wa mu Mexique ukadiku mu jw.org ne mu programe wa JW Library Sign Language. Muanetu Ochoa uvua mumanyishe lumu luimpe lua disanka alu mu ndongamu wa pa buende uvua muenzeke mu Nzubu wa mpuilu wa mu El Tejocote.

Atshi ke tshisangilu tshinene tshia kumpala tshivua Bantemu ba Yehowa ba mu teritware wa filiale wa Amerike wa pankatshi benze batuilangane pamue katshia tshipupu tshia korona tshiabangisha. Bana betu 2 317 bavua babuele mu tshisangilu atshi batuilangane bonso pamue. Pavua ndongamu au wenda wenzeka, bakuabu binunu ne binunu bavua bamulondela ku biamu mu Nzubu ya mpuilu ne ya Bukalenge mu ditunga dijima dia Mexique.

Tatu Sergio Peña (mumanyi mupiluke wa muakulu wa tumama wa mu Amerike ne wa mu Mexique,) ne mamu María Teresa Vázquez (mulombodi munene wa Tshibambalu tshidi tshimanyina malu a balema mu provense wa Yucatan) bavua babuele pabu mu tshisangilu atshi.

Tatu Peña udi wamba ne: “Tudi tuela Bantemu ba Yehowa ba mu Mexique kalumbandi. Kutuadijila mu dia 1/1/2023, bampudi matshi bakadi mpindieu ne . . . Bible mujima mu muakulu wa tumama wa mu Mexique. Ndi musanke bikole be! Bible eu ‘mmulenga wa dikema ne mmukudimuna bimpe bitambe!’”

Dikudimuna Nkudimuinu wa bulongolodi bupiabupia mu muakulu wa tumama wa mu Mexique diakatuadija ne Mifundu ya mu tshiena Greke ya buena Kristo mu ngondo wa 8 wa 2008. Mu bidimu bipite pa 14 bishale ebi, bavua benda bapatula ku kakese ku kakese mikanda ya mu Bible pavuayi ijika. Eu ke Bible mujima wa kumpala udibu bapatule mu muakulu wa tumama wa mu Mexique.

Nansha mu tshipupu tshia korona, mikanda ya mu Bible ya bungi ivuabu bapatule ivua miambuluishe bamanyishi badi bampudi matshi. Muanetu mukuabu mmuambe ne: “Ndi ne dianyisha dia bungi bua muvuabu bapatule mikanda ya mu Bible ya bungi mu tshipupu tshia korona. Yehowa mmutuambuluishe bua tulame ditabuja dietu dikole.”

Muanetu wa bakaji udi mpudi matshi mmuambe pende ne: “Kumpala kua tuetu kupeta Nkudimuinu wa bulongolodi bupiabupia mu muakulu wa tumama wa mu Mexique, bena Kristo nanyi ke bavua bankudimuina mvese. Kadi bivua bikole bua bobu kukudimuna mvese mu mushindu wa muomumue, ke bualu kayi tshivua nkuata mvese mu mutu to. Mpindieu tshitshiena kabidi dijinga ne muntu bua meme kumvua Bible to.”

Tudi batuishibue ne: Bible mujima eu neambuluishe bikole bana betu bampudi matshi anyi badi ne lutatu lua kumvua. Tudi tulomba Yehowa bua ababeneshe bua mudibu badienzeja bua kuambila bakuabu mukenji wa “matuku atshilualua mimpe ne ditekemena.”​—Yelemiya 29:11.