Mu dia 6/8/2020, kabadi ka mu ditunga dia Turkménistan kakakosela muanetu Eldor ne Sanjarbek Saburov buloko bua bidimu bibidi bualu bavua babenge kubuela ku busalayi. Eldor ne Sanjarbek mbana ba muntu. Eldor udi ne bidimu 21, Sanjarbek udi yeye ne 25. Kabadi aku kavua kabenga kutangilula dilomba dia bana betu abu. Eu mmusangu muibidi udibu babakosele tshibawu tshia buloko bua dibenga kubuela ku busalayi.

Mu 2016, muanetu Sanjarbek Saburov wakabenga kubuela ku busalayi ne kanemu konso. Nunku, bakamukosela tshibawu tshia bidimu bibidi, kayi ubuela mu buloko to, kadi bamutekele bampulushi bamulondolola.

Tshidimu tshiakalonda, muakunyende Eldor, wakabenga pende bua kubuela ku busalayi. Kumukoselabu tshibawu tshia bidimu bibidi bia bamuenzeja midimu mikole. Mbulamatadi uvua ne bua kuangata bia pa lukama makumi abidi bia difutu diende.

Bilondeshile mikenji ya ditunga dia Turkménistan, bantu badi batungunuka ne kubenga ku budisuile bua kuenza malu kampanda adi ditunga dilomba, badi mua kubakosela tshibawu musangu muibidi. Ke bualu kayi mu ngondo 4 wa 2020, biro bia basalayi bitu bibueja bantu ku busalayi biakatumina kabidi bana betu abu mukanda bua baye kudifundisha ku busalayi. Bobu kubenga. Ke kubabikilabu, kubalumbuluishabu ne kubakoselabu tshibawu tshia buloko.

Nansha mudi baledi ba bana betu aba ne kanyinganyinga kakole, didiebua diabu mu buloko edi nedienze kabidi bua bapingile makuta; bualu tatuabu udi ne disama dia nyima dia munanunanu, didi dimupangisha bua kuenza mudimu. Bana abu ke bavua badima ndanda bua kudiisha dîku diabu. Kadi bu mudibu babele mu buloko, baledi babu kabakuikala kabidi ne mushindu wa kupeta bidibu nabi dijinga to. Baledi babu badi dijinga ne dikuatshisha abu ke badi mpindieu benzejibue bua kubatabalela mu buloko.

Ditunga dia Turkménistan kadiena nansha dianyishila muntu bua kuenza mudimu mukuabu pamutu pa kubuela ku busalayi to. Ke bualu kayi, bansongalume betu badi babenga kubuela ku busalayi badi ne bua kuenza buloko bua bidimu kubangila ku tshimue too ne ku binayi. Bansongalume betu bonso bakadibu bele mu buloko bua dibenga kubuela ku busalayi mu ditunga edi kusangisha ne Eldor ne Sanjarbek badi dikumi.

Tudi bamanye ne: Yehowa neabeneshe bansongalume betu ba mu Turkménistan bua dikima diabu. Tudi tulomba yonso wa kudibu bua avuluke tshivua Yehowa mulaye mukalenge Asa etshi: “Nuenu, ikalayi ne bukole ne kanuteketshi mu mikolo to, bualu nebafute mudimu wenu.”​—2 Kulondolola 15:7.